មន្ត្រីជាន់ខ្ពស់ក្រសួងសេដ្ឋកិច្ចថា ឧបសគ្គ៤ដែលបង្អាក់លំហូរវិនិយោគដោយផ្ទាល់ពីបរទេសមកកម្ពុជា
មន្ត្រីជាន់ខ្ពស់ក្រសួងសេដ្ឋកិច្ចអះអាងថា កម្ពុជានៅបន្តជួបឧបសគ្គ៤ធំៗ ដែលជានិច្ចកាលតែងរារាំងឱកាសចាប់យកផលប្រយោជន៍ និងទំហំវិនិយោគដោយផ្ទាល់ពីបរទេស ធៀបនឹងបណ្តាប្រទេសដទៃទៀតក្នុងតំបន់ បើទោះបីក្នុងរយៈពេលជាង១ទសវត្សមកនេះ លំហូរវិនិយោគិនពីបរទេសមកកម្ពុជាហាក់មានចំនួនច្រើនក្រែលដែរ ។ សម្រាប់ក្រសួងសេដ្ឋកិច្ច ឧបសគ្គនេះបាននឹងកំពុងដោះស្រាយជាបន្តបន្ទាប់ ខណៈច្បាប់វិនិយោគថ្មីរបស់កម្ពុជា នឹងក្លាយជាចលករដ៏សំខាន់មួយក្នុងការស្រូបទាញកំណើនអ្នកវិនិយោគពីបរទេស។
ចុះផ្សាយនៅថ្ងៃ៖
ស្តាប់ - ០៣:០១
ថ្លែងក្នុងកិច្ចប្រជុំស្តីពីកិច្ចសន្ទនាគោលនយោបាយតាមវិស័យនៅកម្ពុជា នាព្រឹកថ្ងៃទី០៦ ខែមេសា ឆ្នាំ២០២៣ លោក ផាន់ ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុបានកត់សម្គាល់ថា បញ្ហារួមធំទាំង៤ដែលវិស័យឯកជន អ្នកវិនិយោគបរទេសតែងលើកឡើងជាបន្តបន្ទាប់ ហើយបានបង្អាក់មិនឱ្យកម្ពុជាមានឱកាសស្រូបយកកំណើននៃការវិនិយោគដោយផ្ទាល់ពីបរទេសបានច្រើននោះគឺ បញ្ហាផ្គត់ផ្គង់ និងតម្លៃអគ្គិសនី បញ្ហាកង្វះជំនាញលើវិស័យមួយចំនួន កង្វះធាតុចូល និងការកែសម្រួលលក្ខខណ្ឌធ្វើពាណិជ្ជកម្មតាមច្រកព្រំដែន។
បើតាមលោក ផាន់ ផល្លា ការវិនិយោគដោយផ្ទាល់ពីបរទេសមកកម្ពុជា គឺមានកំណើនគួរសមដោយរាប់ចាប់តាំងពីឆ្នាំ២០១០ រហូតដល់ឆ្នាំ២០២១ ទុនវិនិយោគមានការកើនឡើង៣ដង ដោយកើនពីចន្លោះ១.៤ពាន់លានដុល្លារក្នុងឆ្នាំ២០១០ ដល់៣.៥ពាន់លានដុល្លារក្នុងឆ្នាំ២០២១។ ចំណែកវិស័យដែលវិនិយោគិនបរទេស មកអភិវឌ្ឍន៍ក្នុងប្រទេសកម្ពុជា គឺភាគច្រើនវិស័យឧស្សហកម្ម រោងចក្រកាត់ដេរសំលៀកបំពាក់ ស្បែកជើង កាបូប និងមួយរយៈចុងក្រោយនេះ គឺវិស័យអចលនទ្រព្យ។
តែយ៉ាងណា កំណើននេះ កម្ពុជានៅមិនទាន់អាចប្រៀបធៀបជាមួយបណ្តាប្រទេសភូមិផងរបងជាប់គ្នាឡើយ។ ក៏ប៉ុន្តែនៅចំពោះមុខបញ្ហាដែលត្រូវបានលើកឡើងនេះ រដ្ឋាភិបាលកម្ពុជា តាមរយៈក្រសួងសេដ្ឋកិច្ចនិងហិរញ្ញវត្ថុ និងក្រុមប្រឹក្សាអភិវឌ្ឍន៍កម្ពុជា បានបន្តកែសម្រួលច្បាប់វិនិយោគថ្មីឱ្យកាន់តែល្អប្រសើរ និងជួយសម្រួលដល់ការវិនិយោគទាំងក្នុងស្រុក និងការវិនិយោគពីបរទេស។ ខណៈច្បាប់វិនិយោគថ្មីនេះ បើតាមមន្ត្រីជាន់ខ្ពស់ក្រសួងសេដ្ឋកិច្ចខាងលើ នឹងដាក់ឱ្យប្រើប្រាស់យ៉ាងយូរ២ខែទៀតប៉ុណ្ណោះ។
សូមជម្រាបជូនថា លំហូរវិនិយោគផ្ទាល់ពីបរទេសមកកម្ពុជានៅឆ្នាំ២០១០មានចំនួនទុនសរុប១.៤ពាន់លានដុល្លារ(១៤០០លាន) ។ ទុនវិនិយោគនេះបានបន្តកើនឡើងដល់១.៥ពាន់លានដុល្លារ ក្នុងឆ្នាំ២០១១ ខណៈឆ្នាំ២០១២ លំហូរវិនិយោគពីបរទេសកើនជិត២ពាន់លានដុល្លារ ឬប្រមាណ២% បើធៀបនឹងឆ្នាំ២០១១។ ក៏ប៉ុន្តែនៅឆ្នាំ២០១៣, ២០១៤ និង២០១៥ការវិនិយោគពីបរទេសបានដាំក្បាលចុះទៅវិញ ដោយធ្លាក់មកត្រឹមជាង១.៨ពាន់លានដុល្លារ។
បើតាមយោងតាមរបាយការណ៍របស់ធនាគារពិភពលោកបានបង្ហាញថា ក្នុងឆ្នាំ២០១៦ ទុនវិនិយោគពីបរទេសមានចំនួន ប្រមាណ ២ពាន់លានដុល្លារអាមេរិក កើនឡើងជាង១០ភាគរយ បើធៀបនឹងឆ្នាំ២០១៥។ ហើយអ្វីដែលគួរឲ្យកត់សម្គាល់នោះ គឺនៅឆ្នាំ២០១៧, ២០១៨, ២០១៩ និង២០២០ ទំហំទុនវិនិយោគបន្តហក់ឡើងខ្ពស់រហូតដល់ប្រមាណ៣.៦ពាន់លានដុល្លារ។ ប៉ុន្តែនៅឆ្នាំ២០២១ ការវិនិយោគដោយផ្ទាល់ពីបរទេសធ្លាក់ចុះមកវិញប្រមាណ៣.៩ភាគរយ ឬប្រមាណ៣.៤៨ពាន់លានដុល្លារ។
បើតាមធនាគារពិភពលោក ប្រទេសចិននៅតែជាប្រទេសឈរលំដាប់លេខរៀងទី១ ក្នុងចំណោមប្រទេសដែលមកបោះទុនវិនិយោគក្នុងប្រទេសកម្ពុជាច្រើនជាងគេ។ ដោយឡែក ប្រទេសកូរ៉េ ជប៉ុន ហុងកុង សឹង្ហបុរី វៀតណាម និងថៃ គឺជាប្រទេសដែលមានវត្តមានការវិនិយោគក្នុងប្រទេសកម្ពុជាផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ