សកម្មជនប្រឆំាំងគ្រោងធ្វើបាតុកម្មនៅមុខបុរីញូវយ៉ក ស្នើឲ្យ UN កុំទទួលស្គាល់លោក ហ៊ុន ម៉ាណែត
សកម្មជន និងអ្នកនយោបាយប្រឆាំងបានចាប់ផ្តើមអំពាវនាវឲ្យពលរដ្ឋខ្មែរ ដែលរស់នៅក្រៅប្រទេសជាពិសេសនៅសហរដ្ឋអាមេរិក ឲ្យចូលរួមធ្វើបាតុកម្មប្រឆាំងនឹងវត្តមានរបស់លោកនាយករដ្ឋមន្ត្រី ហ៊ុន ម៉ាណែត ដែលទៅចូលរួមមហាសន្និបាតអង្គការសហប្រជាជាតិ(UN)លើកទី៧៨ នៅអំឡុងខែកញ្ញា ឆ្នាំ២០២៣ខាងមុខ។ ជាបាតុកម្មដែលស្នើឲ្យអង្គការសហប្រជាជាតិ កុំទទួលស្គាល់លោក ហ៊ុន ម៉ាណែត ជាតំណាងស្របច្បាប់របស់ប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:១០
តាមរយៈបណ្តាញសង្គមហ្វេសប៊ុក សកម្មជន និងអ្នកនយោបាយប្រឆាំងបានចាប់ផ្តើមផ្សព្វផ្សាយជាបណ្តើរៗហើយ ពីគម្រោងធ្វើបាតុកម្មប្រឆាំងនឹងលោកនាយករដ្ឋមន្ត្រី ហ៊ុន ម៉ាណែត ដោយមានការអំពាវនាវឲ្យពលរដ្ឋខ្មែរនៅឯនាយសមុទ្រចូលរួមឲ្យបានច្រើននៅថ្ងៃទី២២ ខែកញ្ញា ខាងមុខ។
នៅក្នុងលិខិតអំពាវនាវឲ្យចូលរួម ដែលបានបង្ហោះតាមហ្វេសប៊ុកចាប់តាំងពីសប្តាហ៍មុន សកម្មជន និងអ្នកនយោបាយប្រឆាំងបានបញ្ជាក់ជាភាសាអង់គ្លេស ដោយស្នើឲ្យអង្គការសហប្រជាជាតិកុំទទួលស្គាល់ លោក ហ៊ុន ម៉ាណែត ជាតំណាងផ្លូវការរបស់កម្ពុជា ព្រមទាំងស្នើឲ្យពលរដ្ឋខ្មែរនៅអាមេរិក និងនៅប្រទេសផ្សេងទៀតចូលរួមធ្វើបាតុកម្មឲ្យបានច្រើនគ្នានៅថ្ងៃទី២២ ខែកញ្ញា នៅបុរីញូវយ៉ក ទីដែលប្រតិភូរដ្ឋាភិបាលកម្ពុជាដឹកនាំដោយលោក ហ៊ុន ម៉ាណែត ចូលរួមមហាសន្និបាតអង្គការសហប្រជាជាតិ។
លោក សុភ័ណ្ឌ ឡារី សកម្មជនប្រឆាំងមួយរូប ក្នុងនាមបណ្តាញយុវជនសកលនៅអាមេរិកបានថ្លែងតាមហ្វេសប៊ុករបស់លោកថា ការធ្វើបាតុកម្មរបស់ខ្មែរនៅក្រៅប្រទេសគឺជាការសម្តែងនូវការមិនពេញចិត្តនឹងការកាន់អំណាចរបស់រដ្ឋាភិបាលថ្មី ព្រមទាំងអំពាវនាវឲ្យប្រទេសប្រជាធិបតេយ្យដើរចេញពីកិច្ចប្រជុំពេលមានវត្តមានប្រតិភូកម្ពុជា។
លោក មាស សុភ័ណ្ឌ ដែលត្រូវបានតែងតាំងជាប្រធានក្រុមអ្នកនាំពាក្យនាយករដ្ឋមន្ត្រី មិនមានការធ្វើអត្ថាធិប្បាយអ្វីទេជុំវិញបញ្ហានេះ។
សូមបញ្ជាក់ថា ប្រសិនបើមានបាតុកម្មនៅទីក្រុងញូវយ៉ក នៅចុងខែកញ្ញាខាងមុខមែន គឺជាបាតុកម្មលើកទី១ហើយ ប្រឆាំងលោក ហ៊ុន ម៉ាណែត នៅក្រៅប្រទេស បន្ទាប់ពីលោកបានក្លាយជានាយករដ្ឋមន្ត្រីរបស់ កម្ពុជាចាប់តាំងពីថ្ងៃទី២២ ខែសីហាមក។
សូមរំលឹកដែរថា កាលពីខែឧសភា ឆ្នាំ២០២២កន្លងទៅ វត្តមានរបស់អតីតនាយករដ្ឋមន្ត្រី ហ៊ុន សែន នៅលើទឹកដីអាមេរិក ក៏មានពលរដ្ឋខ្មែរ និងសកម្មជនភាគីម្ខាងធ្វើបាតុកម្មប្រឆាំងដែរ ក៏ប៉ុន្តែដំណាលគ្នានោះក៏មានការប្រមូលផ្តុំគ្នាពីពលរដ្ឋខ្មែរម្ខាងទៀតសម្តែងការគាំទ្ររដ្ឋាភិបាល ដែលពេលនោះក៏កើតមានហេតុការណ៍បុរសម្នាក់គប់ស្បែកជើងសំដៅលោក ហ៊ុន សែន ផងដែរ ក៏ប៉ុន្តែមិនត្រូវអំឡុងពេលលោក ហ៊ុន សែន កំពុងថតរូបសែលហ្វីជាមួយអ្នកគាំទ្រលោក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ