លោក ថេង សាវឿន និងក្រុមការងារត្រូវបានឃាត់ខ្លួនក្រោយធ្វើសកម្មភាពការងារគួរឲ្យសង្ស័យ
លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា រួមទាំងក្រុមការងារសមាគមចំនួន ១៦រូបទៀត ត្រូវបានសមត្ថកិច្ចនគរបាលខេត្តក្រចេះឃាត់ខ្លួន តាមការស្នើឲ្យឃាត់ខ្លួនពីខាងស្នងការនគរបាលខេត្តរតនៈគីរី។ យ៉ាងណាមិញការឃាត់ខ្លួននេះ ត្រូវបានអភិបាលខេត្តរតនៈគិរី លោក ញ៉ែម សំអឿន បញ្ជាក់ថា ដោយសារតែក្រុមលោក ថេង សាវឿន ចុះធ្វើសកម្មភាពការងារមានភាពមិនប្រក្រតីដែលគួរឲ្យសង្ស័យនៅខេត្តរតនៈគិរី។
ចុះផ្សាយនៅថ្ងៃ៖
ស្តាប់ - ០២:០៨
ថ្លែងប្រាប់វិទ្យុបារាំង RFI នៅថ្ងៃទី១៨ឧសភានេះ លោក ញ៉ែម សំអឿន ដែលជាអភិបាលខេត្តរតនៈគិរី បានឲ្យដឹងថា ការដែលស្នងការខេត្តរតនៈគិរីស្នើឲ្យសមត្ថកិច្ចខេត្តក្រចេះឃាត់ខ្លួន លោក ថេង សាវឿន និងក្រុមការងារសមាគមសម្ព័ន្ធសហគមន៍កសិករកម្ពុជា ដោយសារតែពួកគេបានធ្វើសកម្មភាពការងារនៅខេត្តរតនៈគិរី ហាកប្រាស់ចាកពីច្បាប់ដែលគួរឲ្យសង្ស័យ។ ប៉ុន្តែយ៉ាងណាអភិបាលខេត្តរូបនេះ មិនបានបញ្ជាក់ឲ្យបានច្បាស់លាស់អំពីកំហុសដែលនាំឲ្យមានការចាប់ខ្លួនពួកគេនោះឡើយ ដោយគ្រាន់តែនិយាយថា ករណីនេះបាននិងកំពុងធ្វើការស្រាវ និងតាមដាននៅឡើយ។
បើតាមលោក ញ៉ែម សំអឿន សមត្ថកិច្ចខេត្តក្រចេះនឹងបញ្ជូនលោក ថេង សាវឿន និងក្រុមការងារសមាគមសម្ព័ន្ធសហគមន៍កសិករកម្ពុជាទៅខេត្តរតនៈគិរី ដើម្បីធ្វើការស្រាវជ្រាវ និងតាមដានរឿងនេះ ប៉ុន្តែការចោទប្រកាន់យ៉ាងណានោះ លោកនៅមិនទាន់ដឹងនោះទេ។ មិនទាន់ដឹង ដោយសារលោកថាបញ្ហានេះ តុលាការជាអ្នកសម្រេច។
ទាក់ទងទៅនឹងការឃាត់ខ្លួនលោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា រួមទាំងក្រុមការងារសមាគមចំនួន ១៦រូបទៀត បើតាមសមាគមអាដហុក ដែលធ្វើការតាមដានរឿងនេះ ថាការចាប់ខ្លួននេះ បន្ទាប់ពីសមាគមសម្ព័ន្ធសហគមន៍កសិករកម្ពុជា បានរៀបចំវគ្គឆ្លុះបញ្ចាំងកសាងសមត្ថភាពក្រុមការងារ កាលពីថ្ងៃទី១៣ ដល់១៤ ខែឧសភា ដែលស្ថិតនៅខេត្តរតនៈគីរី។ ការឃាត់ខ្លួននេះ ដើម្បីសាកសួរព័ត៌មាន ពីបញ្ជីការ និងឯកសារពាក់ព័ន្ធនានា។
បើតាមលោក ស៊ឹង សែនករុណា អ្នកនាំពាក្យសមាគមអាដហុក ករណីការចាប់ខ្លួនអ្នកខាងលើនេះ ខាងសមាគមអាដហុក និងអង្គការដៃគូដទៃទៀត បាននិងកំពុងតែតាមដាន និងឃ្លាំមើលផងដែរ ខណៈការចោទប្រកាន់អំពីការចាប់ខ្លួន ភាគីសមត្ថកិច្ចនៅមិនទាន់អាចបញ្ជាក់ឲ្យបានច្បាស់នៅឡើយ គិតមកទល់នឹងពេលនេះ។
សូមបញ្ជាក់ថា លោក ថេង សាវឿន ប្រធានសមាគមសម្ព័ន្ធសហគមន៍កសិករកម្ពុជា (CCFC) រួមទាំងក្រុមការងារសមាគមចំនួន ១៦រូបទៀត ត្រូវបានសមត្ថកិច្ចនគរបាលខេត្តក្រចេះឃាត់ខ្លួន តាមការស្នើឲ្យឃាត់ខ្លួនពីខាងស្នងការនគរបាលខេត្តរតនៈគីរី កាលពីល្ងាចថ្ងៃទី១៧ ខែឧសភា បន្ទាប់ពីពួកគេវិលត្រឡប់ពីខេត្តរតនៈគិរីមកដល់ខេត្តក្រចេះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ