លោក ហ៊ុន សែន រំលឹកពីការតែងតាំងមន្ត្រី និងស្នើឲ្យមានគុណធម៌សម្រាប់មន្ត្រីដែលប្រឹងប្រែងកន្លងមក
អតីតនាយករដ្ឋមន្ត្រី លោក ហ៊ុន សែន នៅថ្ងៃពុធនេះ បានបង្ហោះវីដេអូឃ្លីបតាមបណ្តាញទំនាក់ទំនងសង្គមតេឡេក្រាមរបស់លោក កាលពីលោកបើកអង្គប្រជុំមួយនៅដើមអាណត្តិទី៦ កន្លងទៅ ដែលមានខ្លឹមសាររំលឹកដល់អ្នកបន្តវេនចំពោះការរៀបចំមន្ត្រីនៅក្នុងអាណត្តិរដ្ឋាភិបាលថ្មី។ ការចេញមករំលឹករបស់អតីតប្រមុខរដ្ឋាភិបាលដូច្នេះ បានធ្វើឡើងស្របពេលដែលរដ្ឋាភិបាលថ្មីដឹកនាំដោយលោក ហ៊ុន ម៉ាណែត កំពុងចេញដំណើរប្រកបដោយការរិះគន់ពីសមាសភាពដឹកនាំច្រើនលើសលប់នូវក្បាលម៉ាស៊ីនដឹកនាំផ្នែកខាងលើ។
ចុះផ្សាយនៅថ្ងៃ៖
ស្តាប់ - ០២:៣៨
អមជាមួយនឹងឃ្លីបវីដេអូជាង៦នាទី អតីតនាយករដ្ឋមន្ត្រីលោក ហ៊ុន សែន បានសរសេរបន្ថែមថាលោកបង្ហោះសារ ដែលលោកនិយាយក្នុងអង្គប្រជុំដើមអាណត្តិទី៦ ឆ្នាំ២០១៨ គឺដើម្បីជាការរំលឹកដល់មន្ត្រីបន្តវេនតាមស្ថាប័ន សូមមានការប្រុងប្រយត្ឋ័លើភាពអគុណធម៌សម្រាប់ការរៀបចំមន្ត្រីក្នុងអាណត្តិថ្មីបន្ថែមលើបណ្តាំរបស់លោក កាលពីល្ងាចថ្ងៃទី១០ ខែសីហា ឆ្នាំ២០២៣ ពេលជួបជុំមុនពេលគណៈរដ្ឋមន្ត្រីថ្មីត្រូវបានរៀបចំ។ លោក ហ៊ុន សែន ថាលោកគាំទ្រការកែទម្រង់ តែមិនគាំទ្រការរៀបចំណា ដែលខ្វះការឲ្យតម្លៃសម្រាប់មនុស្សដែលខំធ្វើការរយៈពេលកន្លងមក ហើយត្រូវបានដកចេញដោយគ្មានមូលហេតុ។
បន្ថែមពីនេះ អតីតនាយករដ្ឋមន្ត្រីបញ្ជាក់ថា ការធ្វើនយោបាយបើសិនជាគា្រន់តែធ្វើដើម្បីដោះដូរមនុស្ស ហើយដែលហៅថាកែទម្រង់ត្រឹមការដោះដូរមនុស្ស គណបក្សនយោបាយមួយនោះនឹងស្លាប់ ហើយមេដឹកនាំមួយនោះនឹងស្លាប់ដោយឯកោបំផុត។ នេះបើតាមឃ្លីបវីដេអូ។ លោកថាជោគជ័យរបស់លោកគឺចាប់ផ្តើមពីមនុស្ស៥នាក់ រហូតដល់មានមនុស្សរាប់លាននាក់មកនៅជាមួយលោកបានទាំងអស់តាមរៀបរក្សាចាស់បង្កើនថ្មី។
លោកបន្តចង្អុលបង្ហាញថាជោគជ័យរបស់គណបក្សកាន់អំណាចដែលប្រជាជនបោះឆ្នោតគាំទ្រភ្លូកទឹកភ្លូកដី គឺបានមកពីការខិតខំរបស់រាជរដ្ឋាភិបាលទាំងមូលគ្រាន់តែគេផ្តោតមកលើរូបលោកប៉ុណ្ណោះ។
ទាក់ទងទៅនឹងសាររំលឹករបស់លោក ហ៊ុន សែន នៅអំឡុងពេលនៃការតែងតាំងមន្ត្រីពេលនេះ លោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃរាជបណ្ឌិតសភាកម្ពុជានៅមិនទាន់ដឹងថាតើមានបាតុភាពយ៉ាងណានៅឡើយទេក្នុងការតែងតាំងមន្ត្រីសម្រាប់ការបំរើការងារអាណត្តិថ្មី។ ក៏ប៉ុន្តែលោកបណ្ឌិតមើលឃើញថាការរំលឹករបស់អតីតនាយករដ្ឋមន្ត្រី គឺជាការរំលឹកដើម្បីធានានូវនិរន្តរភាព និងភាពសុខដុមរម្យនានៃរដ្ឋបាលរបស់រដ្ឋ និងអ្នករាជការ ព្រមទាំងដើម្បីឲ្យពលរដ្ឋម្ចាស់ឆ្នោតទទួលយកដោយភាពកក់ក្តៅ។
សូមរំលឹកថា ការតែងតាំងសមាជិករដ្ឋាភិបាលអាណត្តិថ្មី មន្ត្រីជាន់ខ្ពស់តាមក្រសួង ស្ថាប័ននានារបស់រដ្ឋ រួមនឹងទីប្រឹក្សាសរុបចូលគ្នារាប់ពាន់នាក់ បានរងនូវការរិះគន់យ៉ាងកក្រើកពីសំណាក់មហាជន ថាជារដ្ឋាភិបាលក្បាលធំ គ្មានប្រសិទ្ធភាព ដែលធ្វើឲ្យរាស្ត្រជាអ្នកបង់ពន្ធមានបន្ទុកធ្ងន់ធ្ងរ។ ក៏ប៉ុន្តែមន្ត្រីរដ្ឋាភិបាលថ្មី បានថ្លែងច្រានចោលការរិះគន់នេះ។ ទោះយ៉ាងណាសមត្ថភាព លទ្ធផល និងគុណភាព ត្រូវគេរង់ចាំមើលនៅដំណាក់កាលមួយចំនួននាពេលខាងមុខ ក្នុងរយៈពេល១០០ថ្ងៃដំបូង ពាក់កណ្តាលអាណត្តិ និងចុងបញ្ចប់នៃអាណត្តិទី៧នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ