ដីស្រូវជាង៥ពាន់ហិកតាក្នុងខេត្តកំពង់ស្ពឺជួបគ្រោះរាំងស្ងួត ខណៈតំបន់ជាប់ទន្លេមេគង្គប្រឈមទឹកជន់
ដីស្រែជាង៥ពាន់ហិកតា ក្នុងខេត្តកំពង់ស្ពឺ បែរជាជួបគ្រោះរាំងស្ងួតខូចខាត ក្រោយពីបានរងការជន់លិចដោយជំនន់ទឹកភ្លៀងអំឡុងខែសីហានេះ។ ភាពរាំងស្ងួតនេះ កើតឡើងស្របពេលដែលគណៈកម្មការទន្លេមេគង្គ(MRC) បានជូនដំណឹងថា តំបន់ជាប់ទន្លេមេគង្គ នឹងរងភ្លៀងធ្លាក់យ៉ាងដំណំ ដែលបណ្ដាលឲ្យកម្រិតទឹកទន្លេកើនឡើងយ៉ាងឆាប់រហ័ស។
ចុះផ្សាយនៅថ្ងៃ៖
ស្តាប់ - ០២:០៨
យោងតាមរដ្ឋបាលខេត្តកំពង់ស្ពឺនៅថ្ងៃទី១១ខែសីហា ជិតមួយខែមកហើយ ដែលស្រុកចំនួនពីរ ជួបភាពរាំងស្ងួត ក្រោយទើប ជន់លិចដោយសារជំនន់ទឹកភ្លៀង។ការរាំងភ្លៀងនេះ បានបណ្ដាលឲ្យផ្ទៃដីស្រែប្រមាណជាង៥ពាន់ហិកតា ក្នុងស្រុកគងពិសី និងស្រុកសំរោងទង កំពុងត្រូវការការជួយសង្គ្រោះ។ ជាការអន្តរាគមន៍ អាជ្ញាធរខេត្តកំពង់ស្ពឺ នៅថ្ងៃសុក្រទី១១សីហាម្សិលមិញ ក៏បានរៀបចំបូមទឹកបញ្ចូលទៅប្រឡាយ ដើម្បីឲ្យកសិករបូមបន្តដាក់ចូលដីស្រែរបស់ខ្លួនដែលស្ងួតហួតហែងទាំងនេះ។
ទន្ទឹមនឹងតំបន់មួយចំនួនក្នុងប្រទេសកម្ពុជា ដែលរួមមានទាំងខេត្តកំពង់ស្ពឺ ជួបគ្រោះស្ងួតហួតហែង តំបន់ជាប់ទន្លេមេគង្គ បាននឹងកំពុងតែមានភ្លៀងធ្លាក់ ដែលបណ្ដាលឲ្យកម្ពស់ទឹកនឹងកើនឡើងយ៉ាងឆាប់រហ័ស។ នេះបើយោងតាមគណៈកម្មការទន្លេមេគង្គ(MRC) នៅថ្ងៃទី៩សីហា ដែលបញ្ជាក់ថា តំបន់ទន្លេមេគង្គ ក្នុងប្រទេសចំនួន៤ រួមទាំងប្រទេសកម្ពុជា បាននឹងកំពុងរងភ្លៀងធ្លាក់រាយប៉ាយ ក្នុងរយៈពេលប៉ុន្មានថ្ងៃនេះ។
ការណ៍នេះ បានបណ្ដាលឲ្យតំបន់ជាប់ទន្លេមេគង្គក្នុងប្រទេសថៃនិងឡាវ បានជន់លិចយ៉ាងដំណំ ខូចខាតទ្រព្យសម្បត្តិ ហេដ្ឋារចនាសម្ព័ន្ធ និងប៉ះពាល់ដល់ជីវភាពរស់នៅរបស់ប្រជាជន។ នៅចំពោះមុខនេះអាជ្ញាធរឡាវ បានប្រកាសពីការត្រៀមបើកទ្វារទឹកទំនប់វារីអគ្គីសនីផ្នែកខាងលើ ដើម្បីរំដោះទឹកចេញតំបន់របស់ខ្លួន ដែលនឹងអាចប៉ះពាល់ដល់តំបន់ស្ថិតនៅខ្សែទឹកខាងក្រោម ដូចជាកម្ពុជា។ ប្រឈមនឹងបញ្ហានេះ សាលាខេត្តស្ទឹងត្រែង បានអះអាងថា ខ្លួនបានត្រៀមលក្ខណៈរួចរាល់ហើយ ក្នុងឆ្លើយតប និងបង្កើនការប្រុងប្រយ័ត្ន ស្ដីពីទឹកដែលនឹងហូរចេញពីការបើកបង្ហួរទ្វារទឹកទំនប់វារីអគ្គិសនីរបស់ឡាវនេះ។
យោងតាមសេចក្ដីប្រកាសរបស់ក្រសួងធនធានទឹកនិងឧតុនិយម ចាប់ពីថ្ងៃទី១៥សីហាខាងមុខ កម្ពស់ទឹកទន្លេមេគង្គក្នុងស្ទឹងត្រែងនឹងបន្តកើនដល់កម្ពស់ ៧.៨៦ម៉ែត្រ កម្ពស់ទឹកទន្លេមេគង្គក្នុងខេត្តក្រចេះនឹងបន្តកើនដល់កម្ពស់ជាង១៧.៥២ម៉ែត្រ កម្ពស់ទឹកទន្លេមេគង្គក្នុងកំពង់ចាមកើនឡើងដល់កម្ពស់១១.០៣ម៉ែត្រ ខណៈកម្ពស់ទឹកទន្លេមេគង្គអ្នកលឿង កើនដល់កម្ពស់៤.៥៦ម៉ែត្រ។ ទន្ទឹមនឹងនេះ តំបន់ជាប់ទន្លេបាសាក់ និងទន្លេសាប ក្នុងប្រទេសកម្ពុជា ក៏នឹងរងភ្លៀងធ្លាក់ កើនកម្ពស់ទឹកទន្លេដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ