លទ្ធផលចាប់ឆ្នោត៖ គណបក្សប្រជាជនកម្ពុជាបានលេខរៀងចុងក្រោយគេ
ដូចអាណត្តិមុនដែរ គណបក្សប្រជាជនកម្ពុជា កំពុងកាន់អំណាច ឈរនៅលេខរៀងចុងក្រោយគេក្នុងបញ្ជីគណបក្សនយោបាយឈរឈ្មោះបោះឆ្នោតនៅថ្ងៃទី២៣កក្កដាខាងមុខនេះ។ យោងតាមលទ្ធផលនៃការចាប់ឆ្នោតដោយសម្តេចសង្ឃទាំងពីរគណៈនៅថ្ងៃចន្ទនេះ គឺគណបក្សប្រជាជនកម្ពុជា ចាប់បានលេខរៀងទី១៨ ក្នុងចំណោមគណបក្សដែលឈរឈ្មោះចូលរួមប្រកួតនៅអាណត្តិទី៧ខាងមុខនេះ។
ចុះផ្សាយនៅថ្ងៃ៖
ស្តាប់ - ០១:៥៣
លទ្ធផលនៃការចាប់ឆ្នោតលេខរៀងគណបក្សនយោបាយ បង្ហាញថា គណបក្សដែលឈរនៅលេខរៀងទី១គឺ សំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូរ ២៖ គណបក្សខ្មែរតែមួយ ៣៖ សញ្ជាតិកម្ពុជា ៤៖ ខ្មែររួបរួមជាតិរបស់លោក ញឹក ប៊ុនឆៃ ៥៖ កម្លាំងប្រជាធិបតេយ្យ ៦៖ គណបក្សកសិករ ៧៖ ស្រ្តីដើម្បីស្ត្រី ៨៖ គណបក្សខ្មែរឈប់ក្រ របស់លោក ក្រវ៉ាញ ដារ៉ន ៩៖ ហ្វ៊ុនស៊ិនប៉ិច ១០៖ ធម្មាធិបតេយ្យ ១១៖ ប្រជាធិបតេយ្យមូលដ្ឋានរបស់លោក យ៉េង វីរៈ ១២៖ បំណងប្រជាពលរដ្ឋ ១៣៖ គណបក្សខ្មែរអភិវឌ្ឍន៍សេដ្ឋកិច្ច ១៤៖ ឯកភាពជាតិខ្មែរ ១៥៖ ខ្មែរអភិរក្សរបស់លោក រៀល ខេមរិន្ទ អតីតតំណាងរាស្ត្រគណបក្សប្រឆាំង ១៦៖ យុវជនកម្ពុជារបស់លោក ពេជ្រ ស្រស់ ១៧៖ ជនជាតិដើមប្រជាធិបេតយ្យ និង ១៨៖ គណបក្សប្រជាជនកម្ពុជា។
គណបក្សប្រជាជនកម្ពុជាកាន់អំណាចនេះក៏ចាប់បានរៀងលេខចុងក្រោយគេដែរកាលពីការបោះឆ្នោតជាតិឆ្នាំ២០១៨ ពោលឈរនៅលេខរៀងទី២០ក្នុងចំណោមគណបក្សចូលរួមទាំង២០ ខណៈមិនមានវត្តមានគណបក្សប្រឆាំងធំជាងគេ ព្រោះ ត្រូវរំលាយមុនការបោះឆ្នោត។
ដូចគ្នាអញ្ចឹងដែរ សម្រាប់ការបោះឆ្នោតអាណត្តិទី៧នេះ បើទោះបីជាគណបក្សភ្លើងទៀនមិនត្រូវបានរំលាយ តែគណបក្សប្រឆាំងធំជាងគេនេះក៏មិនត្រូវបានអនុញ្ញាតឲ្យចូលរួមប្រកួតឡើយក្រោមហេតុផលមិនបានបំពេញលក្ខខណ្ឌតាមតម្រូវការរបស់គជប។
សូមរំឭកថា ដោយសារតែគណបក្សប្រឆាំងត្រូវបានរំលាយនៅមុនការបោះឆ្នោត២០១៨ ពេលនោះ លទ្ធផលបោះឆ្នោតគឺគណបក្សប្រជាជនកម្ពុជាប្រមូលបានកៅអីទាំង១២៥របស់រដ្ឋសភា។ នៅឆ្នាំ២០២៣នេះ តើលទ្ធផលបោះឆ្នោតនឹងទៅជាយ៉ាងណា ខណៈគណបក្សប្រឆាំងធំជាងគេមិនត្រូវបានអនុញ្ញាតឲ្យចូលរួមនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ