ខួប៧០ឆ្នាំឯករាជ្យជាតិ៖ លោក សម រង្ស៊ី រំលេចពីគុណបំណាច់របស់ឪពុកលោក
នៅក្នុងឱកាសខួប៧០ឆ្នាំ នៃបុណ្យឯករាជ្យជាតិលោក សម រង្ស៊ី ប្រធានស្តីទីអតីតគណបក្សសង្គ្រោះជាតិ បានឆ្លៀតសរសេរនៅលើហ្វេសប៊ុកផ្លូវការរបស់លោក ដោយស្នើឲ្យកូនខ្មែរចងចាំនូវប្រវត្តិសាស្ត្រពិតនៃប្រទេសកម្ពុជាស្តីពីព្រះរាជបូជនីយកិច្ចរបស់សម្តេចព្រះនរោត្តម សីហនុ ក្នុងការទាមទារឯករាជ្យពីបារាំងកនៅដើមទសវត្សរ៍ឆ្នាំ១៩៥០ ដោយមានការចូលរួមពីឪពុករបស់លោក។ តែមន្ត្រីជាន់ខ្ពស់គណបក្សកាន់អំណាចយល់ថាឪពុកលោក សម រង្ស៊ី មិនមែនជាបុគ្គលសំខាន់នៃការទទួលបានឯករាជ្យពីបារាំងទេ។
ចុះផ្សាយនៅថ្ងៃ៖
ស្តាប់ - ០២:២៩
ថ្ងៃ០៩ វិច្ឆិកា ឆ្នាំ២០២៣ គឺជាខួប៧០ឆ្នាំនៃឯករាជ្យជាតិកម្ពុជា បន្ទាប់ពីប្រទេសនេះទទួលបានសិទ្ធិគ្រប់បែបយ៉ាងពីអាណានិគមបារាំងកាលពីឆ្នាំ១៩៥៣ ដឹកនាំដោយអតីតព្រះមហាក្សត្រខ្មែរព្រះបាទ សម្តេចព្រះ នរោត្តម សីហនុ។ ដោយរៀបរាប់ពីការបំភ្លៃប្រវត្តិសាស្ត្រពីសំណាក់មេដឹកនាំបក្សកាន់អំណាចបច្ចុប្បន្ន លោក សម រង្ស៊ី ប្រធានស្តីទីអតីតគណបក្សសង្គ្រោះជាតិក៏បានឆ្លៀតលើកយកគុណសម្បត្តិរបស់ឪពុកលោក គឺលោក សម សារី ដែលជាមន្ត្រីជាន់ខ្ពស់សម័យសង្គមរាស្ត្រនិយមមករំលេច។
ដោយដកស្រង់ពីឯកសារចាស់ៗ ព្រឹត្តិប័ត្រ«Le Sangkum» កាលពីខែសីហា ឆ្នាំ១៩៦៥ លោក សម រង្ស៊ី បានលើកយកមកបង្ហាញនូវវីរភាពរបស់ឳពុកលោក ដែលបានចូលរួមនៅក្នុងបុព្វហេតុទាមទារឯករាជ្យពីប្រទេសបារាំង។
លោក សម រង្ស៊ី បានដកស្រង់ព្រះរាជសារខ្លីតាមសារទូរលេខជាភាសាបារាំងរបស់អតីតព្រះមហាក្សត្រ នរោត្តម សីហនុ កាលពីថ្ងៃទី១៨ ខែមិថុនា ឆ្នាំ១៩៥៣ ទៅកាន់លោក ប៉ែន នុត ជានាយករដ្ឋមន្ត្រី ពីទីក្រុងបាងកកប្រទេសថៃ ដែលមានខ្លឹមសារបកប្រែជាភាសាខ្មែរថាលោក សម សារី តែម្នាក់គត់ ក្នុងការការពារបុព្វហេតុរបស់ប្រទេសកម្ពុជាយ៉ាងត្រចះត្រចង់នៅប្រទេសបារាំង លោកសមនឹងបានទទួលការតម្លើងឋានៈជារដ្ឋមន្ត្រីដោយមិនទុកពន្យាពេលបន្ថែមទៀត។
ក៏ប៉ុន្តែលោក សុខ ឥសាន អ្នកនាំពាក្យគណបក្សប្រជាជនកម្ពុជា ដែលកាន់អំណាចបច្ចុប្បន្ន បានបន្តហៅលោក សម រង្ស៊ី ថាជាមេឧទ្ទាមក្រៅច្បាប់ ហើយថាសំដីលោក សម រង្ស៊ី គ្រាន់តែជាមតិយោបល់លើកតម្កើងត្រកូលរបស់ខ្លួន តែជាក់ស្តែងរឿងនេះបានចារនៅក្នុងប្រវត្តិសាស្ត្ររួចហើយ។ អ្នកនយោបាយវ័យចំណាស់រូបនេះបន្តថាឪពុកលោក សម រង្ស៊ី មិនមែនជាឥស្សរជនដើរតួសំខាន់នៅក្នុងការទាមទារឯករាជ្យពីបារាំង ដែលដឹកនាំដោយព្រះករុណា សីហនុ នោះទេ។ គឺគ្រាន់ជាអ្នកហែរហម ហើយក្រោយមកមានកំហុស ត្រូវបានដកមកប្រទេសវិញ។ នេះបើតាមលោក សុខ ឥសាន។
សូមរំលឹកថា ប្រទេសកម្ពុជាបានស្ថិតនៅក្រោមអាណាព្យាបាលបារាំងអស់រយៈពេលជិត១សតវត្ស គឺចាប់ពីថ្ងៃទី១១ ខែសីហា ឆ្នាំ១៨៦៣ ដល់ថ្ងៃទី០៩ ខែវិច្ឆិកា ឆ្នាំ១៩៥៣។ ក្រោមព្រះរាជបូជនីយកិច្ចទាមទារឯករាជ្យពីបារាំងរបស់សម្តេច នរោត្តម សីហនុ បារាំងក៏បានទទួលស្គាល់ដែរថាឯករាជ្យរបស់ប្រទេសកម្ពុជាគឺធ្វើឡើងដោយមិនមានការបង្ហូរឈាមមួយដំណក់ឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ