រដូវភ្ជុំ៖បក្សភ្លើងទៀនអំពាវនាវឲ្យដោះលែងសមាជិកដែលជាប់ឃុំ
គណបក្ស ភ្លើងទៀន អំពាវនាវឲ្យ ដោះលែងសមាជិកបក្សប្រឆាំង ដែលកំពុងជាប់ពន្ធនាគារ ដើម្បីឲ្យពួកគាត់មានសេរីភាពបានជួបជុំក្រុមគ្រួសារនាឱកាសបុណ្យភ្ជុំបិណ្ឌនេះ។ ការអំពាវនាវនេះធ្វើឡើងតាមរយៈថ្លែងការណ៍មួយនៅថ្ងៃអាទិត្យនេះ ដោយគណបក្សនេះបានប្រកាសស្វាគមន៍ទុកជាមុនចំពោះការដោះលែងអ្នកនយោបាយដែលកំពុងឃុំ។
ចុះផ្សាយនៅថ្ងៃ៖
សូមបញ្ជាក់ថា មានមន្រ្តីគណបក្សភ្លើងទៀន យ៉ាងតិច៤រូបត្រូវបានចាប់ខ្លួនក្នុងនោះមាន លោក លី រី សមាជិកគណកម្មាធិការនាយក និងលោក ប៊ុន ខេត ជាប្រធានស្តីទីប្រតិបត្តិ រាជធានីភ្នំពេញ នៃគណបក្សភ្លើងទៀន ត្រូវបានតុលាការចោទប្រកាន់ ពីបទ«ញុះញង់បង្កភាពវឹកវរធ្ងន់ធ្ងរ ដល់សន្ដិសុខសង្គម»។ ប៉ុន្តែលោក ប៊ុន ខេត បានចេញវីដេអូសុំទោស លោក ហ៊ុន សែន។ ចំណែក២រូបទៀត គឺអ្នកស្រី វង រុន្នី ប្រធានចលនាស្ត្រីថ្នាក់ជាតិគណបក្សភ្លើងទៀន និងលោក អេង ស្រូយ ប្រធានគណៈកម្មាធិការប្រតិបត្តិខេត្តត្បូងឃ្មុំក៏ត្រូវបានចាប់នៅកៀកនឹងការបោះឆ្នោត ២៣កក្កដា ខណៈអ្នកនយោបាយនៅក្រៅប្រទេសធ្វើយុទ្ធនាការគូសសន្លឹកឆ្នោតចោល។
ប៉ុន្តែក្រោយការបោះឆ្នោតរួច ការចាប់ខ្លួនសមាជិកបក្សប្រឆាំងនៅតែបន្តកើតមាននៅខេត្តបន្ទាយមានជ័យ ដែលមានជាង២០នាក់ត្រូវបានសមត្ថកិច្ចហៅទៅសួរនាំ ក្នុងនោះមាន៦នាក់ត្រូវបានឃុំខ្លួន។ ការចាប់ខ្លួននេះ ដោយចោទថា សមាជិកប្រឆាំងទាំងនោះ ប្រើឈ្មោះ លោក ស ខេង និងលោក ទៀ បាញ់ ទៅប្រមូលស្នាមមេដៃពីពលរដ្ឋដើម្បីបង្កើតគណបក្សនយោបាយ។
ដោយឡែក លោក ថាច់ សេដ្ឋាអនុប្រធានគណបក្សភ្លើងទៀន ត្រូវបានកាត់ទោសកាលពីថ្ងៃទី២១កញ្ញាដាក់ពន្ធនាគារ ១៨ខែ និងបង្គាប់ឲ្យសងសំណងជំងឺចិត្តទៅដើមបណ្តឹងជាង៣ម៉ឺនដុល្លារ ពីបទចេញបូលប្បទានបត្រគ្មានសាច់ប្រាក់។ ប៉ុន្តែមេធាវីការពារក្តីអះអាងថា ជាការកាត់ទោសដោយគ្មានភស្តុតាងគ្រប់គ្រាន់។
លោក ថាច់ សេដ្ឋា ក៏ត្រូវបានចោទប្រកាន់បន្ថែមពីបទញុះញង់បង្កឲ្យមានភាពវឹកវរក្នុងសង្គម និងបទញុះញង់ឲ្យមានការរើសអើងពូជសាសន៍ ទាក់ទងនឹងការថ្លែងរបស់លោកជាមួយពលករខ្មែរនៅកូរ៉េខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ