កម្ពុជាគ្រោងរៀបចំបុណ្យអ៊ុំទូកឡើងវិញ ជាមួយនឹងក្ដីរំពឹងអធិកអធម
ដោយបញ្ហាកូវីដ១៩ និងការរៀបចំកិច្ចប្រជុំកំពូលអាស៊ាន រដ្ឋាភិបាលកម្ពុជា បានផ្អាករៀបចំប្រារព្ធពិធីបុណ្យអ៊ុំទូករយៈពេល៣ឆ្នាំជាប់ៗគ្នា។ តាមរយៈវិទ្យុបារាំងRFI លោកបណ្ឌិត ឈត ប៊ុនថង អ្នកជំនាញផ្នែកវប្បធម៍នៃរាជបណ្ឌិតសភាកម្ពុជា បានព្យាករណ៍ថា ចំនួនពលរដ្ឋដើរកំសាន្តនៅអំឡុងពិធីបុណ្យអ៊ុំទូកឆ្នាំនេះ នឹងមានចំនួនច្រើនសន្ធឹកសន្ធាប់។
ចុះផ្សាយនៅថ្ងៃ៖
ស្តាប់ - ០១:៥២
នាយករដ្ឋមន្រ្តីថ្មី និងការអាក់ខានអស់៣ឆ្នាំ នឹងញ៉ាំងឲ្យពិធីបុណ្យអ៊ុំទូកឆ្នាំនេះ ប្រារព្ធទៅយ៉ាងអធឹកអធម និងមានការចូលរួមច្រើនកុះករ។ នេះជាការព្យាករណ៍របស់លោកបណ្ឌិត ឈត ប៊ុនថង ប្រធាននាយកដ្ឋាន ទំនាក់ទំនងវប្បធម៌ អប់រំ និងទេសចរណ៍ នៃរាជបណ្ឌិតសភាកម្ពុជា។
នៅចំពោះមុខចរន្តមនុស្សដែលនឹងចេញដើរកំសាន្តច្រើន លោកបានដកពិសោធន៍ពីសោកនាដកម្មដែលធ្លាប់កើតឡើងទាំងក្នុងប្រទេសកម្ពុជា និងបណ្ដាប្រទេសមួយចំនួនផ្សេងទៀត ដូចជាការរត់ជាន់គ្នា ប្រជ្រៀតគ្នាជាដើម ដែលលោកបានស្នើឲ្យអាជ្ញាធរកំណត់ចំនួនមនុស្សដែលអាចចូលទៅតាមតំបន់នីមួយៗឲ្យបានច្បាស់លាស់។ នៅក្នុងបញ្ហាសន្តិសុខសុវត្ថិភាពនេះដែរ លោកបណ្ឌិតស្នើឲ្យអាជ្ញាធរយាមកាមឲ្យបានជាប់ជាប្រចាំ និងធានាថាទីតាំងទទួលផ្ញើយានជំនិះ មានការអនុញ្ញាតពីអាជ្ញាធរមូលដ្ឋាន ដើម្បីជៀសវាងការបន្លំយកទ្រព្យសម្បត្តិពីសំណាក់ជនខិលខូច។
ដោយឡែក ចំពោះបញ្ហាបរិស្ថានជាបញ្ហារ៉ាំរៃ ដែលលោកបណ្ឌិតស្នើឲ្យឈានដល់មានការផាកពិនិយចំពោះការចោលសំរាមផ្ដេសផ្ដាស បន្ថែមពីការអប់រំណែនាំ ដាក់ពង្រាយធុងសម្រាម ដើម្បីទើបអាចទប់ស្កាត់បញ្ហានេះឲ្យមានប្រសិទ្ធិភាព។
យោងតាមផែនការណែនាំស្ដីពីការរៀបចំពិធីបុណ្យអ៊ុំទូក គណៈកម្មាធិការជាតិរៀបចំពិធីបុណ្យជាតិនិងអន្តរជាតិ បានអំពាវនាវឲ្យមានការផ្សព្វផ្សាយនៅតាមស្ថាប័នរដ្ឋនិងឯកជន, ឲ្យមានការតុបតែងលម្អទូកតាមរចនាបទខ្មែរពិតប្រាកដ និងត្រូវប្រកាន់ខ្ជាប់សាមគ្គីភាព ភាពថ្លៃថ្នូរសប្បាយរីករាយ ដែលជាខ្លឹមសារនៃពិធីបុណ្យអ៊ុំទូកនេះ និងជំរុញឲ្យហ្វឹកហាត់និងចូលរួមប្រកួតអ៊ុំទូក នៅតាមភូមិឃុំ ទូទាំងប្រទេស។
សូមបញ្ជាក់ កាលពីខែមិថុនាឆ្នាំ២០២៣ នាយករដ្ឋមន្រ្តីចាំផ្ទះលោកហ៊ុន សែន បានប្រកាសថានឹងរៀបចំពិធីបុណ្យអ៊ុំទូកឡើងវិញក្នុងទ្រង់ទ្រាយធំ ក្រោយខកខានអស់រយៈពេល៣ឆ្នាំ។ តាមការគ្រោងទុក ពិធីបុណ្យអ៊ុំទូក បណ្ដែតប្រទីប សំពះព្រះខែ នឹងត្រូវប្រារព្ធឡើងចាប់ពីថ្ងៃទី២៦ ដល់ថ្ងៃទី២៨ខែវិច្ឆិកាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ