លោក ហ៊ុន សែន បញ្ជាឲ្យសមត្ថកិច្ចខេត្តភាគឦសានចាប់បញ្ជូនពួកប្រឆាំងរដ្ឋាភិបាលវៀតណាមទៅឲ្យវៀតណាមភ្លាមៗ
លោកនាយករដ្ឋមន្ត្រី ហ៊ុន សែន នៅក្នុងឱកាសសំណេះសំណាលជាមួយកម្មករជិត២ម៉ឺននាក់ នៅខេត្តកំពង់ចាមនាព្រឹកថ្ងៃសុក្រនេះ បានចេញបទបញ្ជាជាចំហរឲ្យកងកម្លាំងនៅយោធភូមិភាគ១ ជាប់ព្រំដែនវៀតណាម អាជ្ញាធរខេត្តរតនគីរី មណ្ឌលគីរី និងក្រចេះ បង្កើនការប្រុងប្រយ័ត្នទប់ស្កាត់ក្រុមប្រឆាំងប្រដាប់អាវុធវៀតណាម ឬម៉ុងតាញ៉ា ដែលអាចលាក់ខ្លួននៅតំបន់នោះ។ ការប្រកាសរបស់លោក ហ៊ុន សែន ដូច្នេះ គឺធ្វើឡើងបន្ទាប់ពីមានការប្រយុទ្ធគ្នារវាងក្រុមប្រឆាំង និងអាជ្ញាធរវៀតណាម ដែលធ្វើឲ្យមន្ត្រីវៀតណាមមួយចំនួនស្លាប់។
ចុះផ្សាយនៅថ្ងៃ៖
ស្តាប់ - ០១:៤៩
បន្ទាប់ពីមានការវាយប្រយុទ្ធគ្នាដោយប្រដាប់អាវុធចាប់តាំងពីថ្ងៃទី១១ ខែមិថុនាមក រវាងក្រុមបះបោរវៀតណាម ឬជនជាតិភាគតិចម៉ុងតាញ៉ាប្រមាណ៦០០នាក់ និងអាជ្ញាធរវៀតណាម លោកនាយករដ្ឋមន្ត្រី ហ៊ុន សែន បានដាក់បញ្ជាឲ្យកងកម្លាំងកម្ពុជានៅភូមិភាគ១ និងអាជ្ញាធរខេត្តរតនគីរី មណ្ឌលគីរី ក្រចេះ និងត្បូងឃ្មុំ បង្កើនការប្រុងប្រយ័ត្ន សហការជាមួយអាជ្ញាធរវៀតណាម ទប់ស្កាត់កម្លាំងបះបោរ ដែលរត់ចូលមកទឹកដីកម្ពុជា បន្ទាប់ពីពួកគេបានបាក់ទ័ព។
លោក ហ៊ុន សែន ក៏បានដាក់ការសង្ស័យថាមេខ្លោងរបស់ក្រុមបះបោរវៀតណាមនេះ អាចនៅក្នុងទឹកដីកម្ពុជា ដោយលោកលើកឡើងពីបទពិសោធន៍កន្លងមកតែងមានជនជាតិម៉ុងតាញ៉ាវៀតណាមចូលមកទឹកដីកម្ពុជាជ្រកក្រោមផ្លាក ស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួន(UNHCR)។
ជាមួយគ្នានេះលោកនាយករដ្ឋមន្ត្រី ធ្វើការព្រមានទុកជាមុនដល់អង្គការអន្តរជាតិ ឬពលរដ្ឋខ្មែរណាក៏ដោយ ដែលឃុបឃិតនាំពួកម៉ុងតាញ៉ាវៀតណាមមកភ្នំពេញ ព្រមទាំងបញ្ជាឲ្យចាប់ខ្លួនក្រុមបាក់ទ័ពប្រគល់ឲ្យវៀតណាមភ្លាមៗ ដោយមិនមានការលើកលែង ទោះមកដល់ទីស្នាក់ការ HCR ក៏ដោយ ដោយមិនមានសិទ្ធជ្រកកោនជាជនភៀសខ្លួនទេ។
ការលើកឡើងដូច្នេះ ក៏ព្រោះតែកម្ពុជានិងវៀតណាម មានកិច្ចព្រមព្រៀងជាមួយគ្នា មិនអនុញ្ញាតឲ្យប្រើប្រាស់ទឹកដីរបស់ខ្លួនប្រឆាំងប្រទេសជិតខាងណាមួយឡើយ។ លោក ហ៊ុន សែន ក៏បានហៅក្រុមប្រឆាំងអាជ្ញាធរវៀតណាមនេះថាជាក្រុមភេរវកម្ម ដោយលោកជឿជាក់ថាបណ្តាញ និងអង្គការចាត់តាំងក្រុមនេះចេញពីកម្ពុជា។
សូមបញ្ជាក់ថាក្រុមម៉ុងតាញ៉ាវៀតណាមនេះ បានបង្កើតឲ្យមានជនភៀសខ្លួនកាលពីអំឡុងដើមឆ្នាំ២០០០ ម្តងហើយ ដោយពួកគេបានទៅលាក់ខ្លួននៅក្នុងខេត្តរតនគីរី មណ្ឌលគីរី ធ្វើសកម្មភាពប្រឆាំងនឹងរដ្ឋាភិបាលវៀតណាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ