លោក ហ៊ុន ម៉ាណែត៖ កុំឲ្យយកគោទៅប្រៀបធៀបនឹងក្របី
ប្រមុខរដ្ឋាភិបាលកម្ពុជា បានចេញបកស្រាយចំពោះអ្វីដែលនាយករដ្ឋមន្ត្រីថ្មីរបស់កម្ពុជាបានធ្វើ និងនាយករដ្ឋមន្ត្រីថ្មីរបស់ថៃបានធ្វើ បន្ទាប់ពីរដ្ឋាភិបាលនៃប្រទេសជាប់របងគ្នានេះត្រូវបានបង្កើតឡើងដំណាលគ្នា។ បើតាម លោក ហ៊ុន ម៉ាណែត គឺមិនគេត្រូវយកគោទៅធ្វើការប្រៀបធៀបជាមួយនឹងក្របីនោះឡើយ។
ចុះផ្សាយនៅថ្ងៃ៖
ការលើកឡើងបែបនេះ គឺដោយសារតែអ្នកប្រើប្រាស់បណ្តាញសង្គមបានយករូបភាពដែលនាយករដ្ឋមន្ត្រីថៃបានជួបតាមអនឡាញជាមួយមហាសេដ្ឋីElon Musk ដែលមានក្រុមហ៊ុនយក្សក្នុងដៃ ដើម្បីមករកស៊ីនៅប្រទេសថៃក្នុងទឹកប្រាក់រាប់ពាន់លានដុល្លារ។ ប៉ុន្តែពីខាងនាយករដ្ឋមន្ត្រីកម្ពុជាវិញ ក្នុងពេលទៅប្រជុំអង្គការសហប្រជាជាតិដែរនោះ គឺមិនឃើញមានជំនួបជាមួយមហាសេដ្ឋីណាម្នាក់របស់អាមេរិកឡើយ ពោលគឺទៅជួបពលរដ្ឋខ្មែរជាង២៥០០នាក់ ដែលគេអះអាងថា ជាការចំណាយលុយខ្ជះខ្ជាយ។
ប៉ុន្តែនៅក្នុងពេលជួបកម្មករនៅព្រឹកថ្ងៃអង្គារនេះ លោក ហ៊ុន ម៉ាណែត បានអះអាងថា លោកបានធ្វើការទូតសេដ្ឋកិច្ចជាច្រើន តែអ្នករិះគន់លោកបែរជាធ្វើជាមើលមិនឃើញទៅវិញ ហើយតែងតែចូលចិត្តធ្វើការបង្អាប់។
បើតាមប្រមុខរដ្ឋាភិបាលដែលទើបកាន់អំណាចបាន៤២ថ្ងៃរូបនេះ គឺលោកបានជួបក្រុមហ៊ុនអាមេរិកចំនួន៥៨ នៅពេលចូលរួមវេទិកាធុរកិច្ចនៅអាមេរិកកាលពីចុងខែកញ្ញា។ ក្រុមហ៊ុនធំៗដែលលោក ហ៊ុន ម៉ាណែត អះអាងថាបានជួបជារួមដើម្បី«ទាក់ម៉ួយ»ឲ្យមកវិនិយោគនៅកម្ពុជារួមមានក្រុមហ៊ុនយន្តហោះ ប៊ូអ៊ីង ក្រុមហ៊ុនផលិតឱសថ Pfizer ក្រុមហ៊ុនVisa, Master Card, ក្រុមហ៊ុនប្រេងCheviron ជាដើម។ ប៉ុន្តែលោកទទួលស្គាល់ថា លោកបានជួបដាច់ដោយឡែកតែជាមួយក្រុមហ៊ុន Pfizer មួយប៉ុណ្ណោះ ដោយសារតែគ្មានពេលគ្រប់គ្រាន់។
លោក ហ៊ុន ម៉ាណែត រំពឹងថា ក្រោយពីជំនួបជាមួយក្រុមហ៊ុនយក្សមួយចំនួនរបស់សហរដ្ឋអាមេរិក កាលពីចុងខែមុននេះ នៅប៉ុន្មានខែខាងមុខទៀត ក្រុមហ៊ុនមួយចំនួននឹងមកពិនិត្យលទ្ធភាពវិនិយោគនៅកម្ពុជា ខណៈដែលក្នុងជំនួបនោះក៏មានក្រុមហ៊ុនខ្មែរប្រមាណ៣០ បានចូលរួមផងដែរ។
សូមបញ្ជាក់ថា ការចេញបកស្រាយរបស់លោកនាយករដ្ឋមន្ត្រី ហ៊ុន ម៉ាណែត នៅពេលនេះ គឺបន្ទាប់ពីក្រុមអ្នកវិភាគនៅសហរដ្ឋអាមេរិកបានរិះគនមិនសំចៃមាត់ថា ប្រមុខរដ្ឋាភិបាលកម្ពុជារូបនេះ បានចំណាយពេលនិងចំណាយលុយទៅជួបក្រុមមនុស្សមួយចំនួននៅក្រៅប្រទេសដែលគេហៅថា«ពួកកន្ថោ» ខណៈដែលនាយករដ្ឋមន្ត្រីថៃបានជួបមហាសេដ្ឋីElon Musk ដោយគ្រោងដាក់ទុនវិនិយោគរាប់ពាន់លានដុល្លារនៅប្រទេសថៃ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ