លោក ហ៊ុន ម៉ាណែត នឹងចូលរួមវេទិកាខ្សែក្រវាត់ និងផ្លូវរបស់ចិន ដើម្បីបញ្ជាក់ពីការគាំទ្ររបស់កម្ពុជា
លោកនាយករដ្ឋមន្ត្រី ហ៊ុន ម៉ាណែត នៅថ្ងៃអង្គារសប្តាហ៍ក្រោយនេះ នឹងហោះទៅប្រទេសចិនជាថ្មីម្តងទៀត ដើម្បីចូលរួមវេទិកាខ្សែក្រវាត់ និងផ្លូវលើកទី៣ ដែលនឹងត្រូវធ្វើឡើងនៅទីក្រុងប៉េកាំង។ បើតាមសេចក្តីប្រកាសព័ត៌មាន ដំណើររបស់លោកនាយករដ្ឋមន្ត្រី ហ៊ុន ម៉ាណែត ទៅប្រទេសចិន នាថ្ងៃអង្គារខាងមុខនេះ គឺលោក ហ៊ុន ម៉ាណែត នឹងមានជំនួបជាមួយប្រធានាធិបតីចិន លោក ស៊ី ជីនពីង រួមនឹងអ្នកមុខអ្នកការរបស់ចិន ដើម្បីជជែកពីកិច្ចសហប្រតិបត្តិការរវាងកម្ពុជានិងចិន។
ចុះផ្សាយនៅថ្ងៃ៖
ស្តាប់ - ០១:៥៣
សេចក្តីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា លោកនាយករដ្ឋមន្ត្រី ហ៊ុន ម៉ាណែត នឹងត្រូវចូលរួមវេទិកាខ្សែក្រវាត់ និងផ្លូវលើកទី៣ របស់ចិន នៅថ្ងៃទី១៧ និងថ្ងៃទី១៨តុលា ក្រោមមូលបទ «កិច្ចសហប្រតិបត្តិការខ្សែក្រវាត់និងផ្លូវ ប្រកបដោយគុណភាព៖ រួមគ្នាដើម្បីការអភិវឌ្ឍ និងវិបុលភាពរួម»។
នៅក្នុងវេទិកា ដែលធ្វើឡើងនៅទីក្រុងប៉េកាំងនោះ លោក ហ៊ុន ម៉ាណែត ក៏នឹងត្រូវឡើងថ្លែងសុន្ទរកថាដោយផ្ទាល់ អំពី សេដ្ឋកិច្ចឌីជីថលជាប្រភពកំណើនថ្មី មុនពេលដែលលោកជួបជាមួយលោក ស៊ី ជីនពីង និងឥស្សរជនបរទេសដទៃ ដើម្បីពិភាក្សាការងារ។
ក្រសួងការបរទេសកម្ពុជា បានឲ្យដឹងថា ការចូលរួមវេទិកាខ្សែក្រវាត់ និងផ្លូវលើកទី៣ របស់ចិន ពីសំណាក់លោកនាយករដ្ឋមន្ត្រី ហ៊ុន ម៉ាណែត លើកនេះ គឺដើម្បីបញ្ជាក់ជាថ្មីថា កម្ពុជាបានគាំទ្រចំពោះគំនិតផ្តួចផ្តើមខ្សែក្រវាត់និងផ្លូវ និងការសហការយ៉ាងជិតស្និទ្ធជាមួយចិន ដើម្បីជំរុញកិច្ចសហប្រតិបត្តិការខ្សែក្រវាត់ និងផ្លូវ ឲ្យកាន់តែរីកចម្រើន។
គួរកត់សម្គាល់ថា ដំណើរទៅប្រទេសចិនជាថ្មីនេះ គឺជាដំណើរលើកទី២ របស់លោក ហ៊ុន ម៉ាណែត ក្រោយបានឡើងកាន់តំណែងជានាយករដ្ឋមន្ត្រីកម្ពុជា ជិត២ខែមកនេះ។ កាលពីថ្ងៃទី១៤ខែកញ្ញា កន្លងទៅនេះ លោក ហ៊ុន ម៉ាណែត បានចេញទៅប្រទេសចិន ដោយជួបលោក ស៊ី ជីនពីង និងបានជជែកលើប្រធានបទមួយចំនួ នរួមមានការកសាងសហគមន៍វាសនារួមកម្ពុជា-ចិន ក្នុងយុគ្គសម័យថ្មី ការជំរុញបន្ថែមនូវកិច្ចសហប្រតិបត្តិការត្បូងពេជ្រ ទិសដៅយុទ្ធសាស្ត្រសម្រាប់ទំនាក់ទំនងកម្ពុជា-ចិន ព្រមទាំងកិច្ចការតំបន់ និងអន្តរជាតិ ដែលផ្តល់ប្រយោជន៍រួម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ