លោក ស ខេងថា ការនាំចូល និងផលិតគ្រឿងញៀនសំយោគក្នុងប្រទេសកម្ពុជា គ្មានភាពធូរស្បើយ
គ្រឿងញៀនជិត៦តោនត្រូវបានអាជ្ញាធរជាតិប្រយុទ្ធប្រឆាំងគ្រឿងញៀនដុតបំផ្លាញចោលក្នុងទិវាអន្តរជាតិប្រយុទ្ធប្រឆាំងគ្រឿងញៀននាព្រឹកថ្ងៃទី២៨ ខែមិថុនានេះ។ លោក ស ខេង រដ្ឋមន្ត្រីក្រសួងមហាផ្ទៃថ្លែងថា បើទោះបីការបង្រ្កាបគ្រឿងញៀនបានធ្វើឡើងជាបន្តបន្ទាប់។ ក៏ប៉ុន្តែលោកកត់សម្គាល់ថា ការនាំចូល និងផលិតគ្រឿងញៀនសំយោគក្នុងប្រទេស នៅតែកើនឡើងខ្លាំង ដែលទាមទារឱ្យអាជ្ញាធរគ្រប់ជាន់ថ្នាក់ត្រូវដុតដៃដុតជើង បន្តបង្ក្រាបទីតាំងផលិតគ្រឿងញៀន និងឧកិ្រដ្ឋជនឱ្យមានប្រសិទ្ធិភាពជាងមុនបន្ថែម។
ចុះផ្សាយនៅថ្ងៃ៖
ស្តាប់ - ០២:៣៦
ក្នុងពិធីដុតបំផ្លាញគ្រឿងញៀនជិត៦តោន (៥,៧តោន)នាព្រឹកនេះ លោក ស ខេង រដ្ឋមន្ត្រីក្រសួងមហាផ្ទៃបានបញ្ជាក់ថា ការលួចកែឆ្នៃ និងផលិតគ្រឿងញៀនសំយោគក្នុងប្រទេសកម្ពុជាពីសំណាក់ក្រុមឧក្រិដ្ឋជននៅមានចំនួនច្រើនដដែល ខណៈការនាំចូលគ្រឿងញៀនតាមតំបន់ត្រីកោណមាសឆ្លងកាត់ខេត្តភូមិភាគឦសានវិញ លោក ស ខេងកត់សម្គាល់ថា ក៏នៅមានកំណើនដូចគ្នា។
បើតាម លោក ស ខេង គ្រឿងញៀនដែលកំពុងផលិតក្នុងប្រទេសកម្ពុជា ភាគច្រើន ក្រុមឧក្រិដ្ឋជនប្រើល្បិចនាំចូលសារធាតុគីមីតាមរយៈមុខទំនិញស្របច្បាប់ ហើយក្រោយពេលសារធាតុគីមីទាំងនោះបានចូលដល់ទឹកដីកម្ពុជា លោក ស ខេងថា ក្រុមឧក្រិដ្ឋជន បានធ្វើការបង្វែរសារធាតុគីមីផ្សំទាំងនោះ ផលិតជាគ្រឿងញៀនខុសច្បាប់វិញ។ ត្រង់ចំណុចនេះ លោក ស ខេងអះអាងថា អាជ្ញាធរបានចុះបង្រ្កាប និងរឹបអូសសារធាតុគីមីទាំងនោះជាបន្តបន្ទាប់។
តែយ៉ាងណា លោក ស ខេងចាត់ទុកថា បញ្ហាទាំងនេះ គឺជាហានិភ័យខ្ពស់ចំពោះសង្គមទាំងមូល ពិសេសយុវជនខ្មែរ ហើយលោកទទួលស្គាល់ថា អាជ្ញាធរនៅមិនទាន់មានយន្តការគ្រប់គ្រង និងមានកិច្ចសហការគ្នាឱ្យបានច្បាស់លាស់ និងម៉ត់ចត់នៅឡើយ។
កាលពីឆ្នាំ២០២២ កន្លងទៅ អាជ្ញាធរជាតិប្រយុទ្ធប្រឆាំងគ្រឿងញៀនរឹបអូសបានគ្រឿងញៀនជាង ១៦តោន និងឃាត់ខ្លួនអ្នកពាក់ព័ន្ធគ្រឿងញៀនជាង ១ម៉ឺន ៤ពាន់នាក់ (១៤.៧៨៤)។ ក្នុងនោះមានជនបរទេសជាង ២០០នាក់ (២៥៩) ឬ ៩សញ្ជាតិ។ បើយោងតាមរបាយការណ៍ពីអាជ្ញាធរជំនាញ បានបង្ហាញទៀតថា ក្នុងចំណោមការបង្ក្រាបជាង ៦ពាន់ករណី (៦.២៩០) រកឃើញមានការជួញដូរជាង ៣ពាន់ករណី (៣.០៩៧) ផលិតរក្សាទុកជាង ១ពាន់ករណី (១.១០៤) និងអ្នកប្រើប្រាស់គ្រឿងញៀនជាង ២ពាន់ករណី (២.០៤៥)។ ដោយឡែករយៈពេល ៥ខែដើមឆ្នាំ២០២៣ នេះវិញ អាជ្ញាធររឹបអូសបានគ្រឿងញៀនជិត ១តោន។
អាជ្ញាធរជាតិប្រយុទ្ធប្រឆាំងគ្រឿងញៀនទទួលស្គាល់ថា ការចុះបង្ក្រាបពីសំណាក់អាជ្ញាធរជំនាញនាពេលកន្លងមក នៅមានចន្លោះប្រហោង ដែលបណ្តាលឱ្យឧកិ្រដ្ឋជនអាចនាំចូលសារធាតុគីមីផ្សំ ឬគ្រឿងញៀនចូលមកក្នុងប្រទេសកម្ពុជា។ ក៏ប៉ុន្តែនៅទន្ទឹមនឹងភាពខ្វះចន្លោះនេះ អាជ្ញាធរជំនាញអះអាងថា នឹងពង្រឹងការអនុវត្តច្បាប់បន្ថែម ខណៈការបង្ក្រាប និងរឹបអូសគ្រឿងញៀននាពេលកន្លងមក គឺមានចំនួនច្រើន។
ពាក់ព័ន្ធនឹងរឿងនេះ លោកនាយករដ្ឋមន្ត្រីហ៊ុន សែន ក្នុងពិធីជួបជាមួយកម្មករ-កម្មការិនីនៅតំបន់ព្រៃស្ពឺ ខណ្ឌពោធិ៍សែនជ័យ រាជធានីភ្នំពេញនៅព្រឹកថ្ងៃទី២៨ ខែមិថុនា លោកបានសង្កត់ធ្ងន់ថា ការបង្ក្រាបគ្រឿងញៀនបានច្រើនរបស់អាជ្ញាធរនាពេលកន្លងមក មិនមែនបង្ហាញពីសមត្ថភាពខ្លាំង ឬគុណសម្បត្តិរបស់អាជ្ញាធរឡើយ ផ្ទុយទៅវិញ លោក ហ៊ុន សែនយល់ថា គ្រឿងញៀនក្នុងប្រទេសមានចំនួនកើនឡើងទៅវិញទេ។ សម្រាប់លោក ហ៊ុន សែន ប្រសិនបើអាជ្ញាធរបង្ក្រាបបានតិច ទើបបញ្ជាក់ន័យថា ចំនួនគ្រឿងញៀនក្នុងប្រទេសបានថយចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ