តុលាការសហរដ្ឋអាមេរិកបើកសវនការលើមន្ត្រីកម្ពុជាក្នុងបទល្មើសរត់ពន្ធសត្វស្វាក្តាម
តុលាការរដ្ឋផ្លរីដា នៅថ្ងៃសុក្របានសម្រេចបើកសវនការលើមន្ត្រីកម្ពុជា ក្នុងបទល្មើសរត់ពន្ធសត្វស្វាក្តាមចូលទឹកដីអាមេរិក។ នេះជាសវនាការលើកដំបូង ខណៈដែលលោក គ្រី ម៉ះផល មន្ត្រីក្រសួងកសិកម្មខ្មែរ ត្រូវបានអាជ្ញាធរអាមេរិកចាប់ខ្លួនតាំងពីខែវិច្ឆិកាឆ្នាំ២០២២។
ចុះផ្សាយនៅថ្ងៃ៖
ស្តាប់ - ០១:៣៩
នៅថ្ងៃសុក្រ តុលាការអាមេរិកក្នុងរដ្ឋផ្លរីដា បានបើកសវនាការជាលើកដំបូងលើករណីលោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះនៃក្រសួងកសិកម្ម ពីបទរត់ពន្ធសត្វស្វាក្តាម ដែលគេចាត់ទុកថាជាសត្វកម្រជិតផុតពូជ ចូលទៅកាន់ទឹកដីអាមេរិក។ សវនាការលើកដំបូងនេះ ជាសវនាការផ្ទៀងផ្ទាត់ចម្លើយ ខណៈដែលមេធាវីការពារក្តីឲ្យលោក គ្រី ម៉ះផល ស្នើសុំតុលាការមិនឲ្យទទួលយកអ្វីដែលលោក គ្រី ម៉ះផល បាននិយាយអំឡុងពេលចាប់ខ្លួន នៅឯព្រលានយន្តហោះក្នុងក្រុងញូយ៉ក មកធ្វើជាភស្តុតាងដាក់បន្ទុក។ ការធ្វើយ៉ាងនេះ ដោយមេធាវីការពារមន្ត្រីកម្ពុជា លើកឡើងថា កូនក្តីរបស់ខ្លួនមិនសូវយល់ពីរបៀបរបបរបស់សហរដ្ឋអាមេរិក។
យ៉ាងណាមិញ សវនាការផ្ទៀងផ្ទាត់ចម្លើយជាបន្តទៀត នឹងត្រូវធ្វើឡើងនៅថ្ងៃសុក្រទី២៨ខាងមុខ ខណៈដែលសវនាការដេញដោលនឹងត្រូវធ្វើឡើងនៅខែមិថុនា។
សូមបញ្ជាក់ថា លោក គ្រី ម៉ះផល មន្ត្រីកម្ពុជាដែលជាប្រធាននាយកដ្ឋានសត្វព្រៃនិងជីវចម្រុះ ត្រូវបានចាប់ខ្លួននៅក្នុងព្រលានយន្តហោះ ក្នុងក្រុងញូយ៉ក សហរដ្ឋអាមេរិក កាលពីថ្ងៃទី១៦ខែវិច្ឆិកា។ បើតាមក្រសួងយុត្តិធម៌អាមេរិក មានភស្តុតាងដាក់បន្ទុកចំនួន៣១ ដូចយ៉ាងប្រតិបត្តិការហិរញ្ញវត្ថុ និងការដឹកជញ្ជូនសត្វស្វារាប់រយក្បាលក្រោមឯកសារក្លែងបន្លំ ទៅកាន់រដ្ឋផ្លរីដា និងរដ្ឋតិចសាស់ ប្រទេសអាមេរិក និងទៅកាន់ក្រុមហ៊ុនឯកជនស្រាវជ្រាវផ្នែកជីវសាស្ត្រឈ្មោះ «Vanny Bio Research» របស់ជនជាតិហុងកុង ក្នុងខេត្តពោធិ៍សាត់ ប្រទេសកម្ពុជា។
លោក គ្រី ម៉ះផល អាចត្រូវប្រឈមនឹងការកាត់ទោសរហូតដល់៥ឆ្នាំ លើបទសមគំនិត និងអាចរហូតដល់២០ឆ្នាំ លើបទប្រកាន់រត់ពន្ធចំនួន ៧ករណី។ និងដោយត្រូវរងការផាកពិន័យជាទឹកប្រាក់ប្រមាណ ១៥ម៉ឺនដុល្លារអាមេរិក ឬ ២ដងនៃប្រាក់ចំណេញពីបទល្មើសរត់ពន្ធសត្វនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ