ម្ចាស់បុរីពិភពថ្មីចេញមកការពារភាពស្អាតស្អំនៅពីក្រោយការចោទរឹបអូសផ្ទះអតិថិជន
អ្នកឧកញ៉ា ហុង ពីវ ប្រធានក្រុមហ៊ុនបុរីពិភពថ្មីបានចេញមកការពារភាពស្អាតស្អំនៅពីក្រោយការចោទប្រកាន់ថា ក្រុមហ៊ុនលោករឹបអូសផ្ទះអតិថិជនក្នុងករណីអតិថិជនពុំមានលទ្ធភាពបង់ប្រចាំខែ។ ការបំភ្លឺនេះក៏ធ្វើឡើងស្របពេលដែលអតិថិជនបន្តជួបជុំទាមទាររកដំណោះស្រាយនៅខាងមុខការិយាល័យបុរីពិភពថ្មីក្នុងខណ្ឌកំបូល រាជធានីភ្នំពេញ។
ចុះផ្សាយនៅថ្ងៃ៖
មិនត្រឹមតែការពារភាពស្អាតស្អំ ក្រុមហ៊ុនពិភពថ្មីបានចង្អុលមុខបុគ្គលពីររូបថា នៅពីក្រោយការជួបតវ៉ានេះរួមមានៈ លោក ហេង តារា ដែលក្រុមហ៊ុនអះអាងថា មានផ្ទះចំនួន៣៩ផ្ទះ និងបច្ចុប្បន្នកំពុងបង់រំលោះ៣ផ្ទះនិងម្នាក់ទៀតឈ្មោះថា ឆាយ យាន ដែលក្រុមហ៊ុនអះអាងថា មានឋានៈជារដ្ឋលេខាធិការមានផ្ទះចំនួន២០៣ផ្ទះនិងកំពុងបង់រំលោះ១០ផ្ទះ។ បើតាមក្រុមហ៊ុនបុរីពិភពថ្មីការតវ៉ានេះកើតឡើងដោយសារអ្នកទាំងពីរលក់ផ្ទះមិនចេញទើបដើរញុះញង់អតិថិជនមួយចំនួនចេញមកជួបជុំតវ៉ា។ ក្រុមហ៊ុនភពថ្មីបានបរិហាទៀតថា លោកទាំងពីរទិញផ្ទះពីក្រុមហ៊ុនយកទៅលក់បន្តចំណេញរាប់រយ រាប់ពាន់ដុល្លាក្នុងមួយផ្ទះ។
នៅចំពោះមុខសកម្មភាពនេះ អ្នកឧកញ៉ា ហុង ពីវ បានស្នើឲ្យអាជ្ញាធរមានសមត្ថកិច្ចចាត់វិធានការតាមផ្លូវច្បាប់រាល់សកម្មភាពទាំងឡាយណាដែលបំពានគោលការណ៍ច្បាប់ រំលោភលើសិទ្ធិបុគ្គលនិងសណ្ដាប់ធ្នាប់សាធារណៈ។
នៅក្នុងសេចក្ដីប្រកាសព័ត៌មានថ្ងៃទី២៩ខែតុលាឆ្នាំ២០២៣ ក្រុមហ៊ុនបុរីពិភពថ្មីបានអះអាងថា ទោះបីពេលបច្ចុប្បន្ននេះមានបញ្ហាសេដ្ឋកិច្ចជាសកល ក្រុមហ៊ុននៅតែអនុវត្តតាមកិច្ចសន្យាដោយឥតកែប្រែនិងកែប្រែលក្ខខណ្ឌបន្ថែមដើម្បីជាប្រយោជន៍សម្រាប់អតិថិជនជាមួយលក្ខខណ្ឌបីចំណុច។ ទី១ ជាកិច្ចសន្យាទិញលក់ផ្ទះនិងមានលក្ខខណ្ឌទទួលទិញវិញ ទី២ជាកិច្ចសន្យាទិញលក់ផ្ទះគ្មានលក្ខខណ្ឌទទួលទិញវិញ ,ទី៣ជាកិច្ចសន្យាទិញលក់ផ្ទះ គ្មានលក្ខខណ្ឌទទួលទិញវិញសម្រាប់អតិថិជនមាន២ផ្ទះ។ នៅក្នុងកិច្ចសន្យាត្រង់ចំណុចទី៣នេះ ក្រុមហ៊ុនបានគូសបញ្ជាក់ថា អនុវត្តតែកិច្ចសន្យាណាដែលទិញផ្ទះមុនថ្ងៃទី៣០ខែតុលាឆ្នាំ២០២២។
ក្រុមហ៊ុនបុរីពិភពថ្មីបានគូសបញ្ជាក់ថា ក្នុងករណី ក្រុមហ៊ុនធ្វើតាមនូវអ្វីៗដែលអតិថិជនទាមទារក្រុមហ៊ុននឹងក្ស័យធន។ដំណោះស្រាយដែលពួកគេចង់បានស៊ូខាត៥០ភាគរយដើម្បីលក់ផ្ទះឲ្យក្រុមហ៊ុនវិញ និងទូទាត់សំណង់ខ្លះមកអតិថិជនដែលត្រូវបានបុរីកាត់ផ្ទះយក។
ចំពោះការចោទ លោក ហេង តារា និង លោក ឆាយ យាន ជាអ្នកពីក្រោយការតវ៉ាអតិជនមួយចំនួនទៀតបានចេញមុខការពារនិងគាំទ្ររបស់លោកទាំង២ថា បានជួយរកយុត្តិធម៌ឲ្យពួកគេ។ ពួកគេថែមទាំងបានប្រមូលស្នាមមេដៃក្នុងនាមជាសាក្សីការពារការចោទប្រកាន់នេះ។ នៅក្នុងលិខិតបដិសេធចុះថ្ងៃទី១វិច្ឆិកាឆ្នាំ២០២៣នេះអតិថិជនបានអះអាងថា ការចូលរួមទាមទារគ្រប់សកម្មភាពកន្លងមក មិនមានការបង្ខិតបង្ខំពីអ្នកណាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ