កំពស់ទឹកខេត្តកំពង់ធំជិតដល់ចំណុចប្រកាសអាសន្ន ខណៈឧត្តុនិយមថានឹងមានភ្លៀងបន្ត
កំពស់ទឹកនៅក្នុងខេត្តកំពង់ធំបានឆ្លងផុតពីកំរិតឲ្យមានការប្រុងប្រយ័ត្ន និងឈានជិតដល់កំរិតប្រកាសអាសន្ន ខណៈខេត្តផ្សេងៗទៀត ដូចជាខេត្តព្រះវិហារ ក្រចេះ ត្បូងឃ្មុំជាដើម ក៏បានរងនូវទឹកជំនន់ដែរ តែមិនមានសភាពធ្ងន់ធ្ងរនៅឡើយ។ ទោះយ៉ាងណាស្ថានភាពទឹកជំនន់នៅតាមបណ្តាខេត្តទាំងនេះ គឺអាស្រ័យលើស្ថានភាពអាកាសធាតុផងដែរ ថាតើមានភ្លៀងធ្លាក់ឬយ៉ាងណា។ ក៏ប៉ុន្តែតាមការព្យាករណ៍អាកាសធាតុរបស់ក្រសួងធនធានទឹកកាលពីថ្ងៃទី២៤ ខែកញ្ញា កន្លងទៅបានជូនដំណឹងពីប្រព័ន្ធសម្ពាធទាបមួយអូសកាត់ប្រទេសកម្ពុជា ជាហេតុធ្វើឲ្យភ្លៀងបន្តធ្លាក់នៅតំបន់ខ្ពង់រាបភាគឦសាន ខ្ពង់រាបភាគខាងជើង និងតំបន់ទំនាបកណ្តាលភាគពាយ័ព្យចាប់ពីថ្ងៃទី២៦ ដល់ ២៨ខែកញ្ញានេះ។ ក៏ប៉ុន្តែលោក សុទ្ធ គីមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានប្រាប់វិទ្យុបារាំង RFI នៅថ្ងៃនេះថា ទឹកជំនន់នៅមិនទាន់គម្រាមកំហែងអ្វីធ្ងន់ធ្ងរនោះទេ។ លោកថា អង្គភាពគ្រប់គ្រងគ្រោះមហន្តរាយគ្រប់ជាន់ថ្នាក់បានត្រៀមលក្ខណៈរួចហើយ ដើម្បីឆ្លើយតបទៅនឹងសភាពការគ្រោះធម្មជាតិជាយថាហេតុ។
ចុះផ្សាយនៅថ្ងៃ៖
ស្តាប់ - ០១:៤៨
