ព្រឹត្តិការណ៍ស៊ីហ្គេម៖ លោក សៅ សុខា ប្រកាសលាលែងពីតំណែងប្រធានសហព័ន្ធបាល់ទាត់ជាផ្លូវការ
លោក សៅ សុខា បានប្រកាសលាលែងពីតំណែងប្រធានសហព័ន្ធកីឡាបាល់ទាត់កម្ពុជា(FFC) ភ្លាមៗ បន្ទាប់ពីក្រុមជម្រើសជាតិកម្ពុជាផ្នែកបុរសអាយុក្រោម២២ឆ្នាំ ប្រកួតចាញ់មីយ៉ាន់ម៉ា ដោយលទ្ធផល ២-០ ក្នុងវគ្គសន្សំពិន្ទុពូល A នៃព្រឹត្តិការណ៍ស៊ីហ្គេម Sea Games លើកទី៣២ ដែលកម្ពុជាធ្វើជាម្ចាស់ផ្ទះ។ ការប្រកាសលាលែងពីតំណែងនេះ ត្រូវបានគេកត់សម្គាល់ឃើញថា ជាស្មារតីទទួលខុសត្រូវក្នុងនាមជាថ្នាក់ដឹកនាំមួយរូបក្នុងវិស័យកីឡានៅកម្ពុជាផងដែរ។
ចុះផ្សាយនៅថ្ងៃ៖
ស្តាប់ - ០២:៤៦
ក្រោយដឹកនាំសហព័ន្ធបាល់ទាត់កម្ពុជាអស់រយះពេលជាច្រើនឆ្នាំ លោក សៅ សុខា តាមរយះបណ្ដាញសង្គមហ្វេសប៊ុក បានប្រកាសលាលែងពីតំណែងជាប្រធានសហព័ន្ធបាល់ទាត់កម្ពុជា នៅល្ងាចថ្ងៃ០៧ ខែឧសភា។ ការប្រកាសលាលែងនេះ ធ្វើឡើងបន្ទាប់ពីក្រុមជម្រើសជាតិកម្ពុជាផ្នែកបុរសអាយុក្រោម២២ឆ្នាំ ប្រកួតចាញ់ក្រុមមីយ៉ាន់ម៉ា ដោយលទ្ធផល ២-០ នាជំនួបជម្រុះក្នុងពូល A ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះ។
ការប្រកាសលាលែងពីតំណែងនេះផងដែរ ត្រូវបានគេមើលឃើញថា បន្ទាប់ពីអតីតប្រធានសហព័ន្ធបាល់ទាត់កម្ពុជារូបនេះ កាលពីថ្ងៃទី២ ឧសភា បានប្រកាសចុះចេញពីតំណែងប្រធានសហព័ន្ធបាល់ទាត់ ប្រសិនបើក្រុមកីឡាករបាល់ទាត់ជម្រើសជាតិអាយុក្រោម២២ឆ្នាំកម្ពុជា មិនអាចឡើងទៅកាន់វគ្គពាក់កណ្តាលផ្តាច់ព្រ័ត្ន ក្នុងព្រឹត្តិការណ៍ស៊ីហ្គេមលើកទី៣២ ដែលកម្ពុជាធ្វើជាម្ចាស់ផ្ទះទេនោះ។ លោក សៅ សុខា ធ្លាប់បានបញ្ជាក់ថា ក្នុងរយៈពេលជាង១០ឆ្នាំមកនេះ សហព័ន្ធបាល់ទាត់កម្ពុជា បានប្រឹងប្រែងចម្រាញ់កីឡាករតំណាងកម្ពុជា ដោយបានបង្កើតសាលាបាល់ទាត់ជាតិបាទី សម្រាប់ហ្វឹកហ្វឺនកីឡាករ ដើម្បីលើកកម្ពស់កិត្តិយសកម្ពុជា តាមរយៈវិស័យកីឡាបាល់ទាត់។
គួរជម្រាបថា លោក សៅ សុខា ជាមន្ត្រីកីឡាកម្ពុជាទី១ ដែលបានប្រកាសលាលែងពីតំណែង ក្នុងនាមជាថ្នាក់ដឹកនាំសហព័ន្ធបាល់ទាត់កម្ពុជា។ បើតាមលោក សៅ សុខា ការចុះចេញពីតំណែងរបស់លោក គឺជាការបង្ហាញពីការទទួលខុសត្រូវ អំពីការអសមត្ថភាពក្នុងការដឹកនាំវិស័យកីឡាឱ្យទទួលបានជោគជ័យសម្រាប់ជាតិខ្មែរ។
ការលាលែងពីតំណែងរបស់លោក សៅ សុខា នៅពេលនេះ មានមតិខ្លះលើកឡើងថា «ដូចបំបាក់ស្មារតីកីឡាករទំាងមូល»។ មតិទាំងនេះលើកឡើងទៀតថា «នេះជាការសម្រេចដោយការទទួលខុសត្រូវ ប៉ុន្តែបើទោះបីជាចង់ចាកចេញក៏គួរតែចាកចេញបន្ទាប់ពីចប់ព្រិត្តិការណ៍ ឬក្រុមបានធ្លាក់ទៅហើយ ប៉ុន្តែស្ថានភាពនេះ ក្រុមជម្រើសជាតិកម្ពុជានៅមិនទាន់ចាញ់នោះទេ វគ្គក្រោយប្រសិនបើកម្ពុជាឈ្នះ គឺកម្ពុជានឹងបានឡើងទៅវគ្គ៤ក្រុមចុងក្រោយជាដើម»។
គួរឲ្យដឹងថា ក្នុងព្រឹត្តិការណ៍ស៊ីហ្គេមលើទី៣២ ដែលកម្ពុជាធ្វើជាម្ចាស់ផ្ទះ ក្រុមជម្រើសជាតិកម្ពុជាផ្នែកបុរសអាយុក្រោម២២ឆ្នាំ ស្ថិតក្នុងពូល A ជាមួយឥណ្ឌូនេស៊ី ហ្វីលីពីន មីយ៉ាន់ម៉ា និងទីម័រខាងកើត។ ក្នុងប្រកួតបើកឆាកពូល A វគ្គសន្សំពិន្ទុ ក្រុមជម្រើសជាតិកម្ពុជាផ្នែកបុរសអាយុក្រោម២២ឆ្នាំ បានយកឈ្នះទីម័រខាងកើត ៤-០ និងស្មើជាមួយហ្វីលីពីន ១-១ និងចាញ់មីយ៉ាន់ម៉ា ២-០ ខណៈប្រកួតបន្ទាប់កម្ពុជាត្រូវប៉ះឥណ្ឌូនេស៊ី ដើម្បីកាត់សេចក្ដីថាកម្ពុជាអាចឡើងទៅកាន់វគ្គពាក់កណ្ដាលផ្ដាច់ព្រ័ត្ន ឬក៏ធ្លាក់ត្រឹមវគ្គចែកពូល។ កម្ពុជានៅមានឱកាសឡើងទៅកាន់វគ្គពាក់កណ្ដាលផ្ដាច់ព្រ័ត្នបាន ប្រសិនបើប្រកួតក្រោយអាចយកឈ្នះឥណ្ឌូនេស៊ី ហើយមីយ៉ាន់ម៉ាប្រកួតចាញ់ហ្វីលីពីន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ