រដ្ឋាភិបាលកាត់ដី៦៣៩ហិកតានៅស្ទឹងហាវឲ្យក្រុមហ៊ុនឯកជន
រដ្ឋាភិបាលកម្ពុជា បានធ្វើអនុប្បយោគដីសាធារណៈរបស់រដ្ឋទំហំ ៦៣៩ហិកតា នៅឃុំទំនប់រលក ស្រុកស្ទឹងហាវ ខេត្តព្រះសីហនុ ឱ្យជាដីឯកជនរបស់រដ្ឋ ដើម្បីប្រគល់ឲ្យក្រុមហ៊ុនធ្វើការអភិវឌ្ឍជាតំបន់ពាណិជ្ជកម្ម ។ នេះបើតាមអនុក្រឹត្យលេខ ចុះថ្ងៃទី២៣ ខែមិថុនា ឆ្នាំ២០២៣ដែលទើបត្រូវបានគេផ្សព្វផ្សាយ។
ចុះផ្សាយនៅថ្ងៃ៖
ក្នុងអនុក្រឹត្យនេះ បង្ហាញថា ផ្ទៃដីសរុបដែលបានធ្វើអនុប្បយោគ មានទំហំ ៧៩៩ហិកតា ក្នុងនោះផ្ទៃដីចំនួន ២០ភាគរយ ស្មើនិងទំហំ ១៥៩ហិកតា ៨០អា ត្រូវបានប្រគល់ជូនរដ្ឋបាលខេត្តព្រះសីហនុ។
ចំណែក ផ្ទៃដីចំនួន ៨០ភាគរយ ស្មើនិងទំហំ ៦៣៩ហិកតា ២០អា ត្រូវបានផ្តល់ជាកម្មសិទ្ធិឯកជនជូនក្រុមហ៊ុន C99 international investment (Cambodia) Co., Ltd សម្រាប់ធ្វើការអភិវឌ្ឍជាសណ្ឋាគារ វីឡាទំនើប អគារស្នាក់នៅរួម ផ្សារទំនើប ភោជនីយដ្ឋាន មជ្ឈមណ្ឌលពាណិជ្ជកម្ម តំបន់សេវាកម្មនានា និងឃ្លាំងដាក់សម្ភារ។
ការបន្តកាត់ដីរបស់រដ្ឋប្រគល់ឲ្យឯកជនបន្តបន្ទាប់ក្រោមរូបភាពអភិវឌ្ឍន៍នេះ បានធ្វើឲ្យមន្ត្រីអង្គការសង្គមស៊ីវិលខ្លះព្រួយបារម្ភពីការបាត់បង់ធនធានធម្មជាតិ ដោយកត់សំគាល់ថា ការផ្តល់ដីសម្បទានមួយចំនួនកន្លងមកមិនសូវបានផ្តល់ប្រយោជន៍ដល់ប្រជាជនមូលដ្ឋានឡើយ។ អ្នកដែលរងផលប៉ះពាល់គឺត្រូវធ្វើចំណាកស្រុកទាំងប្រថុយប្រថាន ដោយសារតែបាត់បង់ដីបង្កបង្កើនផល។ នេះបើតាម លោក វណ្ណ សូផាត មន្ត្រីសម្របសម្រួលផ្នែកធុរកិច្ច និងសិទ្ធិមនុស្ស របស់មជ្ឈមណ្ឌលសិទ្ធិមនុស្សកម្ពុជា។
មន្ត្រីសិទ្ធិមនុស្សរូបនេះស្នើឲ្យមានការសិក្សាពីផលប៉ះពាល់ទៅលើសហគមន៍មូលដ្ឋាន លើគម្រោងអភិវឌ្ឍន៍មួយនេះ ខណៈកន្លងទៅក៏ធ្លាប់ទំនាស់ដីធ្លីយ៉ាងក្តៅគគុកកើតឡើងដែរនៅតំបន់ក្បែរនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ