បញ្ហាព្រំដែន៖ កម្ពុជានិងឡាវព្រមព្រៀងគ្នាបោះបង្គោលបន្ថែមចំនួន ៣៨៧បង្គោលទៀត
កម្ពុជានិងឡាវបានព្រមព្រៀងគ្នារៀបចំបង្គោលព្រំដែន ដោយរួមគ្នាបោះបង្គោលបន្ថែមចំនួន ៣៨៧បង្គោលទៀត។ ការព្រមព្រៀងគ្នានេះធ្វើឡើង ក្នុងជំនួបរវាងរដ្ឋមន្ត្រីក្រសួងការបរទេសឡាវ និង លោក វ៉ា គឹមហុង ប្រធានគណៈកម្មាការចម្រុះកិច្ចការព្រំដែនឡាវ-កម្ពុជា នៅខេត្តព្រះសីហនុ កាលពីថ្ងៃទី២១មេសា។ នេះបើតាមសេចក្តីប្រកាសរបស់ក្រសួងការបរទេសឡាវ ចុះផ្សាយនៅក្នុងកាសែតក្នុងស្រុកឡាវ វៀងចន្ទ ថាម កាលពីថ្ងៃចន្ទ។
ចុះផ្សាយនៅថ្ងៃ៖
ស្តាប់ - ០២:៥៤
ក្នុងជំនួបពិភាក្សារវាងរដ្ឋមន្ត្រីក្រសួងការបរទេសឡាវ លោក Saleumxay Kommasith ជាមួយលោក វ៉ា គឹមហុង ប្រធានគណៈកម្មាការចម្រុះកិច្ចការព្រំដែនកម្ពុជា-ឡាវ ភាគីទាំងពីរបានព្រមព្រៀងគ្នា បោះបង្គោលព្រំដែនចំនួន ៣៨៧ទៀតនេះ នឹងត្រូវតម្លើងនៅក្នុងតំបន់ចាំបាច់ រួមទាំងនៅតាមខ្សែបន្ទាត់ព្រំដែន និងសហគមន៍ដែលមានប្រជាជនរស់នៅច្រើន។ បើតាមក្រសួងការបរទេសឡាវ កម្ពុជានិងឡាវនឹងរៀបចំធ្វើការងាររួមគ្នានៅតាមទីតាំងព្រំដែន ដែលចាប់ផ្តើមការងារនៅដើមខែឧសភាខាងមុខនេះ ហើយបញ្ចប់ការបោះបង្គោលក្នុងរយៈពេល២ឆ្នាំ។
ក្នុងជំនួបនោះ ភាគីឡាវក៏បានលើកឡើងថា ភាគីកម្ពុជានិងឡាវ បានពិភាក្សាគ្នាដែរ អំពីចំនុចខ្វែងគំនិតគ្នាជុំវិញខ្សែបន្ទាត់ព្រំដែនសេសសល់១៤ភាគរយ ខណៈ៨៦%ទៀត កម្ពុជាបានទទួលយកលទ្ធផលនៃការត្រួតពិនិត្យខ្សែព្រំដែនរួមជាមួយឡាវ កាលពីថ្ងៃទី១៧មីនាកន្លងទៅ។ ភាគីទាំងពីរក៏បានឈានដល់ការឯកភាពគ្នា ដើម្បីធ្វើការរួមគ្នាអនុវត្តសន្ធិសញ្ញាព្រំដែន រវាងឡាវនិងកម្ពុជា ដែលរដ្ឋាភិបាលទាំងពីរបានចុះហត្ថលេខាកាលពីថ្ងៃទី១៣ ខែកុម្ភៈ ឆ្នាំ២០២៣ផងដែរ។
ចំនុចខ្វែងគំនិតគ្នាជុំវិញខ្សែបន្ទាត់ព្រំដែនសេសសល់១៤ភាគរយនេះ បើតាមលោកស្រី កុយ ពិសី អនុប្រធានគណៈកម្មាធិការចម្រុះព្រំដែនកម្ពុជា ធ្លាប់បានបញ្ជាក់ថា ភាគីកម្ពុជា-ឡាវ នឹងបន្តដោះស្រាយគ្នាប្រកបដោយសុទិដ្ឋិនិយមខ្ពស់ ចំពោះព្រំដែនដែលនៅសេសសល់១៤%នេះ។
ពាក់ព័ន្ធបញ្ហាព្រំដែនរវាងកម្ពុជានិងឡាវនេះ កន្លងទៅលោកបណ្ឌិត មាស នី អ្នកតាមដានសង្គម និងជាអ្នកស្រាវជ្រាវឲ្យដឹងថា កិច្ចការងារព្រំដែនជាតួនាទីរបស់រដ្ឋាភិបាលពង្រឹងសមត្ថភាពក្នុងការពារព្រំដែននៅគ្រាប្រទេសមានសុខសន្តិភាព។ ប៉ុន្តែជារឿងគួរឲ្យសោកស្ដាយដែលកិច្ចការងារព្រំដែន និងជាពិសេសការទទួលយកយកលទ្ធផលនៃការត្រួតពិនិត្យខ្សែព្រំដែនរួម៨៦ភាគរយជាមួយឡាវ គឺធ្វើឡើងក្នុងរូបភាពមិនចុះសម្រុងគ្នារវាងខ្មែរនិងខ្មែរ។ បើខ្មែរនិងខ្មែរមានភាពមិនចុះសម្រុងគ្នាលើកិច្ចការងារព្រំដែន វាអាចនាំឲ្យមានការតវ៉ាឬសើរើឡើងវិញ ក្នុងករណីព្រំដែនដែលបានកំណត់នោះមានការលើសសល់ ឬខ្វះខាតដោយកន្លែងណាមួយ។
គួររំលឹកថា កាលពីឆ្នាំ២០១៩ នាយករដ្ឋមន្ត្រីកម្ពុជា-ឡាវ បានសរសេរលិខិតរួមគ្នាមួយទៅកាន់ប្រធានាធិបតីបារាំង ដោយមានគោលដៅពីរសំខាន់គឺទី១ ស្នើសុំបារាំងបញ្ជូនអ្នកជំនាញខាងគូសចម្លងផែនទីមកជួយគូសចម្លងផែនទី នៅតំបន់ដែលនៅសេសស់មិនទាន់ត្រូវគ្នាចំនួន១៤% និងចំណុចទី២ ភាគីទាំងពីរស្នើសុំផែនទីពីបារាំង។ សំណើរនេះត្រូវបានរដ្ឋាភិបាលបារាំងយល់ព្រម ក៏ប៉ុន្តែភាគីកម្ពុជា-ឡាវ ត្រូវសម្របសម្រួលរកចំណុចរួមមួយសិន ថាតើចង់ឲ្យបារាំងជួយយ៉ាងដូចម្តេច លើចំណុចអ្វីច្បាស់លាស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ