អគ្គនាយកដ្ឋានពន្ធនាគារគ្រោងចុះបង្ក្រាបការប្រើប្រាស់គ្រឿងញៀនក្នុងពន្ធនាគារទូទាំងប្រទេស
អគ្គនាយកដ្ឋានពន្ធនាគារនៃក្រសួងមហាផ្ទៃនៅថ្ងៃពុធម្សិលមិញនេះ បានប្រកាសបើកប្រតិបត្តិការចុះបង្ក្រាបការប្រើប្រាស់គ្រឿងញៀនក្នុងពន្ធនាគារ នៅទូទាំងប្រទេសនៅក្នុងពេលដ៏ឆាប់ខាងមុខ ដោយគ្មានការឱ្យដំណឹងជាមុន។ នេះគឺជាប្រតិបត្តិការរឹតបន្តឹងបញ្ហាគ្រឿងញៀននៅក្នុងពន្ធនាគារជាលើកទី១ ដែលរាប់បញ្ចូលទាំងមន្ត្រីផង និងដែលចាប់ផ្តើមក្នុងអាណត្តិរដ្ឋមន្ត្រីក្រសួងមហាផ្ទៃថ្មី គឺលោក ស សុខា។
ចុះផ្សាយនៅថ្ងៃ៖
អគ្គនាយកដ្ឋានពន្ធនាគារនៃក្រសួងមហាផ្ទៃនៅថ្ងៃទី២៨ ខែកញ្ញាម្សិលមិញនេះ បានប្រកាសបើកប្រតិបត្តិការចុះបង្ក្រាបការប្រើប្រាស់គ្រឿងញៀនក្នុងពន្ធនាគារនៅទូទាំងប្រទេសនៅក្នុងពេលដ៏ឆាប់ខាងមុខ ដោយគ្មានការឱ្យដំណឹងជាមុន។ ជាការចុះបង្ក្រាបផ្ទាល់ដោយអគ្គនាយកដ្ឋានពន្ធនាគារ សហការជាមួយមន្ត្រីពេទ្យពន្ធនាគារ តាមរយៈការធ្វើតេស្តទឹកនោមរកសារធាតុញៀន ទៅលើមន្ត្រីពន្ធនាគារជាទូទៅ និងជនជាប់ឃុំដែលមានការសង្ស័យប្រើប្រាស់គ្រឿងញៀន។
បើតាមសេចក្តីណែនាំរបស់ក្រសួងមហាផ្ទៃ ចំណាត់ការនេះធ្វើឡើង ដើម្បីធានាប្រសិទ្ធិភាពការអនុវត្តការងាររបស់មន្ត្រីពន្ធនាគារនៅតាមមណ្ឌលអប់រំកែប្រែ និងពន្ធនាគាររាជធានី-ខេត្ត ឱ្យកាន់តែមានប្រសិទ្ធភាព និងឱ្យទទួលបានការជឿទុកចិត្តពីមជ្ឈដ្ឋានទូទៅ។ ហើយ ប្រសិនបើមន្ត្រីពន្ធនាគារណា មានចេទនាគេចវេស មិនចូលរួមសហការធ្វើតេស្ត ឬ រកឃើញថាមានសារធាតុញៀន អគ្គនាយកដ្ឋានពន្ធនាគារនឹងស្នើសុំគោលការណ៍សម្រេចពីក្រសួងដើម្បីអនុវត្តវិធានការរដ្ឋបាលនានា និងវិធានការផ្លូវច្បាប់ជាធរមាន។
នេះគឺជាប្រតិបត្តិការរឹតបន្តឹងបញ្ហាគ្រឿងញៀនជាលើកទី១នៅក្នុងពន្ធនាគារដែលរាប់បញ្ចូលទាំងមន្ត្រីផង និងដែលចាប់ផ្តើមក្នុងអាណត្តិរដ្ឋមន្ត្រីក្រសួងមហាផ្ទៃថ្មី គឺលោក ស សុខា។
គួរជម្រាបជូនថា ប្រតិបត្តិការនេះចេញជារូបរាងនៅក្រោយលោក ស សុខា រដ្ឋមន្ត្រីក្រសួងមហាផ្ទៃថ្មី កាលពីដើមខែកញ្ញាកន្លងទៅនេះ បានព្រមានដកមន្ត្រីណាដែលជាប់ពាក់ព័ន្ធនឹងគ្រឿងញៀន និងលុបបំបាត់វប្បធម៌អន្តរាគមន៍មន្ត្រី។
លោក សន ជ័យ នាយកអង្គការសម្ព័ន្ធគណនេយ្យភាពសង្គមកម្ពុជាយល់ថា វិធានការបង្ក្រាបការប្រើប្រាស់គ្រឿងញៀនក្នុងពន្ធនាគារទូទាំងប្រទេសនេះអាចជារឿងវិជ្ជមាន ក្នុងការស្តារទំនុកចិត្តរបស់ពលរដ្ឋចំពោះការអនុវត្តការងាររបស់មន្ត្រីមានសមត្ថកិច្ច ខណៈកន្លងមកមានរឿងអាស្រូវជាច្រើន ថាមានមន្ត្រីរាជការ កងកម្លាំងប្រដាប់អាវុធមួយចំនួន ជាប់ពាក់ព័ន្ធនឹងការប្រើប្រាស់-ជួញដូរគ្រឿងញៀន ដោយឥតញញើត។
ចំពោះអ្នកឃ្លាំមើលរូបនេះ វិធានការនេះអាចមានប្រសិទ្ធភាពកម្រិតណានោះអាស្រ័យទៅលើការអនុវត្តជាក់ស្តែង និងថាតើវិធានការនេះអាចធ្វើទៅបានដូចជាការអះអាងថាគ្មានការជូនដំណឹងនោះឬក៏អត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ