លោក ស ខេង ប្រាប់សមត្ថកិច្ចត្រូវបង្ក្រាបការលេងល្បែងស៊ីសង់នាឱកាសចូលឆ្នាំ
អាប៉ោង ជល់មាន់ ឬល្បែងស៊ីសង់ដទៃទៀត ត្រូវបានលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃប្រាប់កម្លាំងសមត្ថកិច្ចបង្ក្រាបឲ្យខានតែបាននា ឱកាសបុណ្យចូលឆ្នាំឬក្រោយចប់ចូលឆ្នាំដោយយកលំអានតាមយុទ្ធនាការបង្ក្រាបនាពេលកន្លងមក។
ចុះផ្សាយនៅថ្ងៃ៖
ស្តាប់ - ០២:១២
«សុំយកចិត្តទុកដាក់ទាំងអស់គ្នា…ជាពិសេសកម្លាំងសមត្ថកិច្ចមិនត្រូវ ឃុបឃិត ស៊ុមគ្រលុំ(សមគំនិតគ្នាបិតបាំងលាក់ទោសអំពើអាក្រក់) ឬបិទភ្នែកម្ខាង បើកភ្នែកម្ខាង មើលល្បែងស៊ីសង់ខុសច្បាប់នោះទេ។» លោក ស ខេង ឆ្លៀតនិយាយបែបនេះនៅគ្រាលោកអញ្ជើញបើកព្រឹត្តិការណ៍សង្ក្រាន្តខេត្តបាត់ដំបងនៅថ្ងៃទី១២មេសា។ បើតាមលោក ស ខេង ការបង្ក្រាបល្បែងស៊ីសង់គ្មានអ្វីលំបាកទេ ព្រោះគោលការណ៍មានអស់ហើយ ហើយការបង្ក្រាបល្បែងស៊ីសង់នាឱកាសបុណ្យចូលឆ្នាំប្រពៃណីជាតិ ត្រូវយកលំអានតាមយុទ្ធនាការបង្ក្រាបនាពេលមក។
លោក មាស នី អ្នកស្រាវជ្រាវសង្គមកត់សម្គាល់ថា ការលេងល្បែងស៊ីសងនាឱកាសឈប់សម្រាកបុណ្យចូលឆ្នាំខ្មែរមានការថមថយបើធៀបនឹងឆ្នាំមុន ប៉ុន្តែអ្វីដែលបន្តកើតមាននឹងរឹតតែព្រួយបារម្ភនោះគឺការសេពគ្រឿងស្រវឹងក្នុងឱកាសនេះមានកើនឡើង។ ការថមថយនៃការល្បែងស៊ីសង់លោកយល់ថា អាចដោសារគោលការណ៍ថ្នាក់លើមានភាពម៉ឺងម៉ាត់ដែលថ្នាក់ក្រោមត្រូវតោងប្រយ័ត្នក្នុងការអនុវត្ត។
សម្រាប់លោក ស ខេង ផលប៉ះពាល់ដែលបន្សល់ទុកពីការលេងល្បែងស៊ីមានច្រើនណាស់ដូចជាៈប៉ះពាល់សុភមង្គល ភាពសុខដុមរមនានៅក្នុងគ្រួសារ ប៉ះពាល់ជីវភាពប្រចាំថ្ងៃ ហិង្សា នាំឲ្យមានចោរកម្មជាដើម។
គួរចាប់អារម្មណ៍ថា ការដាស់តឿននេះធ្វើឡើងស្របពេលយុទ្ធនាការបង្ក្រាបល្បែងស៊ីសង់នៅទូទាំងប្រទេសហាក់ទម្លាក់ដៃ មិនដូចគ្រាដំបូងបន្ទាប់ពីបទបញ្ជារបស់លោកនាយករដ្ឋមន្ត្រី ហ៊ុន សែន ធ្លាក់មក។ នៅយុទ្ធនាការបង្ក្រាបល្បែងស៊ីសង់ខុសច្បាប់នាពេលកន្លងមក លោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃទី១៤ ខែកញ្ញាឆ្នាំ២០២២ បានចេញលិខិតបង្គាប់ការមួយចាត់ឲ្យលោក សុខ ផល រដ្ឋលេខាធិការក្រសួងមហាផ្ទៃ ដឹកនាំក្រុមការងារដើម្បីបង្ក្រាបល្បែងស៊ីសងខុសច្បាប់គ្រប់ប្រភេទនៅទូទាំងប្រទេស។
ប៉ុន្មានថ្ងៃក្រោយមកលោកនាយករដ្ឋមន្ត្រី ហ៊ុន សែន ក៏បានចេញមកព្រមានដកតំណែងមន្ត្រីមូលដ្ឋានណា ដែលមិនមានឆន្ទៈបង្រ្កាបល្បែងស៊ីសងខុសច្បាប់ ដែលកំពុងកើតមានយ៉ាងអណាធិបតេយ្យនោះ។ ខេត្តព្រះសីហនុ គឺជាគោលដៅចំបងមួយក្នុងការត្រួតពិន្យសកម្មភាពល្បែងស៊ីសងខុសច្បាប់ និង ស្វែងរកបទល្មើសជួញដូរមនុស្ស បទល្មើសសម្អាតប្រាក់ ឬលាងលុយកខ្វក់ជាដើម។
យុទ្ធការកាលណោះមនុស្សជាង១ម៉ឺននាក់ត្រូវបានឃាត់ខ្លួនជាបន្តបន្ទាប់ នៅក្នុងយុទ្ធនាការបង្ក្រាបល្បែងស៊ីសងខុសច្បាប់ជាង ៩.០០០ ទីតាំង រយៈពេល ១៧ ថ្ងៃ គិតចាប់ពីថ្ងៃទី១៥ ខែកញ្ញា ដល់ថ្ងៃទី ១ ខែតុលាឆ្នាំ២០២២។ ក្នុងចំណោមមនុស្សដែលត្រូវបានឃាត់ខ្លួននេះ គឺមានមួយចំនួន ត្រូវបានធ្វើការអប់រំ និងធ្វើកិច្ចសន្យា ខណៈមនុស្សមួយចំនួនទៀត ត្រូវបញ្ជូនទៅតុលាការ ដើម្បីចាត់ការតាមនីតិវិធីច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ