ស្នងការខេត្តកំពត៖ ប្រជាពលរដ្ឋជាង១០០គ្រួសារដាក់ពាក្យប្តឹងក្រុមហ៊ុនលក់ដីឡូត៍មួយទៀត
រហូតមកដល់ថ្ងៃទី១១ ខែមិថុនានេះ មានពាក្យបណ្តឹងជាង ១០០ហើយ ដែលស្នងការដ្ឋាននគរបាលខេត្តកំពត ទទួលបានពីប្រជាពលរដ្ឋ ក្នុងករណីទិញដីពីក្រុមហ៊ុនពិភពដីមាស។ នេះបើតាមការបញ្ជាក់របស់ស្នងការនគរបាលខេត្តកំពត។ កាលពីពេលថ្មីៗនេះ ប្រជាពលរដ្ឋរាប់ពាន់គ្រួសារក្នុងខេត្តកំពត ក៏បានដាក់ពាក្យប្តឹងក្រុមហ៊ុនជួញដូរអចលនទ្រព្យ ជា សារ៉ន ហើយឈានដល់ការចាប់ឃាត់ខ្លួនអគ្គនាយកក្រុមហ៊ុននេះផង។
ចុះផ្សាយនៅថ្ងៃ៖
ស្តាប់ - ០២:១៣
ប្រជាពលរដ្ឋរងគ្រោះដោយសារក្រុមហ៊ុនពិភពដីមាស បានមកដាក់បណ្តឹងជាងមួយរយគ្រួសារហើយគិតត្រឹមថ្ងៃត្រង់ថ្ងៃទី១០ ខែមិថុនា ឆ្នាំ២០២៣ យុត្តិធម៌ត្រូវមានសម្រាប់ប្រជាពលរដ្ឋទាំងអស់គ្នា។ នេះគឺជាសារនៅលើទំព័រហ្វេសប៊ុកស្នងការដ្ឋាននគរបាលខេត្តកំពត ដោយមានភ្ជាប់មកនូវរូបថត ដែលត្រូវបានអះអាងថាជានាយកក្រុមហ៊ុនពិភពដីមាស។
លោក ម៉ៅ ច័ន្ទមធុរិទ្ធ ស្នងការនគរបាលខេត្តកំពតបានថ្លែងប្រាប់វិទ្យុបារាំងអន្តរជាតិ នៅថ្ងៃទី១១ ខែមិថុនានេះថាស្នងការដ្ឋាននគរបាលខេត្តកំពត បានទទួលពាក្យបណ្តឹង ១៦៣ករណីហើយ ពាក់ព័ន្ធនឹងក្រុមហ៊ុនក្រុមហ៊ុនពិភពដីមាស។ លោកបន្តថា ប្រជាពលរដ្ឋនៅក្នុងខេត្តកំពតបានទៅទិញដីរបស់ក្រុមហ៊ុនពិភពដីមាស ដែលស្ថិតនៅក្នុងខេត្តកំពង់ស្ពឺ ហើយក្រុមហ៊ុននេះ ក៏មានស្នាក់ការនៅក្នុងខេត្តកំពត។
ស្នងការនគរបាលខេត្តកំពតបានបានលើកឡើងថា នីតិវិធីបន្តគឺទទួលពាក្យបណ្តឹងរបស់ប្រជាពលរដ្ឋ ដែលអះអាងថាជាអ្នករងគ្រោះដោយសារការទិញដូរដីធ្លី ហើយស្នងការដ្ឋាននគរបាលខេត្តកំពត នឹងបន្តសហការជាមួយអាជ្ញាធរមានសមត្ថកិច្ចនៅក្នុងខេត្តកំពង់ស្ពឺ។
បន្ទាប់ពីមានការផ្សព្វផ្សាយនៅលើទំព័រហ្វេសប៊ុកស្នងការដ្ឋាននគរបាលខេត្តកំពត ក្រុមហ៊ុន ពិភពដីមាស អ៊ិនវេសម៉ិន កាលពីថ្ងៃទី១០ ខែមិថុនា បានចេញសេចក្តីជូនដំណឹងមួយដល់អតិថិជនរបស់ខ្លួន ដែលជួបការលំបាកដោយសារការបម្រើសេវាកម្មរបស់ក្រុមហ៊ុននាពេលកន្លងមក រហូតដល់បច្ចុប្បន្ន មកកាន់ស្នាក់ការក្រុមហ៊ុ ដើម្បក្រុមហ៊ុនធ្វើបច្ចុប្បន្នភាព និងសម្របសម្រួល។
កាលពីអំឡុងខែមេសា កន្លងទៅ អាជ្ញាធរខេត្តកំពតក៏បានឃាត់ខ្លួនឧកញ៉ាជួញដូរដីឡូតិ៍ ជា សារ៉ន និងមនុស្សជិត ១០នាក់ទៀតបន្ទាប់ពីមានបណ្តឹងពីពលរដ្ឋយ៉ាងហោចជាង ២ពាន់គ្រួសារ ដែលបានអះអាងថាបានចាញ់បោកក្រុមវិនិយោគដីឡូត៍ ជា សារ៉ន រៀលធី។ លោក ជា សារ៉ន និងបក្សពួក ដែលបានឆបោកប្រជាពលរដ្ឋរាប់ពាន់នាក់ត្រូវបានចៅក្រមស៊ើបសួរចោទប្រកាន់ពីបទឆបោកមានស្ថានទម្ងន់ទោស និងត្រូវបានបញ្ជូនដល់ពន្ធនាគារខេត្តកំពតនៅថ្ងៃទី២៧ ខែមេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ