អង្កេតរយៈពេលខ្លី៖ការជួញដូរសាច់សត្វព្រៃកំពុងតែកើតមាននៅជុំវិញតំបន់ព្រៃឡង់
របាយការណ៍អង្កេតលើកទី១របស់សមាគមបណ្ដាញយុវជនកម្ពុជារកឃើញថា ការជួញដូរសាច់សត្វព្រៃកំពុងតែកើតមាននៅជុំវិញតំបន់ព្រៃឡង់នៃប្រទេសកម្ពុជា បន្ទាប់ពីបណ្ដាញមួយនេះ ចំណាយពេលចុះទៅស្រាវជ្រាវលើកដំបូងរយៈពេលបីខែចាប់ពីថ្ងៃទី២៥ ខែមិថុនា ដល់ថ្ងៃទី២៥ ខែសីហា ឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០៣:១៥
នៅក្នុងការស្រាវជ្រាវនោះសមាគមបណ្ដាញយុវជនកម្ពុជារកឃើញសំណាកនិងទីតាំងដាក់លក់សាច់សត្វព្រៃ និងត្រីអភិរក្សដោយខុសច្បាប់ចំនួន៥៧សំណាក\ទីតាំង នៅជុំវិញតំបន់ការពារធនធានធម្មជាតិនៅភាគខាងជើង និងឦសាននៃប្រទេសកម្ពុជា។ គេរកឃើញទីតាំងទាំងនេះ តាមរយៈការធ្វើដំណើរចុះប្រមូលទិន្នន័យ៦លើកដោយចៃដន្យ នៅតំបន់ទេសចរណ៍ តាមភោជនីយដ្ឋានដែលបានដាក់លក់និងជួញដូរប្រភេទសត្វព្រៃ សាច់សត្វព្រៃ និងត្រីអភិរក្សនៅក្នុងខេត្តក្រចេះ ស្ទឹងត្រែង ព្រះវិហារ កំពង់ធំ សៀមរាប និងឧត្តរមានជ័យ។
ក្នុងចំណោមភស្តុតាងចំនួន៥៧សំណាក\ទីតាំងគឺទិន្នន័យសាច់សត្វព្រៃមានចំនួន៣៤សំណាក ទីតាំងភោជនីយដ្ឋានចំនួន១១ និងរមណីយដ្ឋានចំនួន ២កន្លែងដែលមានដាក់លក់សាច់សត្វព្រៃ។ ចំណែកប្រភេទត្រីអភិរក្សត្រូវបានរកឃើញចំនួន ៥ប្រភេទ មានចំនួន១២ក្បាល ភាគច្រើនស្ថិតនៅក្នុងខេត្តតាមបណ្តោយដងទន្លេមេគង្គ គឺខេត្តស្ទឹងត្រែង និងខេត្តក្រចេះ។ ផ្អែកតាមតួលេខខាងលើគេបានប្រទះឃើញប្រភេទសាច់សត្វកម្រដាក់លក់ដូចជាៈ សត្វទន្សោង ប្រើស ខ្លាឃ្មុំ និងកែះ ត្រីត្រសក់ ត្រីខ្លា និងត្រីក្របីជាដើម។
ក្រោយរកឃើញរបាយការណ៍អង្កេតបឋម សមាគមបណ្ដាញយុវជនកម្ពុជា បានបង្ហាញក្ដីព្រួយបារម្ភជុំវិញការជួញដូរសត្វព្រៃយ៉ាងអនាធិបតេយ្យ តាមរយៈសន្និសីទសារព័ត៌មាននៅថ្ងៃទី១៥ខែកញ្ញាឆ្នាំ២០២៣។ លោក ហេង គឹមហុង ប្រធានផ្នែកកម្មវិធីស្រាវជ្រាវនិងតស៊ូមតិនៃសមាគមបណ្ដាញយុវជនកម្ពុជាបានថ្លែងប្រាប់វិទ្យុបារាំងអន្តរជាតិនៅថ្ងៃទី១៦ខែកញ្ញាឆ្នាំ២០២៣ថា បន្ទាប់ពីចេញផ្សាយលទ្ធផលអង្កេតនេះហើយលោកចាំមើលចំណាត់ការពីភាគីពាក់ព័ន្ធបន្តទៀត ហើយប្រសិនបើគ្មានចំណាត់ការពីភាគីពាក់ព័ន្ធទេសមាគមបណ្ដាញយុវជនកម្ពុជានឹងចុះស្រាវជ្រាវបន្តទៀត។ បើតាមលោក ហេង គឹមហុង របកគំហើញនេះបង្ហាញពីតម្រូវការបង្កើនកិច្ចខិតខំប្រឹងប្រែងឆ្ពោះទៅរកការអភិរក្សប្រភេទសត្វកម្រទាំងនេះ។
ជុំវិញការចេញផ្សាយរបាយការណ៍នេះ គេមិនទាន់ឃើញមានការឆ្លើយតបពីក្រសួងបរិស្ថាននិងក្រសួងកសិកម្មនៅឡើយទេ។ ប៉ុន្តែនៅក្នុងរបាយការណ៍ដោយឡែករបស់ក្រសួងបរិស្ថានតាមរយៈយុទ្ធនាការអន្ទាក់សូន្យគឺអន្ទាក់ចំនួន ១៤.៣២៥ ត្រូវបានដោះចេញពីតំបន់ការពារធម្មជាតិក្នុងឆមាសទី១ ឆ្នាំ២០២៣នេះ។ រីឯឆ្នាំ២០២២ អន្ទាក់សរុបប្រមាណជាង ៣៤.០០០ ត្រូវបានដកចេញពីតំបន់ការពារធម្មជាតិក្នុងប្រទេសកម្ពុជា។ តួលេខបង្ហាញពីការថយចុះនៃអត្រាអន្ទាក់ក្នុងព្រៃប្រមាណ៤៤% បើធៀបនឹងលទ្ធផលនៃការដោះអន្ទាក់ក្នុងឆ្នាំ២០២១ ដែលចំនួនអន្ទាក់ប្រមូលបានសរុបមានចំនួនដល់ទៅ ៦១.៦១១អន្ទាក់។ នេះបើតាមក្រសួងបរិស្ថាននាពេលថ្មីៗនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ