លោក ហ៊ុន សែន មិនទទួលយកការសុំទោសរបស់លោក ជា ប៉ូច
ប្រមុខគណបក្សកាន់អំណាច ប្រកាសថា មិនទទួលយកនូវការសុំទោស ពីសំណាក់លោក ជា ប៉ូច សមាជិកគណៈកម្មាធិការអចិន្ត្រៃយ៍គណបក្ស ភ្លើងទៀន នោះឡើយ។ តែលោក ហ៊ុន សែន បើកផ្លូវថា មនុស្សណាក៍ដោយឲ្យតែប្រកាសផ្តាច់ខ្លួនចេញពីលោក សម រង្ស៊ី នោះនឹងទទួលបាននូវការលើកលែងឬយោគយល់។
ចុះផ្សាយនៅថ្ងៃ៖
ស្តាប់ - ០២:២៣
ការដែលលោក ហ៊ុន សែន មិនទទួលយកការសុំទោសពីសំណាក់អតីតតំណាងរាស្ត្រគណបក្សប្រឆាំងនោះ ដោយចាត់ទុកថា លោក ជា ប៉ូច មនុស្សក្រឡិចក្រឡុចបំផុត។ នេះជាការគូសបញ្ជាក់របស់ប្រមុខគណបក្សកាន់អំណាចនៅតាមតេឡេក្រាមកាលពីល្ងាចម្សិលមិញ។
បើតាម លោក ហ៊ុន សែន ទាំងរូបលោក និងកូនរបស់លោកក៍ដូចជាមន្ត្រីផ្សេងទៀតបានថ្នាក់ថ្នម លោក ជា ប៉ូចរយៈពេលជាង៤ឆ្នាំមកហើយ តែទីបំផុតលោកបានក្លាយជាគោលដៅនៃការកំចាត់ចោល(ទម្លាក់)ពីសំណាក់លោក ជា ប៉ូចតាមការចង់បានរបស់លោក សម រង្ស៊ី ដែលលោក ហ៊ុន សែន ហៅថាជនក្បត់ជាតិ៣ជំនាន់។
បើតាមប្រមុខរដ្ឋាភិបាល មនុស្សណាក៍ដោយឲ្យតែមានទំនាក់ទំនងជាមួយលោក សម រង្ស៊ី គឺលោកមិនអាចទទួលបានការយោគយល់នោះឡើយ។ ប៉ុន្តែលោក ហ៊ុន សែន នៅតែបើកផ្លូវឲ្យមនុស្សណាក៍ដោយឲ្យតែប្រកាសផ្តាច់ខ្លួនចេញពីលោក សម រង្ស៊ី នឹងទទួលបាននូវការលើកលែងឬយោគយល់។
សូមបញ្ជាក់ថា លោក ជា ប៉ូច ដែលចេញទៅថៃ និងបន្តដល់អូស្ត្រាលីនៅពេលនេះ ក្រោមហេតុផលព្យាបាលបេះដូង គឺនៅគ្រាដែលស្ថានការណ៍នយោបាយនៅកម្ពុជាឡើងកម្តៅថ្មីៗនេះ។ លោកបានធ្វើលិខិតសុំទោស លោក ហ៊ុន សែន នៅថ្ងៃទី១៥ឧសភា។
សមាជិកគណៈកម្មាធិការអចិន្ត្រៃយ៍គណបក្ស ភ្លើងទៀនរូបនេះ បានគូសបញ្ជាក់ថា អ្វីដែលលោក បានលើកឡើងនៅក្នុងវេទិកាមួយនៅភ្នំពេញអំឡុងខែមីនា២០២៣ ថា«តស៊ូ ទម្លាក់ ហ៊ុន សែន» នោះ គឺមានន័យសំដៅតាមរយៈការបោះឆ្នោតបែបប្រជាធិបតេយ្យ។
បើទោះជាបដិសេធមិនទទួលយកការសុំទោស ពីលោក ជា ប៉ូច ក៏ដោយ តែលោក ហ៊ុន សែន បានទទួលយកការបំភ្លឺរបស់គណបក្សភ្លើងទៀនតាមរយៈសេចក្តីថ្លែងការណ៍ថ្ងៃ២២ឧសភា២០២៣ ដោយមិនចង់មានរឿងវែងឆ្ងាយតទៅទៀត។
គណបក្សភ្លើងទៀនដែលបានគូសបញ្ជាក់ថា គណបក្សនេះមិនជាប់ពាក់ព័ន្ធ និងមិនទទួលខុសត្រូវចំពោះលិខិត ឬឯកសារដែលចេញដោយរូបវន្តបុគ្គលរួមទាំងលិខិតចុះថ្ងៃទី១៤ឧសភា។
លិខិតដាក់ថ្ងៃ១៤ឧសភាដែល មានឈ្មោះ ជា ប៉ូច តែគ្មានចុះហត្ថលេខា ត្រូវបានលោក ហ៊ុន សែន ចាត់ទុកថាលិខិតនេះគេមានគោលបំណងវាយប្រហារលើអង្គភាពFresh newsនិងរក្សាកិត្តិយសគេទាំង
បំពានដោយមិនខ្វល់ពីយុត្តិធម៌នោះឡើយ។
លោក ហ៊ុន សែន អះអាងថាលិខិតនេះត្រូវបានព្រាងឡើងដោយលោកសេង ម៉ាឌី ហើយសុំឲ្យលោកសេង ម៉ាឌី ធ្វើការពន្យល់ ដោយលោកព្រមានថា លោកត្រៀមរៀបចំដំណើរការតាមផ្លូវច្បាប់ទាំងករណីជា ប៉ូចទាំងករណីលិខិតបដិសេធនេះ តែត្រូវរង់ចាំរហូតថ្ងៃ៣០ឧសភា២០២៣ដើម្បី ជា ប៉ូចធ្វើការសម្រេចចិត្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ