វៀតណាមបន្តស្នើឲ្យកម្ពុជាជួយមើលពលរដ្ឋខ្លួនដែលរស់នៅក្នុងប្រទេសកម្ពុជា
វៀតណាមបានស្នើដល់កម្ពុជាឲ្យជួយផ្តល់ការគាំទ្រដល់ពលរដ្ឋវៀតណាម ដែលកំពុងរស់នៅកម្ពុជា និងស្នើឲ្យជួយដោះស្រាយដល់ពលរដ្ឋរបស់ខ្លួនផងដែរ ដែលរងនូវការបោកប្រាស់ក្នុងអាជីវកម្មកម្សាន្តនៅក្នុងប្រទេសកម្ពុជា។ នេះបើតាមការចុះផ្សាយរបស់ទីភ្នាក់ងារសារព័ត៌មានរដ្ឋវៀតណាម(VNA) ការស្នើរបស់ភាគីវៀតណាមនេះបានធ្វើឡើងនៅក្នុងជំនួបពិភាក្សាការងាររវាងរដ្ឋមន្ត្រីការបរទេសវៀតណាម Bui Thanh Son និងលោក ប្រាក់ សុខុន រដ្ឋមន្ត្រីការបរទេសកម្ពុជាអំឡុងពេលលោក ប្រាក់ សុខុន បំពេញទស្សនកិច្ចនៅវៀតណាមពីថ្ងៃទី២0 ដល់ថ្ងៃ២២ ខែមីនា ឆ្នាំ២០២៣នេះ។
ចុះផ្សាយនៅថ្ងៃ៖
ស្តាប់ - ០២:២៧
នៅក្នុងជំនួបពិភាក្សាទ្វេភាគីនាទីក្រុងហាណូយប្រទេសវៀតណាម រដ្ឋមន្ត្រីការបរទេសវៀតណាមលោក Bui Thanh Son បានស្នើទៅកាន់សមភាគីលោក ប្រាក់ សុខុន ឲ្យកម្ពុជាបន្តផ្តល់ការគាំទ្រដល់ប្រជាជនខ្មែរ ដើមកំណើតវៀតណាម ក្នុងការតាំងទីលំនៅ និងធ្វើសមាហរណកម្មនៅក្នុងប្រទេសកម្ពុជា ដើម្បីជាស្ពានភ្ជាប់មិត្តភាពរវាងកម្ពុជា-វៀតណាម។ នេះបើតាមការចុះផ្សាយរបស់ការសែតរដ្ឋវៀតណាម(VNA)។
កាសែតបន្តថាលោកនាយករដ្ឋមន្ត្រីវៀតណាម ក៏បានស្នើឲ្យភាគីកម្ពុជា រួមគ្នាដោះស្រាយករណីដែលពលរដ្ឋវៀតណាមត្រូវបានបោកប្រាស់ និងបង្ខំឲ្យធ្វើការដោយខុសច្បាប់ក្នុងអាជីវកម្មកម្សាន្ត ដែលគ្រប់គ្រងដោយជនបរទេសមួយចំនួននៅក្នុងប្រទេសកម្ពុជា។ ចំណុចនេះ ភាគីកម្ពុជា លោក ប្រាក់ សុខុន ក៏បានបញ្ជាក់ទៅភាគីវៀតណាមវិញថា កម្ពុជានឹងបន្តផ្តល់ការប្រព្រឹត្តិដោយយុត្តិធម៌ដល់ពលរដ្ឋខ្មែរដើមកំណើតវៀតណាម ដូចជាពលរដ្ឋមកពីប្រទេសដទៃទៀតដែរ។ នេះបើតាម VNA។
សូមរំលឹកថាបញ្ហាជនអន្តោប្រេសន៍វៀតណាមនៅក្នុងប្រទេសកម្ពុជា នៅតែជាបញ្ហារសើបនៅឡើយ រវាងរដ្ឋាភិបាលកម្ពុជា និងអ្នកនយោបាយ ក៏ដូចជាសកម្មជនប្រឆាំង រួមទាំងអ្នកជាតិនិយមផងដែរ។ វត្តមានរបស់ជនជាតិវៀតណាមនៅកម្ពុជា ចាប់តាំងពីប្រទេសនេះត្រូវបានរំដោះពីរបបប្រល័យពូជសាសន៍មក បង្កើតបាននូវការវាយប្រហាររិះគន់ពីសកម្មជន និងអ្នកនយោបាយប្រឆាំង ក៏ដូចជាអ្នកជាតិនិយមខ្មែរ ដោយសារពួកគេបារម្ភពីបញ្ហាបូរណភាព អធិបតេយ្យភាពទឹកដីជាដើម។
ក៏ប៉ុន្តែរដ្ឋាភិបាលកម្ពុជាក៏ដូចជាគណបក្សកាន់អំណាច តែងការពារនូវចំណងការទូត ការដឹងគុណ និងការគោរពសាមគ្គីភាពជាមួយប្រទេសជិតខាង។
ដោយឡែកពាក់ព័ន្ធនឹងការឆបោក និងការកេងប្រវ័ញ្ជកម្លាំងពលកម្មលើជនជាតិវៀតណាមវិញ អាជ្ញាធរកម្ពុជាតែងធ្វើអន្តរាគមន៍ជាញឹកញាប់ មិនចំពោះតែជនជាតិវៀតណាមរងគ្រោះនោះទេ ខណៈដែលអាជីវកម្មកម្សាន្តនៅកម្ពុជាមានការរីកដុះដាលច្រើន អំឡុងពេលដែលអ្នកវិនិយោគចិនយកខេត្តព្រះសីហនុជាគោលដៅសំខាន់។
កាលពីឆ្នាំទៅ ជនជាតិវៀតណាមរាប់រយនាក់ ត្រូវបានរកឃើញថាបានរងគ្រោះដោយការឆបោក និងកេងប្រវ័ញ្ចឲ្យទៅបំរើការងារនៅតាមកាស៊ីណូនៅក្នុងប្រទេសកម្ពុជា រួមនឹងជនជាតិម៉ាឡេស៊ីជាច្រើននាក់ និងជាតិសាសន៍ផ្សេងៗផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ