ក្រសួងទេសចរណ៍៖ ២ថ្ងៃនៃអង្គរសង្ក្រាន្ត និងសង្ក្រាន្តទូទាំងប្រទេសទាក់ទាញទេសចរបានជាង៦លាននាក់
ព្រឹត្តិការណ៍អង្គរសង្ក្រាន្ត និងសង្ក្រាន្តទូទាំងប្រទេស ក្នុងឱកាសបុណ្យចូលឆ្នាំថ្មីគិតត្រឹមថ្ងៃទី១៤ ដល់ថ្ងៃទី១៥ ខែមេសា បានទាក់ទាញអ្នកធ្វើដំណើរកម្សាន្ត ជាង៦លាននាក់។ នេះបើតាមការបញ្ជាក់របស់រដ្ឋមន្ត្រីក្រសួងទេសចរណ៍ នៅថ្ងៃទី១៦ ខែមេសានេះ ដែលជាថ្ងៃចុងក្រោយនៃពិធីបុណ្យចូលឆ្នាំថ្មី។
ចុះផ្សាយនៅថ្ងៃ៖
ស្តាប់ - ០១:៣៦
លោក ថោង ខុន រដ្ឋមន្ត្រីក្រសួងទេសចរណ៍បានថ្លែងប្រាប់វិទ្យុបារាំងអន្តរជាតិ នៅថ្ងៃទី១៦ ខែមេសាថាក្នុងរយៈពេល ២ថ្ងៃនៃអង្គរសង្ក្រាន្ត និងសង្ក្រាន្ត ទូទាំងប្រទេស អាចទាក់ទាញទាក់ប្រជាពលរដ្ឋឲ្យធ្វើដំណើរកម្សាន្ត ទូទាំងប្រទេស បានជាង ៦លាននាក់។ បើតាមរដ្ឋមន្ត្រីទេសចរណ៍ ថ្ងៃទី១នៃឱកាសចូលឆ្នាំថ្មី ដែលត្រូវចំថ្ងៃទី១៤ ខែមេសា មានពលរដ្ឋជាង ២លាននាក់ធ្វើដំណើរកម្សាន្ត និង ថ្ងៃទី២ មានប្រជាពលរដ្ឋជាង ៤ លាននាក់ធ្វើដំណើរកម្សាន្ត។
លោកបញ្ជាក់ថា“ក្រោយកូវីដ១៩ ព្រិត្តការណ៍អង្គរសង្ក្រាន្ត ជាព្រឹត្តិការណ៍ វប្បធម៌ទេសចរណ៍ដ៏ធំ ហើយនៅខែឧសភា ខាងមុខ SEAGAMES២០២៣ ក៏ជាព្រិត្តិការណ៍ កីឡាទេសចរណ៍ដ៏ធំផងដែរ។ ព្រឹត្តិការណ៍ ទាំងពីរនេះ គឺជាផលិតផលទសចរណ៍ដ៍ធំពិសេស ដែលក្រោយកូវី១៩ គ្រប់ប្រទេសសុទ្ធ តែចង់ឲ្យមានព្រិត្តិការណ៍របៀបនេះ។”
បើតាមក្រសួងទេសចរណ៍ចរន្តនៃការដើរកម្សាន្តនាថ្ងៃចូលឆ្នាំប្រពៃណីជាតិថ្ងៃទី១ឆ្នាំ២០២៣នេះ មានសភាពផុសផុលខ្លាំងធៀបនឹងថ្ងៃចូលឆ្នាំថ្ងៃទី១ កាលពីឆ្នាំ២០២២។ ជាក់ស្តែង តួលេខខាងលើ មានការកើនឡើងប្រមាណ១៤៣,១៩ភាគរយ ធៀបនឹងថ្ងៃចូលឆ្នាំថ្ងៃទី១ ឆ្នាំ២០២២ ដែលភ្ញៀវសរុបមានត្រឹមតែប្រមាណ ៨៦ ម៉ឺននាក់ប៉ុណ្ណោះ។
កាលពីថ្ងៃទី១៥ ខែមេសាក្រសួងទេសចរណ៍បានបញ្ជាក់ថា សភាពការណ៍សន្តិសុខ សណ្តាប់ធា្នប់ សុវត្ថិភាព ការគ្រប់គ្រងចរន្តភ្ញៀវ និងការគ្រប់គ្រងគុណភាព និងតម្លៃសេវាទេសចរណ៍នានា មិនមានបញ្ហាធំដុំណាមួយកើតឡើងទេនៅថ្ងៃចូលឆ្នាំទី១នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ