ខួប៦ឆ្នាំនៃការចាប់ខ្លួន៖ មេធាវី និងអ្នកគាំទ្រលោក កឹម សុខា អំពាវនាវឲ្យផ្សះផ្សាជាតិ
មេធាវីដែលធ្លាប់ការពារក្តីឲ្យលោក កឹម សុខា និងអតីតតំណាងរាស្ត្រដែលនៅបង្ហាញការគាំទ្រអតីតប្រធានគណបក្សជំទាស់រូបនេះ នាំគ្នារំឭកខួប៦ឆ្នាំ និងបង្ហាញពីភាពអយុត្តិធម៌នៃការចាប់ខ្លួនទាំងពាក់កណ្តាលយប់ ហើយអំពាវនាវឲ្យផ្សះផ្សាជាតិ។ រីឯនៅក្នុងជំនួបរវាងមន្ត្រីជាន់ខ្ពស់អាមេរិកជាមួយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃចន្ទ ស្ថានទូតអាមេរិកប្រចាំកម្ពុជា គូសបញ្ជាក់ថា ភាគីអាមេរិកបានស្នើចំពោះមុខឲ្យដោះលែង លោក កឹម សុខា និងបើកលំហរប្រជាធិបតេយ្យឡើងវិញ។
ចុះផ្សាយនៅថ្ងៃ៖
ស្តាប់ - ០១:៥៩
លោក ចាន់ ចេន ជាមេធាវីម្នាក់ បានគូសបញ្ជាក់តាមហ្វេសប៊ុកថា ការចាប់ខ្លួនលោក កឹម សុខា នៅយប់ទី៣កញ្ញា គឺបំពានច្បាប់ បំពានរដ្ឋធម្មនុញ្ញ និងរំលោភបំពានអភ័យឯកសិទ្ធិសភា។ លោកថាគេចោទថាលោក កឹម សុខា កំពុងប្រព្រឹត្តបទល្មើសជាក់ស្តែង ខណៈគាត់កំពុងសម្រាកសម្រាន្តលង់លក់ក្នុងគេហដ្ឋានរបស់គាត់នូវពាក់កណ្តាលអធ្រាត្រ។
បើតាមមេធាវីរូបនេះ ពេលចូលចាប់ខ្លួននោះ គឺមិនមានភស្តុតាង សាក្សី ឬឯកសារ កិច្ចសន្យាស្តីអំពីការ ត្រូវរូវជាមួយបរទេសណាមួយឡើយ ហើយថាតាំងពីថ្ងៃនោះមក លទ្ធិប្រជាធិបតេយ្យនៅប្រទេសកម្ពុជា ត្រូវបានសម្លាប់។
បន្ថែមពីនេះ ដោយរំឭកខួប៦ឆ្នាំនៃការចាប់ខ្លួនលោក កឹម សុខា នោះ លោក សួន សូរីដា អតីតតំណាងរាស្ត្របក្សប្រឆាំងនៅតែសង្ឃឹមថា ខ្មែរអាចផ្សះផ្សារជាតិបាន។
សូមបញ្ជាក់ថា លោក កឹម សុខា ត្រូវបានតុលាការក្រុងភ្នំពេញកាត់ទោសដោយឃុំខ្លួនក្នុងផ្ទះ២៧ឆ្នាំ ក្រោមការចោទថា ឃុបឃិតជាមួយបរទេសផ្តួលរំលំរដ្ឋាភិបាលរបស់លោក ហ៊ុន សែន។ ប៉ុន្តែលោក កឹម សុខា បានបដិសេធតាំងពីដើមទីចំពោះការចោទប្រកាន់នេះ ហើយបានពឹងមេធាវីឲ្យប្តឹងទាស់ទៅកាន់សាលាឧទ្ធរណ៍ នៅចុងខែមីនា២០២៣។ ប៉ុន្តែមកដល់ពេលនេះនៅមិនទាន់ដឹងសំណុំរឿងនេះមានការវិវត្តន៍ដល់ណាហើយទេ ខណៈសំណុំរឿងនេះហាក់បានស្ងប់ស្ងាត់តាំងពីមុនពេលបោះឆ្នោត។
នៅក្នុងជំនួបរវាងមន្ត្រីជាន់ខ្ពស់អាមេរិកជាមួយលោកនាយករដ្ឋមន្ត្រី ហ៊ុន ម៉ាណែត កាលពីថ្ងៃចន្ទ ស្ថានទូតអាមេរិកប្រចាំកម្ពុជា គូសបញ្ជាក់ថា ភាគីអាមេរិកបានស្នើចំពោះមុខឲ្យដោះលែង លោក កឹម សុខា និងកញ្ញា សេង ធារី បើកឡើងវិញនូវលំហពលរដ្ឋ និងប្រព័ន្ធផ្សព្វផ្សាយឯករាជ្យ និងការគោរពសិទ្ធិមនុស្ស ដោយធានាថាប្រជាជនទាំងអស់អាចចូលរួមបាន ដោយសេរីក្នុងដំណើរការនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ