លោក ហ៊ុន សែន ហាមពលរដ្ឋកុំឲ្យយកករណី ប៊ួ ខាវ បញ្ឆេះជាឈ្នាន់នយោបាយក្នុងព្រឹត្តិការណ៍ស៊ីហេ្គម
លោកនាយករដ្ឋមន្ត្រី ហ៊ុន សែន នៅថ្ងៃសុក្រ បានចេញសារជាសាធារណៈ ដោយហាមមិនឲ្យប្រជាពលរដ្ឋបញ្ឆេះករណីកីឡាករប្រដាល់ថៃ ប៊ួ ខាវ ទៅជាកំហឹងបែបនយោបាយ នាពេលដែលកម្ពុជាត្រូវរៀបចំព្រឹត្តិការណ៍ស៊ីហេ្គមនៅសប្តាហ៍ក្រោយ។ ការហាមប្រាមនេះ ធ្វើឡើងបន្ទាប់ពីសាធារណជនរិះគន់កីឡាករប្រដាល់ថៃ ដែលបានបរិយាយបញ្ចើចបញ្ចើជុំវិញកីឡា «គុនខ្មែរ» និង «MuayThai»។
ចុះផ្សាយនៅថ្ងៃ៖
ស្តាប់ - ០២:៣៩
នៅមិនទាន់ចប់នោះទេ ករណីកីឡាករប្រដាល់ថៃ ប៊ួ ខាវ ត្រូវបានលើកយកជជែកជាថ្មីពីសំណាក់អ្នកប្រើប្រាស់បណ្តាញសង្គមហ្វេសប៊ុក។ ក្រុមអ្នកប្រើប្រាស់បណ្តាញហ្វេសប៊ុក បានប្រើប្រាស់ពាក្យធ្ងន់ៗរិះគន់ ប៊ួ ខាវ បន្ទាប់ពីទទួលបានដំណឹងថាកីឡាករប្រដាល់ថៃដ៏ល្បីឈ្មោះរូបនេះ មកចូលរួមព្រឹត្តិការណ៍ស៊ីហ្គេមនៅកម្ពុជា។
ក៏ប៉ុន្តែបញ្ហានេះ លោកនាយករដ្ឋមន្ត្រី ហ៊ុន សែន បានចេញសារតាមបណ្តាញតេលេក្រាមរបស់ខ្លួនភ្លាមៗ ដោយហាមមិនឲ្យពលរដ្ឋប្រើប្រាស់ភាសាប្រមាថចំពោះភ្ញៀវដែលមកប្រទេសកម្ពុជាឡើយ។ បើតាមលោកនាយករដ្ឋមន្ត្រី ករណីកីឡាករ ប៊ួ ខាវ បើទោះបីជាមកឬមិនមក ក៏ប្រជាពលរដ្ឋខ្មែរមិនត្រូវបង្កើតការរើសអើង ឬស្អប់ខ្ពើមចំពោះ ប៊ួ ខាវ ទោះជាកីឡាករប្រដាល់ថៃរូបនេះ ធ្លាប់បានរិះគន់ពីប្រដាល់គុនខ្មែរ និងធ្វើអ្វីមិនសមរម្យលើខ្មែរក៏ដោយ។
ការណ៍ដែលប្រមុខរដ្ឋាភិបាល ចេញសារហាមប្រាមពលរដ្ឋមិនឲ្យប្រមាថលើកីឡាករ ប៊ួ ខាវ យ៉ាងដូច្នេះ គឺដោយដ្បិតថា លោក ហ៊ុន សែន បារម្ភពីការបញ្ឆេះកំហឹងបុគ្គលទៅជារឿងនយោបាយ ដែលអាចធ្វើឲ្យប៉ះពាល់ដល់ទំនាក់ទំនងរវាងកម្ពុជានិងថៃ។ តាមលោក ហ៊ុន សែន កីឡាករ ប៊ួ ខាវ តំណាងឲ្យប្រជាជនថៃចំនួន៦០លាននាក់ ដែលបញ្ហានេះវាក្លាយជាបញ្ហារវាងប្រទេសនិងប្រទេស ដែលចាំបាច់ត្រូវមានមិត្តភាពនិងសាមគ្គីភាពជាមួយគ្នា។
សម្រាប់លោក ហ៊ុន សែន អ្វីដែលពលរដ្ឋខ្មែរគួរប្រកាន់ខ្ជាប់ គឺការរក្សាបានភាពថ្លៃថ្នូរក្នុងឋានៈជាម្ចាស់ផ្ទះនៃព្រឹត្តិការណ៍ស៊ីហ្គេម និងយកឱកាសនេះកសាងមិត្តភាពជាមួយប្រទេសទាំងអស់ដែលបានមកចូលរួមប្រកួតប្រជែង។
គួរជម្រាបថា វិវាទមតិរបស់ប្រជាពលរដ្ឋខ្មែរចំពោះកីឡាករប្រដាល់ថៃ ប៊ួ ខាវ កើតមានឡើងបន្ទាប់ពីកីឡាករប្រដាល់ល្បីឈ្មោះរូបនេះ បាននិយាយរិះគន់ប្រដាល់«គុនខ្មែរ» ថាស្ថិតត្រឹមកម្រិតអាស៊ានប៉ុណ្ណោះ មិនអាចប្រៀបជាមួយ «MauyThai» ដែលស្ថិតក្នុងកម្រិតអូឡាំពិកឡើយ។ ការរិះគន់របស់ ប៊ួ ខាវ គឺក្រោយពេលកម្ពុជាក្នុងនាមជាម្ចាស់ផ្ទះបានសម្រេចដាក់បញ្ចូលកីឡា «គុនខ្មែរ» ជាវិញ្ញាសារប្រកួតប្រជែងមួយក្នុងព្រឹត្តិការណ៍ស៊ីហ្គេមលើកទី៣២ ខណៈដែលភាគីថៃក៏សម្រេចពហិកាមិនចូលរួមក្នុងប្រភេទវិញ្ញាសារមួយនេះ។
គួរបញ្ជាក់ផងដែរថា នៅមុននៃព្រឹត្តិការណ៍ស៊ីហ្គេមចូលមកដល់ ភាគីថៃ តាមរយៈលោកនាយករដ្ឋមន្ត្រី ប្រាយុទ្ធ ចាន់អូចា ក៏បានប្រាប់ដល់កីឡាកររបស់ខ្លួន ដោយមិនឲ្យយកការប្រកួតស៊ីហ្គេមទៅលូកលាន់ជាមួយបញ្ហានយោបាយជាដាច់ខាត។ លោកប្រាយុទ្ធ បារម្ភថាការលូកលាន់នឹងបញ្ហានយោបាយក្នុងព្រឹត្តិការណ៍កីឡា នឹងធ្វើឲ្យការប្រកួតស៊ីហ្គេមដែលកម្ពុជាជាម្ចាស់ផ្ទះ មានភាពវឹកវរ និងអាចប៉ះពាល់ដល់ទំនាក់ទំនងរវាងប្រទេសនឹងប្រទេស។
ហើយសម្រាប់មេដឹកនាំថៃរូបនេះ គឺកីឡាករថៃត្រូវរក្សាទំនាក់ទំនងឲ្យល្អជាមួយកម្ពុជា ដោយត្រូវមានភាពអត់ធ្មត់ ដ្បិតកម្ពុជា-ថៃ ជាប្រទេសភូមិផងរបងជាមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ