នាយករដ្ឋមន្ត្រីកម្ពុជាបញ្ជាក់ពីជំហរនយោបាយមិនប្រែប្រួលជាមួយរុស្សី
លោកនាយករដ្ឋមន្ត្រី ហ៊ុន ម៉ាណែត បានថ្លែងថាគោលនយោបាយការបរទេសរបស់កម្ពុជាចំពោះរុស្ស៊ី មិនមានការប្រែប្រួលឡើយ ជាពិសេសនៅក្នុងទំនាក់ទំនងទ្វេភាគីកម្ពុជា-រុស្ស៊ី។ ការបញ្ជាក់របស់លោក ហ៊ុន ម៉ាណែត ដូច្នេះ បានធ្វើឡើងនៅក្នុងជំនួបជាមួយឯកអគ្គរដ្ឋទូតសហព័ន្ធរុស្ស៊ីប្រចាំនៅកម្ពុជា លោក Anatoly BOROVIK នៅថ្ងៃព្រហស្បតិ៍នេះ នៅទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០២:២២
បន្ថែមពីលើការអះអាងជាថ្មីពីជំហររបស់កម្ពុជាចំពោះរុស្ស៊ី លោកនាយករដ្ឋមន្ត្រី ហ៊ុន ម៉ាណែត និងលោក Anatoly BOROVIK ឯកអគ្គរដ្ឋទូតរុស្ស៊ីប្រចាំកម្ពុជា បានរំលឹកពីទំនាក់ទំនងទ្វេភាគីរវាងប្រទេសទាំងពីរកន្លងមក ដោយឯកអគ្គរដ្ឋទូតរុស្សីបានធ្វើការសាទរ និងគាំទ្រដល់លោក ហ៊ុន ម៉ាណែត ដែលបានក្លាយជានាយករដ្ឋមន្ត្រីកម្ពុជាក្រោយការបោះឆ្នោតជ្រើសតាំងតំណាងរាស្ត្រឆ្នាំ ២០២៣នេះ។
រុស្ស៊ីសម្តែងនូវការជឿជាក់ថា ចំណងមិត្តភាពរុស្សី-កម្ពុជា នឹងកាន់តែរីកចម្រើនរឹងមាំ បន្ថែមពីលើកិច្ចសហប្រតិបត្តិការល្អជាប្រវត្តិសាស្ត្រ ផ្នែកការទូតដែលមានរយៈពេលជាង ៦០ឆ្នាំកន្លងទៅ។ បន្ថែមពីនេះ រុស្ស៊ីក៏បានមើលឃើញពីការលើកស្ទួយទំនាក់ទំនងកិច្ចសន្ទនាអាស៊ាន-រុស្ស៊ី បន្ថែមមួយកំរិតទៀត ខណៈដែលកម្ពុជាបំពេញតួនាទីជាប្រទេសសម្របសម្រួលអាស៊ាន-រុស្ស៊ី។
ក៏ប៉ុន្តែនៅដំណាក់កាលយុគសម័យថ្មីនេះ ទំនាក់ទំនងរវាងកម្ពុជា និងរុស្ស៊ី ត្រូវគេមើលឃើញថាហាក់ដូចជាមិនសូវរលូនទៅតាមការអះអាងបែបការទូតនោះទេ។ មិនសូវល្អូកល្អឺន គឺតាមរយៈសង្គ្រាមឈ្លានពានរបស់រុស្សី ទៅលើអ៊ុយក្រែន។
ជាការកត់សម្គាល់ កម្ពុជាបានក្លាយជាប្រទេស Co-sponsors នៅក្នុងការបោះឆ្នោតរៀបចំដោយអង្គការសហប្រជាជាតិចំនួន៣លើកកាលពីឆ្នាំ២០២២ កន្លងទៅ ដោយកម្ពុជាបានបោះឆ្នោតថ្កោលទោសរុស្ស៊ី២លើក និងបោះឆ្នោតអនុបវាទ១លើកទាក់ទងទៅនឹងសំណើររបស់សហរដ្ឋអាមេរិកស្នើសុំឲ្យបញ្ឈរជើងរុស្ស៊ីនៅក្រុមប្រឹក្សាសិទ្ធិមនុស្សអង្គការសហប្រជាជាតិ។
ទោះយ៉ាងណា តាមរយៈជំនួបរវាងលោក ហ៊ុន ម៉ាណែត និងឯកអគ្គរដ្ឋទូតរុស្ស៊ីនៅពេលនេះ ក្រៅពីនយោបាយ ភាគីទាំងពីរក៏បានលើកឡើង និងបន្តកិច្ចសហប្រតិបត្តិការរវាងគ្នាលើវិស័យសំខាន់ៗមួយចំនួនជាពិសេសវិស័យឧស្សាហកម្មរថយន្ត និងគ្រឿងចក្រ គ្រឿងយន្តកសិកម្ម បរិក្ខារសុខាភិបាល និងបច្ចេកវិទ្យាព័ត៌មានជាដើម។
សូមរំលឹកថា រុស្ស៊ី ដែលកាលពីមុនជាអតីតសហភាពសូវៀត ជាអ្នកជួយឧបត្ថម្ភគាំទ្រកម្ពុជាដ៏ធំបំផុតលើការស្តារ និងកសាងប្រទេសកម្ពុជាឡើងវិញ បន្ទាប់ពីការដួលរលំនៃរបបប្រល័យពូជសាសន៍។ ក៏ប៉ុន្តែបច្ចុប្បន្ននេះ ចិនត្រូវគេមើលឃើញថាជាប្រទេសដែលកម្ពុជាស្និទ្ធជាងគេ ដោយចិន-កម្ពុជា បានកសាងនូវទំនុកចិត្តរវាងគ្នាទៅវិញទៅមក រហូតក្លាយជាមិត្តភាពដែកថែប និងកិច្ចសហប្រតិបត្តិការត្បូងពេជ្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ