វេទិកាខ្សែក្រវាត់និងផ្លូវធ្វើឲ្យលោក ហ៊ុន ម៉ាណែត មានវត្តមាន២ដងនៅចិនតែក្នុងរយៈពេល១ខែ
លោកនាយករដ្ឋមន្ត្រី ហ៊ុន ម៉ាណែត និងគណៈប្រតិភូជាន់ខ្ពស់បានចាកចេញពីប្រទេសកម្ពុជាហើយនៅព្រឹកថ្ងៃចន្ទនេះ ដើម្បីចូលរួមវេទិកាខ្សែក្រវាត់ និងផ្លូវលើកទី៣ នៅប្រទេសចិន ដែលនឹងប្រព្រឹត្តទៅនៅថ្ងៃទី១៧-១៨ ខែតុលា ឆ្នាំ២០២៣នេះ។ ក្រៅពីវេទិកាខ្សែក្រវាត់ និងផ្លូវ នាយករដ្ឋមន្ត្រីកម្ពុជាក៏នឹងមានជំនួបជាមួយមេដឹកនាំចិនលោក ស៊ី ជិនពីង និងជួបក្រុមហ៊ុនធំៗរបស់ចិនជាច្រើនទៀត។
ចុះផ្សាយនៅថ្ងៃ៖
ស្តាប់ - ០៣:៤៨
ក្រោមមូលបទ «កិច្ចសហប្រតិបត្តិការខ្សែក្រវាត់ និងផ្លូវ ប្រកបដោយគុណភាពខ្ពស់៖ រួមគ្នាដើម្បីការអភិវឌ្ឍន៍ និងវិបុលភាពរួម» លោកនាយករដ្ឋមន្ត្រី ហ៊ុន ម៉ាណែត នឹងថ្លែងសុន្ទរកថាស្តីពី«សេដ្ឋកិច្ចឌីជីថលជាប្រភពនៃកំណើនថ្មី»។
តាមការគ្រោងទុក លោក ហ៊ុន ម៉ាណែត នឹងមានជំនួបជាមួយមេដឹកនាំកំពូលៗចិន ដូចជាលោក ស៊ី ជិនពីង ប្រធានាធិបតីចិន លោក លី ឈាង នាយករដ្ឋមន្ត្រី និងលោក ឆាយ លី សមាជិកគណៈអចិន្ត្រៃយ៍ នៃការិយាល័យនយោបាយគណៈមជ្ឈឹមបក្សកុម្មុយនីស្តចិន។ នេះបើតាមលោក មាស សុភ័ណ្ឌ ប្រធានក្រុមអ្នកនាំពាក្យនាយករដ្ឋមន្ត្រីថ្លែងប្រាប់អ្នកកាសែតនៅព្រលានយន្តហោះអន្តរជាតិភ្នំពេញ។ វត្តមានរបស់លោក ហ៊ុន ម៉ាណែត នៅលើទឹកដីចិនជាលើកទី២ តែក្នុងរយៈពេលមួយខែនេះ ក៏នឹងមានជំនួបជាមួយប្រធានរដ្ឋវៀតណាម និងប្រធានរដ្ឋឡាវ រួមនឹងជំនួបជាមួយក្រុមហ៊ុនវិនិយោគធំៗរបស់ចិនផងដែរ។
បន្ទាប់ពីវេទិកាផ្លូវ និងខ្សែក្រវាត់ លោក ហ៊ុន ម៉ាណែត និងគណៈប្រតិភូ នឹងបន្តដំណើរទៅកាន់ទីក្រុងរីយ៉ាត ប្រទេសអារ៉ាប៊ី សាអ៊ូឌីត ដើម្បីចូលរួមកិច្ចប្រជុំកំពូលអាស៊ាន ក្រុមប្រឹក្សាសហប្រតិបត្តិការឈូងសមុទ្រ នៅថ្ងៃទី២០ ខែតុលា ខាងមុខនេះ។
ងាកមកបញ្ហាខ្សែក្រវាត់ និងផ្លូវរបស់ចិនវិញ គឺយុទ្ធសាស្ត្រនេះត្រូវបានបង្កើតឡើងដោយលោកប្រធានាធិបតី ស៊ី ជិនពីង នៅឆ្នាំ២០១៣ ដែលមានសមាសធាតុសំខាន់ពីរ គឺខ្សែក្រវាត់សេដ្ឋកិច្ចផ្លូវគោកតាមបណ្តោយផ្លូវសូត្រ និងផ្លូវសូត្រសមុទ្រសតវត្សទី២១ ដែលមានបំណងតភ្ជាប់ប្រទេសចិនតាមបណ្តាប្រទេសអាស៊ីមួយចំនួនទៅកាន់ទ្វីបអឺរ៉ុប។
នៅខែមិនា ឆ្នាំ២០១៥ ចិនបានចេញផ្សាយឯកសារមួយស្តីពីចក្ខុវិស័យ និងសកម្មភាពស្តីពីការរួមគ្នាស្ថាបនាខ្សែក្រវាត់សេដ្ឋកិច្ចតាមបណ្តោយផ្លូវសូត្រ និងផ្លូវសូត្រសមុទ្រសតវត្សទី២១ ដោយឯកសារនេះបានហៅការផ្តួចផ្តើមគំនិតនេះថានឹងផ្តល់អត្ថប្រយោជន៍ដល់បណ្តាប្រទេសពាក់ព័ន្ធ ក្នុងនោះមានការលើកកម្ពស់វិបុលភាពផ្នែកសេដ្ឋកិច្ច អភិវឌ្ឍកិច្ចសហប្រតិបត្តិការសេដ្ឋកិច្ចក្នុងតំបន់ ពង្រឹងការផ្លាស់ប្តូរគ្នាទៅវិញទៅមក និងលើកកម្ពស់សន្តិភាពជាដើម។
ដោយឡែកសម្រាប់កម្ពុជា គំនិតផ្តួចផ្តើម «ខ្សែក្រវាត់និងផ្លូវ» ដែលបានដាក់ចេញ១០ឆ្នាំកន្លងទៅនេះ បានចូលរួមផ្លាស់ប្តូរ និងការអភិវឌ្ឍន៍លើវិស័យសំខាន់ចំនួន៣ រួមមាន ជំរុញកំណើននៃទំហំពាណិជ្ជកម្មទ្វេភាគីរវាងចិន និងកម្ពុជា ការអភិវឌ្ឍន៍វិស័យទេសចរណ៍ និងការចូលរួមក្នុងកិច្ចកសាងហេដ្ឋារចនាសម្ព័ន្ធរបស់ប្រទេសកម្ពុជា។ នេះបើតាមការលើកឡើងពីស្ថានទូតចិនប្រចាំកម្ពុជាកាលពីឆ្នាំទៅ។ តំបន់សេដ្ឋកិច្ចពិសេសក្រុងព្រះសីហនុ ការរីកចម្រើនលើហេដ្ឋារចនាសម្ព័ន្ធកំពង់ផែសំខាន់របស់កម្ពុជា កំណើននៃទំហំពាណិជ្ជកម្មកម្ពុជា-ចិន។ល។ ត្រូវបានរដ្ឋាភិបាលកម្ពុជាមើលឃើញថា បានកើតចេញពីការអភិវឌ្ឍន៍ស្របតាមគោលគំនិត ខ្សែក្រវាត់និងផ្លូវ របស់ចិននេះ។
លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយយល់ឃើញថាការចូលរួមនៅក្នុងផែនការខ្សែក្រវាត់ និងផ្លូវរបស់ចិនគឺជាការល្អ ដោយជួយឲ្យទំនាក់ទំនងកម្ពុជា-ចិន ឈានដល់កំរិតខ្ពស់ និងគ្រប់ជ្រុងជ្រោយ។ ក៏ប៉ុន្តែលោកថា ទំហំពាណិជ្ជកម្ម កម្ពុជា-ចិន នៅមិនទាន់មានតុល្យភាពនៅឡើយ ដែលបញ្ហានេះធ្វើឲ្យផលប្រយោជន៍នៃគម្រោងផ្លូវ និងខ្សែក្រវាត់មិនបានទៅដល់ភាគីប្រតិបត្តិការដូចជាកម្ពុជា។
គិតត្រឹមចុងខែមិថុនា ឆ្នាំ២០២៣ មានប្រទេសចំនួន១៥២ និងអង្គការអន្តរជាតិចំនួន៣២ បានចុះហត្ថលេខាលើឯកសារសហប្រតិបត្តិការ ស្តីពីការរួមគ្នាកសាង «ខ្សែក្រវាត់និងផ្លូវ» ចំនួនជាង២០០ឯកសារជាមួយប្រទេសចិន ដែលបង្ហាញថាគំនិតផ្តួចផ្តើម «ខ្សែក្រវាត់ និងផ្លូវ» បានក្លាយជាវេទិកាសហប្រតិបត្តិការអន្តរជាតិដ៏ធំបំផុតនៅលើពិភពលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ