គ.ជ.ប អញ្ជើញស្ថានទូតរុស្ស៊ី ចូលរួមសង្កេតមើលការបោះឆ្នោតនៅកម្ពុជានាខែកក្កដា
គ.ជ.ប អញ្ជើញស្ថានទូតរុស្ស៊ី ចូលរួមសង្កេតមើលការបោះឆ្នោតនៅកម្ពុជានាខែកក្កដា ប្រធាន គ.ជ.ប បានអះអាងថានឹងអញ្ជើញស្ថានទូតនៅកម្ពុជា ដើម្បីចូលរួមសង្កេតមើលការបោះឆ្នោតជ្រើសរើសតាំងតំណាងរាស្ត្រ នីតិកាលទី៧ នៅថ្ងៃទី២៣ ខែកក្កដា ខាងមុខ។ នេះបើតាម ប្រធាន គ.ជ.ប ក្នុងជំនួបជាមួយឯកអគ្គរដ្ឋទូតរុស្ស៊ីប្រចាំកម្ពុជា កាលពីថ្ងៃព្រហស្បតិ៍។ ប្រទេសសេរីមួយចំនួនបានប្រកាសមិនបញ្ជូនអ្នកសង្កេតការណ៍មកឃ្លាំមើលការបោះឆ្នោតនៅកម្ពុជាទេ។
ចុះផ្សាយនៅថ្ងៃ៖
ស្តាប់ - ០២:១០
សម្រាប់អ្នកសង្កេតការណ៍បោះឆ្នោត លោក ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត(គ.ជ.ប) បានបញ្ជាក់ថា គ.ជ.ប នឹងអញ្ជើញស្ថានទូតនៅកម្ពុជា ដើម្បីចូលរួមសង្កេតមើលការបោះឆ្នោតជ្រើសតាំងតំណាងរាស្ត្រ នីតិកាលទី០៧ នៅថ្ងៃអាទិត្យ ទី២៣ ខែកក្កដា ឆ្នាំ២០២៣ ជាភ្ញៀវពិសេស។ នេះបើតាមសេចក្តីប្រកាសព័ត៌មានរបស់ គ.ជ.ប ស្តីពីជំនួបរវាងលោក ប្រាជ្ញ ចន្ទ ប្រធាន គ.ជ.ប និងឯកអគ្គរដ្ឋទូតរុស្ស៊ីប្រចាំកម្ពុជា កាលពីថ្ងៃទី២០ ខែមេសា។
លោក អាណាតូលី បូរ៉ូវីក (Anatoly BOROVIK) ឯកអគ្គរដ្ឋទូតរុស្ស៊ីប្រចាំកម្ពុជា បានប្រាប់ប្រធាន គ.ជ.ប ថា ចំពោះការបោះឆ្នោតជ្រើសតាំងតំណាងរាស្ត្រ នីតិកាលទី០៧ ខាងមុខនេះ គឺជាព្រឹត្តិការណ៍ប្រវត្តិសាស្ត្រដ៏សំខាន់របស់កម្ពុជា ហើយសភាស៊ីវិលនៅរុស្ស៊ី មានការចាប់អារម្មណ៍ និងតាមដាន។ តាមបណ្តាញសង្គម Twitter របស់ខ្លួន ឯកអគ្គរដ្ឋទូតរុស្ស៊ីរូបនេះ បានសរសេរថាជំនួបរវាងប្រធាន គ.ជ.ប បានពិភាក្សាលើប្រធានបទជាច្រើនពាក់ព័ន្ធកិច្ចសហការគ្នា ក្នុងនោះក៏មានការចែករំលែកនូវបទពិសោធន៍ដែរ។
កាលពីថ្ងៃទី២៩ ខែមីនា ស្ថានទូតបារាំងប្រចាំកម្ពុជាបានបញ្ជាក់នៅលើបណ្តាញសង្គម Twitter របស់ខ្លួនថាបារាំងមិនមានបំណងបញ្ជូនអ្នកសង្កេតការណ៍ជាតិ ដើម្បីឃ្លាំមើលការបោះឆ្នោតនៅកម្ពុជានាខែកក្កដាខាងមុខនេះទេ។
ស្ថានទូតបារាំងបញ្ជាក់ថាបារាំងបន្តលើកទឹកចិត្តដល់ការបង្កើតបរិយាកាសដែលអនុញ្ញាតឱ្យគណបក្សប្រឆាំង ប្រព័ន្ធផ្សព្វផ្សាយ និងសង្គមស៊ីវិលដំណើរការដោយគ្មានឧបសគ្គ។ ចំណុចទាំងនេះមានសារៈសំខាន់សម្រាប់ការបោះឆ្នោតដោយសេរី និងយុត្តិធម៌។ ក្រៅពីបារាំង ប្រទេសលោកសេរីមួយចំនួនទៀតក៏មិនមានបំណងបញ្ជូនអ្នកសង្កេតការណ៍កម្ពុជាដែរ។
លោក ហង្ស ពុទ្ធា អ្នកនាំពាក្យ គ.ជ.ប បានថ្លែងប្រាប់វិទ្យុបារាំងអន្តរជាតិ នៅថ្ងៃទី២២ ខែមេសានេះថា ប្រធាន គ.ជ.ប បានជូនដំណឹងរួចហើយ ទៅតាមបណ្តាស្ថានទូត ដែលមានបំណងឃ្លាំមើលការបោះឆ្នោតនៅកម្ពុជា។ លោកបន្តថា ចំពោះប្រទេសមួយចំនួនដែលមិនមានបំណងបញ្ជូនអ្នកសង្កេតការណ៍មកម្ពុជា គឺជារឿងធម្មតាទេ ដោយសារការបោះឆ្នោតគឺប្រព្រឹត្តិទៅក្នុងប្រទេសនីតិរដ្ឋ ផ្អែកលើច្បាប់។ តាមខ្លឹមសារច្បាប់ អង្គការក្រៅរដ្ឋាភិបាល ឬបក្សនយោបាយអាចដាក់អ្នកសង្កេតការណ៍របស់ខ្លួន ហើយដាក់ក៏បាន មិនដាក់ក៏បាន ប៉ុន្តែដំណើរប្រព្រឹត្តិទៅនៃការបោះឆ្នោត គឺគ្រប់គ្រាន់រួចទៅហើយ។ នេះជាការបញ្ជាក់របស់ លោក ហង្ស ពុទ្ធា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ