សមាសភាពគណៈរដ្ឋមន្ត្រីថ្មីដឹកនាំដោយនាយករដ្ឋមន្ត្រី ហ៊ុន ម៉ាណែត ដូចគ្នានឹងបញ្ជីបែកធ្លាយកន្លងទៅ
លោកនាយករដ្ឋមន្ត្រី ហ៊ុន សែន នៅថ្ងៃព្រហស្បតិ៍ម្សិលមិញ ក្នុងជំនួបជាមួយគណៈរដ្ឋមន្ត្រីចាស់ និងគណៈរដ្ឋមន្ត្រីថ្មី បានបង្ហាញសមាសភាពថ្នាក់ដឹកនាំគណៈរដ្ឋមន្ត្រីនៃរដ្ឋាភិបាលថ្មីសម្រាប់នីតិកាលទី៧នៃរដ្ឋសភា ដែលភាគច្រើនដឹកនាំដោយអ្នកបន្តវេនដែលជាកូនៗរបស់ថ្នាក់ដឹកនាំជាន់ខ្ពស់គណបក្សប្រជាជន។ តាមប្រភពដែលអាចជឿទុកចិត្តបានពីគណបក្សកាន់អំណាច បញ្ជីឈ្មោះគណៈរដ្ឋមន្ត្រីថ្មី គឺមិនមានការកែប្រែពីបញ្ជីចុងក្រោយ ដែលមានការផ្សព្វផ្សាយក្រៅផ្លូវការកាលពីខែកុម្ភៈ ឆ្នាំ២០២៣ កន្លងទៅនោះទេ។ ក៏ប៉ុន្តែបញ្ជីនេះ មិនទាន់ផ្លូវការដោយសារត្រូវឆ្លងនីតិវិធីដែលមានចែងនៅក្នុងរដ្ឋធម្មនុញ្ញ។
ចុះផ្សាយនៅថ្ងៃ៖
ស្តាប់ - ០៤:២២
នៅក្នុងជំនួបសំណេះសំណាលជាមួយសមាជិករដ្ឋាភិបាលចាស់ និងគណៈរដ្ឋមន្ត្រីថ្មីអាណត្តិទី៧ លោកនាយករដ្ឋមន្ត្រី ហ៊ុន សែន ក៏បានបង្ហាញបញ្ជីឈ្មោះគណៈរដ្ឋមន្ត្រីថ្មី ដែលមានលោក ហ៊ុន ម៉ាណែត កូនប្រុសច្បងរបស់លោកជានាយករដ្ឋមន្ត្រី។ ក៏ប៉ុន្តែបញ្ជីឈ្មោះនេះ នៅមិនទាន់ប្រកាសជាផ្លូវការនៅឡើយ ដោយគោរពទៅតាមនីតិវិធី ដែលមានចែងនៅក្នុងរដ្ឋធម្មនុញ្ញ។
ទោះយ៉ាងណា ប្រភពពីមន្ត្រីជាន់ខ្ពស់គណបក្សកាន់អំណាច ដែលអាចទុកចិត្តបាន បញ្ជាក់ថាបញ្ជីឈ្មោះដែលបង្ហាញដោយលោក ហ៊ុន សែន កាលពីម្សិលមិញ គឺមានសុក្រឹតភាព ពោលគឺមិនមានការកែប្រែពីបញ្ជីឈ្មោះគណៈរដ្ឋមន្ត្រីថ្មី ដែលត្រូវបានផ្សព្វផ្សាយក្រៅផ្លូវការកាលពីថ្ងៃទី២១ ខែកុម្ភៈកន្លងទៅ។ ក៏ប៉ុន្តែបញ្ជីឈ្មោះគណៈរដ្ឋមន្ត្រីថ្មីនេះ នឹងត្រូវឆ្លងកិច្ចប្រជុំផ្តល់សេចក្តីទុកចិត្តពីរដ្ឋសភា ដែលនឹងប្រព្រឹត្តិទៅនៅថ្ងៃទី២២ ខែសីហានេះ។
ជាការកត់សម្គាល់បញ្ជីឈ្មោះគណៈរដ្ឋមន្ត្រីអាណត្តិទី៧ ដែលបានរៀបចំរួចរាល់ ហើយមិនទាន់ឆ្លងសភានោះមាននាយករដ្ឋមន្ត្រី១រូប គឺលោក ហ៊ុន ម៉ាណែត ឧបនាយករដ្ឋមន្ត្រី១០រូប ទេសរដ្ឋមន្ត្រី១១រូប និងរដ្ឋមន្ត្រី៣០រូប។ តាមរយៈបញ្ជីចុងក្រោយនេះ រដ្ឋមន្ត្រីទីស្តីការគណៈរដ្ឋមន្ត្រីគឺដឹកនាំដោយ លោក វង្សី វិស្សុត រដ្ឋមន្ត្រីមហាផ្ទៃ គឺលោក ស សុខា កូនប្រុសលោក ស ខេង រដ្ឋមន្ត្រីការពារជាតិគឺលោក ទៀ សីហា កូនប្រុសលោក ទៀ បាញ់ លោក សុខ ចិន្តាសោភា ជារដ្ឋមន្ត្រីការបរទេស លោក អូន ព័ន្ធមុនីរ័ត្ន ជារដ្ឋមន្ត្រីសេដ្ឋកិច្ច និងហិរញ្ញវត្ថុ លោក សាយ សំអាល់ កូនប្រុសលោក សាយ ឈុំ ជារដ្ឋមន្ត្រីរៀបចំដែនដី លោក ឌិត ទីណា កូនប្រុសលោក ឌិត មុន្ទី ជារដ្ឋមន្ត្រីកសិកម្ម លោក ឆាយ ឫទ្ធិសែន កូនប្រុសលោក ឆាយ ថន ជារដ្ឋមន្ត្រីអភិវឌ្ឍន៍ជនបទ លោកស្រី ចម និម្មល កូនស្រីលោក ចម ប្រសិទ្ធ ជារដ្ឋមន្ត្រីពាណិជ្ជកម្ម លោក ហែម វណ្ណឌី ជារដ្ឋមន្ត្រីឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លោក កែវ រតនៈ រដ្ឋមន្ត្រីរ៉ែ និងថាមពល លោក ប៊ិន ត្រឈៃ ជារដ្ឋមន្ត្រីផែនការ លោក ហង់ជួន ណារ៉ុន រដ្ឋមន្ត្រីក្រសួងអប់រំ លោក ជា សុមេធី កូនប្រុសលោក ជា ស៊ីម រដ្ឋមន្ត្រីសង្គមកិច្ច លោក អ៊ាង សុផល្លែត ជារដ្ឋមន្ត្រីបរិស្ថាន លោក ថោ ជេដ្ឋា ជារដ្ឋមន្ត្រីធនធានទឹក និងឧត្តុនិយម លោក នេត្រ ភក្ត្រា ជារដ្ឋមន្ត្រីក្រសួងព័ត៌មាន លោក កើត រិទ្ធ រដ្ឋមន្ត្រីក្រសួងយុត្តិធម៌ លោក ហួត ហាក់ រដ្ឋមន្ត្រីក្រសួងទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ច លោក ជា វ៉ាន់ដេត ជារដ្ឋមន្ត្រីប្រៃសណីយ៍ លោក ឈាង រ៉ា ជារដ្ឋមន្ត្រីសុខាភិបាល លោក ប៉េង ពោធិ៍នា រដ្ឋមន្ត្រីសាធារណការ លោកស្រី ភឿង សកុណា ជារដ្ឋមន្ត្រីវប្បធម៌ លោក សុខ សូកេន រដ្ឋមន្ត្រី ទេសចរណ៍ លោក ចាយ បូរិន រដ្ឋមន្ត្រីធម្មការ និងសាសនា លោកស្រី អ៊ឹង កន្ថាផាវី ជារដ្ឋមន្ត្រីកិច្ចការនារី លោក ហេង សួរ ជារដ្ឋមន្ត្រីក្រសួងការងារ លោក ហ៊ុន ម៉ានី កូនប្រុសពៅលោក ហ៊ុន សែន ជារដ្ឋមន្ត្រីក្រសួងមុខងារសាធារណៈ លោក ម៉ៅ ហាវណ្ណាល់ ជារដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល និងលោក ឡាំ ជា រដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន។
ដោយឡែក មន្ត្រីជាន់ខ្ពស់នៃអាណត្តិចាស់ដែលដឹកនាំដោយលោកនាយករដ្ឋមន្ត្រី ហ៊ុន សែន មួយចំនួនត្រូវបានតែងតាំងជាឧបនាយករដ្ឋមន្ត្រី ក្នុងនោះមាន លោក នេត សាវឿន មេប៉ូលីសជាតិ លោក អូន ព័ន្ធមុនីរ័ត្ន លោក ស៊ុន ចាន់ថុល លោក ហង់ ជួនណារ៉ុន លោក សាយ សំអាល់ លោក ស សុខា លោក ទៀ សីហា លោក កើត រិទ្ធ លោក សុខ ចិន្តាសោភា និងលោក វង្សី វិស្សុត។
រីឯទេសរដ្ឋមន្ត្រីចំនួន១១ រូបវិញ គឺមានលោក គន់ គីម លោក ហូ សិទ្ធី លោក អ៊ុក រ៉ាប៊ុន លោក ឱម យិនទៀង លោក អៀង មូលី លោក ពេជ សោភ័ន លោក ព្រុំ សុខា លោក សក់ សេដ្ឋា លោក អូស្មាន ហាស្សាន់ លោក លី ធុច និងលោក ឆែម គាតរិទ្ធី។
ជាមួយគ្នានេះ តាមរយៈសារជាសម្លេងបង្ហោះតាមតេឡេក្រាមរយៈពេលជាង៨នាទីកាលពីថ្ងៃពុធ លោកនាយករដ្ឋមន្ត្រី ហ៊ុន សែន បានបញ្ជាក់ច្បាស់ៗថា បេក្ខភាពប្រធានរដ្ឋសភាអាណត្តិទី៧ ត្រូវបានរៀបចំតាំងពីចុងឆ្នាំ២០២១មកម្លេះ ដែលតំណែងនេះ នឹងត្រូវដឹកនាំដោយលោកស្រី ឃួន សុដារី បច្ចុប្បន្នអនុប្រធានទី២ នៃរដ្ឋសភា។ រីឯបេក្ខភាពអនុប្រធានទី១ នៃរដ្ឋសភា គឺលោក ជាម យៀប ដដែល ហើយអនុប្រធានទី២ គឺលោក វង សូត រដ្ឋមន្ត្រីក្រសួងសង្គមកិច្ច ដែលគេស្គាល់ថាជាកូនប្រសារលោក ហេង សំរិន ប្រធានរដ្ឋសភាបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ