ទិវាពលកម្មអន្តរជាតិ៖ សហជីពទាមទាររដ្ឋាភិបាលតម្លើងប្រាក់ខែកម្មករឲ្យបាន២៥០ដុល្លារក្នុងមួយខែ
ក្រុមបណ្តាសហជីព និងកម្មករប្រមាណជាង២ពាន់នាក់ នៅព្រឹកថ្ងៃចន្ទនេះ បានជួបជុំគ្នាដើម្បីប្រារព្ធទិវាពលកម្មអន្តរជាតិ ១ឧសភា។ សម្រាប់ទិវាពលកម្មអន្តរជាតិនៅឆ្នាំនេះ ក្រុមបណ្តាសហជីពបានលើកពីបញ្ហាប្រឈមរបស់កម្មករ ដោយមានសំណើរហូតដល់១៨ចំណុច ដើម្បីទាមទារឲ្យរដ្ឋាភិបាលអន្តរាគមន៍។ ក្នុងនោះការសុំតម្លើងប្រាក់ខែ២៥០ដុល្លារ បានស្ថិតនៅក្នុងសំណើដែលសហជីពតំណាងកម្មករចង់បាន។
ចុះផ្សាយនៅថ្ងៃ៖
ស្តាប់ - ០២:០០
សំណើទាំង១៨ចំណុចរបស់តំណាងសហជីព និងសមាគមការពារកម្មករ រួមមានជាអាទិ៍ ការស្នើសុំរដ្ឋាភិបាលឲ្យតម្លើងប្រាប់ខែចំនួន២៥០ដុល្លារដល់កម្មករក្នុងវិស័យកាត់ដេរ, ការទាមទារឲ្យរដ្ឋាភិបាលបញ្ចុះថ្លៃប្រេងសាំង អត្រាការប្រាក់ធនាគារ និងតម្លៃជីកសិកម្ម, ការទាមទារឲ្យរដ្ឋបញ្ចូលថ្ងៃឈប់សម្រាកដែលមានប្រាក់ឈ្នួលឡើងវិញ, និងការទាមទារឲ្យរដ្ឋាភិបាលទម្លាក់ចោលបទចោទលើបណ្តាសហជីពដែលកំពុងជាប់ឃុំឃាំង និងជាពិសេសករណីតំណាងសហជីពនៅក្រុមហ៊ុនណាហ្គាវើលដ៍ ជាដើម។
ក្រៅពីនេះ បណ្តាសហជីពចម្រុះវិស័យ បានទាមទារឲ្យរដ្ឋាភិបាល ធ្វើវិសោធនកម្មច្បាប់ស្តីពីសហជីព ដើម្បីធានាថាកម្មករមានសិទ្ធិពេញលេញ ក្នុងការចូលរួមជាមួយសហជីព និងមានសិទ្ធិពឹងពាក់សហជីពធ្វើជាតំណាង និងធ្វើកូដកម្ម។ បន្ថែមពីនេះទៀតសោត ការគាំពារផ្នែកសុខភាព សុវត្ថិភាពកន្លែងការងារសម្រាប់កម្មករចំណាកស្រុក ឲ្យជៀសផុតពីការជួញដូរ ក៏ត្រូវបានភាគីសហជីពលើកជាចំណុចស្នើមួយផងដែរ។
បើតាមលិខិតដល់ដាក់ជូនលោក ហេង សំរិន ប្រធានរដ្ឋសភា នៅព្រឹកនេះ តំណាងសហជីពបានកត់សម្គាល់ថា កម្មករនៅពើបប្រទះនឹងបញ្ហាប្រឈមជាច្រើន ដែលមិនទាន់អាចរកឃើញដំណោះស្រាយ។ បញ្ហាទាំងនោះ គឺការផ្តល់ប្រាក់ឈ្នួលទាប សុខមាលភាព និងសុវត្ថិភាពការងារនៅមិនទាន់រៀបចំបានល្អ។ រីឯការប្រើប្រាស់សិទ្ធិតវ៉ា និងកូដកម្មដោយសន្តិវិធី ក៏ត្រូវបានអាជ្ញាធររឹតបន្តឹង ដែលទាំងនេះភាគសហជីពលើកឡើងថា កម្មករបានរងគ្រោះទ្វេដង។
នៅក្នុងទិវាពលកម្មអន្តរជាតិនេះដែរ នៅក្នុងសារលិខិតដោយឡែករបស់លោក ហ៊ុន សែន វិញ បានបង្ហាញ តួលេខថា បច្ចុប្បន្នពលករកម្ពុជា ដែលកំពុងធ្វើការនៅក្រៅប្រទេសមានប្រមាណ ១.៣លាននាក់ ខណៈអត្រាមានការងារក្នុងប្រទេសរក្សាបាន ៩៩.៣%។ មិនត្រឹមតែអាចបានប្រាក់ចំណូល បានចំណេះជំនាញប៉ុណ្ណោះទេ ថែមទាំងអាចផ្ញើប្រាក់បញ្ញើមកក្នុងប្រទេសជូនគ្រួសារ និងចូលរួមការអភិវឌ្ឍប្រទេសជាតិ។ បើតាមលោក ហ៊ុន សែន រដ្ឋាភិបាលកម្ពុជាកំពុងបន្តយកចិត្តទុកដាក់ខ្ពស់ក្នុងការអភិវឌ្ឍទីផ្សារការងារ ដែលមានប្រាក់ចំណូលខ្ពស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ