បក្សភ្លើងទៀនសាទរ បក្សកាន់អំណាចដែលយកកម្មវិធីនយោបាយជួយវិស័យកសិកម្មរបស់ខ្លួនទៅអនុវត្ត
អនុប្រធានគណបក្សភ្លើង លោក ស៊ុន ឆ័យសាទរនៅពេលដែលគោលនយោបាយមួយចំនួនរបស់គណបក្សភ្លើងទៀនត្រូវបានបក្សកាន់អំណាចយកទៅអនុវត្ត ជាពិសេសលើវិស័យកសិកម្ម ដែលនេះសរបញ្ជាក់ពីសក្តានុពលនៃគោលនយោបាយរបស់គណបក្សភ្លើងទៀន។ បើតាមលោក ស៊ុន ឆ័យ បក្សភ្លើងទៀននឹងបន្តពង្រឹងលើគោលនយោបាយរបស់ខ្លួន ពិសេសវិស័យកសិកម្ម។ តែយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន បដិសេធថា មិនបានយកលំនាំតាមគោលនយោបាយរបស់បក្សភ្លើងទៀនមកអនុវត្តឡើយ។
ចុះផ្សាយនៅថ្ងៃ៖
ស្តាប់ - ០២:៣០
បន្ទាប់ពីប្រមុខរដ្ឋាភិបាលលោកនាយករដ្ឋមន្ត្រី ហ៊ុន សែន បង្ហាញឆន្ទះក្នុងការចាត់បញ្ចូនអ្នកជំនាញកសិកម្មទៅតាមបណ្តាឃុំសង្កាត់នៅទូទាំងប្រទេសដើម្បីជួយដោះស្រាយបញ្ហាកសិករឱ្យស្របទៅតាមគោលនយោបាយរបស់គណបក្សកាន់អំណាចសម្រាប់ការបោះឆ្នោតថ្នាក់ជាតិខាងមុខ លោក ស៊ុន ឆ័យ អនុប្រធានគណបក្សភ្លើងទៀនបានយកវេទិកាប្រកាសសុពលភាពក្រុមការងារ និងគណៈកម្មាធិការប្រតិបត្តិគណបក្សរាជធានីភ្នំពេញថា គោលនយោបាយរបស់គណបក្សភ្លើងទៀនមួយចំនួនដែលបានរៀបចំតាក់តែងពីឆ្នាំ២០១៣ ត្រូវបានគណបក្សកាន់អំណាចយកទៅអនុវត្ត ដែលនេះលោកយល់ថា គោលនយោបាយរបស់បក្សភ្លើងទៀនមិនអត់ប្រយោជន៍ឡើយ។
បើតាម លោក ស៊ុន ឆ័យ លោកស្វាគមន៍ចំពោះរដ្ឋាភិបាលដែលបានអនុវត្តនូវគោលនយោបាយលើវិស័យកសិកម្មតាមរយៈការចាត់មន្ត្រីជំនាញកសិកម្មទៅតាមឃុំនៃបណ្តាខេត្តទាំងអស់ក្នុងប្រទេសកម្ពុជា។ ប៉ុន្តែលោកថា ដើម្បីអាចដោះស្រាយបញ្ហាកសិករបាន លុះត្រាណាតែអ្នកជំនាញកសិកម្មទាំងអស់នោះ យល់ដឹងឱ្យច្បាស់ពីបញ្ហាប្រឈមរបស់កសិករ ខណៈលោកមិនចង់ឃើញអ្នកជំនាញកសិកម្មដែលចាត់ទៅជួយកសិករ មិនទាន់ចេះរបៀបដាំដុះ ឬរបៀបរៀបចំប្រព័ន្ធធារាស្ត្រជាដើម។
ជុំវិញរឿងនេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា កម្មវិធីគោលនយោបាយរបស់គណបក្សប្រជាជន មិនដែលសូម្បីម្តងចំពោះការយកលំនាំតាមគោលនយោបាយរបស់គណបក្សណាមួយឡើយ។ ចំពោះការចាត់អ្នកជំនាញវិស័យកសិកម្មនៅតាមឃុំ-សង្កាត់នេះ លោក សុខ ឥសានបញ្ជាក់ថា នេះគោលដៅអទិភាពរបស់បក្សប្រជាជនរាប់ទសវត្សមកហើយ។
បើតាម អ្នកនាំពាក្យបក្សកាន់អំណាចរូបនេះ រាល់ការបង្កើតកម្មវិធីគោលនយោបាយមួយៗ គឺត្រូវឆ្លងកាត់ការពិភាក្សាយ៉ាងម៉ត់ចត់ជាមួយសមាជិកបក្សទូទាំងប្រទេស ក៏ដូចជាប្រមូលធាតុចូលពីភាគីពាក់ព័ន្ធជាដើមហើយការចាត់អ្នកជំនាញកសិកម្មនាពេលនេះ គឺជាយន្តការជួយដល់ពលរដ្ឋ បន្ទាប់មកឃើញថា បញ្ហារបស់កសិករនៅមិនទាន់បានដោះស្រាយរួចរាល់។
សូមជម្រាបថា ការដាក់ពង្រាយអ្នកជំនាញកសិកម្មនៅគ្រប់ឃុំទូទាំងប្រទេស ដើម្បីធ្វើការជាមួយប្រជាកសិករនេះ គឺជាគំនិតផ្តួចផ្តើមរបស់ក្រសួងកសិកម្ម ដោយជំហានដំបូង គឺដាក់អ្នកជំនាញកសិកម្មទៅកាន់ឃុំចំនួន១០នៃស្រុកជើងព្រៃ ខេត្តកំពង់ចាមក្រោមគម្រោងឈ្មោះថា ឃុំកសិកម្មគំរូ។
ការដាក់អ្នកជំនាញកសិកម្មនេះទៀសោធ ក៏ត្រូវបានគេកត់សម្គាល់ថា នេះជាគោលនយោបាយថ្មីស្រឡាងរបស់គណបក្សប្រជាជនកម្ពុជាសម្រាប់ការបោះឆ្នោតថ្នាក់ជាតិឆ្នាំ២០២៣ខាងមុខផង។ ក្នុងគោលនយោបាយនោះ បក្សកាន់អំណាចកំណត់ប្រែក្លាយវិស័យកសិកម្មពីការធ្វើដើម្បីបំពេញការហូបចុករបស់ពលរដ្ឋ ទៅជាការធ្វើកសិកម្ម សម្រាប់ពាណិជ្ជកម្មវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ