ព្រះអង្គម្ចាស់ ធម្មិកោ៖ ការផ្តល់គោរមងារ«សម្តេច» ពេលវត្តមានព្រះមហាក្សត្រមិនគួរឲ្យភ្ញាក់ផ្អើលទេ
ព្រះអង្គម្ចាស់ ស៊ីសុវត្ថិ ធម្មិកោ បានបញ្ចេញទស្សនៈយល់ឃើញថា ការផ្តល់គោរមងារសម្តេច ដល់លោកនាយករដ្ឋមន្ត្រី ហ៊ុន ម៉ាណែត នៅពេលអវត្តមានព្រះមហាក្សត្រមិនគួរឲ្យភ្ញាក់ផ្អើលឡើយ។ ប៉ុន្តែអ្វីដែលអតីតព្រះលេខាផ្ទាល់របស់ព្រះបរមរតនកោដ្ឋិភ្ញាក់ផ្អើលនោះ គឺក្នុងសម័យនេះមានសម្តេចច្រើនរូបដែលមិនមែនជាខ្សែរាជវង្ស។
ចុះផ្សាយនៅថ្ងៃ៖
ស្តាប់ - ០២:២៧
បើតាមព្រះអង្គម្ចាស់ ធម្មិកោ គឺព្រះមហាក្សត្រទ្រង់ផ្តល់គោរមងារដល់ឥស្សរជនណាមួយក៏បាន ទោះជាព្រះអង្គមិនគង្គនៅកម្ពុជាពីព្រោះការចរាចរណ៍លិខិតនានា អាចធ្វើទៅបានរៀងរាល់ថ្ងៃពីភ្នំពេញ-ប៉េកាំង តាមជើងយន្តហោះ។
ការពន្យល់បែបនេះរបស់ព្រះអង្គម្ចាស់ ធម្មិកោ គឺបន្ទាប់ពីមានការលើកឡើងរបស់អ្នកនយោបាយប្រឆាំងមួយចំនួន សង្ស័យថា ពីការផ្តល់គោរមងារជាសម្តេចដល់លោក ហ៊ុន ម៉ាណែត ខណៈព្រះរាជក្រឹត្យនោះមានឡាយព្រះហសត្តលេខារបស់ព្រះមហាក្សត្រ។ ព្រះមហាក្សត្រកម្ពុជាដែលបានយាងទៅទីក្រុងប៉េកាំងប៉ុន្មានថ្ងៃមុនពេលចេញព្រះរាជក្រឹត្យនេះ ដែលតាមទម្លាប់គឺការតែងតាំងឬផ្តល់គោរមងារណាមួយក្នុងពេលអវត្តមានព្រះមហាក្សត្រគឺជាតួនាទីរបស់ប្រមុខរដ្ឋស្តីទី គឺលោក សាយ ឈុំ។
ការផ្តល់គោរមងារជាសម្តេច បន្ថែមទៀតនេះ គឺធ្វើឲ្យឥស្សរជនដែលមានងារជាសម្តេចកើនឡើងដល់១០រូប។ ការណ៍នេះបានធ្វើឲ្យ ភ្ញាក់ផ្អើលដល់ព្រះអង្គម្ចាស់ធម្មិកោ ពីព្រោះតែកាលពីសម័យសម្តេចព្រះនរោត្តមនៅជាប្រមុខរដ្ឋគ្រងរាជ គឺក្នុងជួរថ្នាក់នាំស្ថាប័នជាតិ មានគោរមងារជាសម្តេចគឺតែ៣រូបប៉ុណ្ណោះ គឺសម្តេច ចៅហ្វីវាំង ប៉ែន នុត សម្តេច ចក្រី ញឹក ជូឡុង និងសម្តេច ចៅសែន កុសល។ ការផ្តល់គោរមងារដល់ឥស្សជនណាពេលនោះ ជាសម្តេច គឺដោយផ្អែកលើស្នាដៃដែលបានបម្រើកម្ពុជាយូរឆ្នាំ។ នេះបើតាមព្រះអង្គម្ចាស់ ធម្មិកោ។
ទោះជាយ៉ាងណា ការផ្តល់គោរមងារជាសម្តេចដល់លោក ហ៊ុន ម៉ាណែត និងលោកស្រី ឃួន សុដារី នៅពេលនេះត្រូវបានបញ្ជាក់ក្នុងព្រះរាជក្រឹត្យដំណាលគ្នាមួយនៅថ្ងៃទី២កញ្ញាបង្គាប់ថា ថ្នាក់ដឹកនាំស្ថាប័នព្រឹទ្ធសភា រដ្ឋសភា និងរដ្ឋាភិបាល ត្រូវមានងារជាសម្តេច។ ត្រង់នេះ ព្រះអង្គម្ចាស់ ធម្មិកោ បង្ហាញការងឿងឆ្ងល់ថា ប្រសិនបើមានការផ្លាស់ប្តូរក្បាលម៉ាស៊ីនដឹកនាំស្ថាប័នទាំង៣នេះ នោះអ្នកដែលត្រូវឡើងមកជំនួសគឺចាំបាច់ត្រូវមានងារជាសម្តេចដែរឬយ៉ាងណា?៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ