អង្គការសត្វព្រៃអន្តរជាតិស្នើអាមេរិកកុំបញ្ជូនស្វាកន្ទុយវែង១០០០ក្បាលត្រលប់មកកម្ពុជា
អង្គការ Born Free USA បានស្នើឲ្យភាគីអាមេរិកកុំបញ្ជូនសត្វស្វាកន្ទុយវែង ចំនួន១០០០ក្បាល ដែលរត់ពន្ធចូលទឹកដីអាមេរិកដោយខុសច្បាប់ ត្រលប់មកប្រទេសកម្ពុជា។ ការស្នើនេះធ្វើឡើងបន្ទាប់ពី នាយកដ្ឋានជលផល និងសត្វព្រៃ អាមេរិក កាលពីថ្ងៃទី១៣មីនា បានអះអាងពីការត្រៀមបញ្ជូនត្រលប់មកវិញ នូវសត្វស្វាកន្ទុយវែងចំនួន១០០០ក្បាល មកកម្ពុជា។
ចុះផ្សាយនៅថ្ងៃ៖
ស្តាប់ - ០២:០៣
តាមរយៈសេចក្តីប្រកាសព័ត៌មានរបស់ខ្លួន កាលពីថ្ងៃទី១៥មីនា អង្គការ Born Free USA បានអះអាងថា សត្វស្វាកន្ទុយវែងដែលជិតផុតពូជ ចំនួន១០០០ក្បាល នឹងត្រូវបញ្ជូនត្រលប់មកប្រទេសកម្ពុជា ដើម្បីសម្លាប់ចោលនៅក្នុងមន្ទីរពិសោធន៍។ បញ្ហានេះ អង្គការ Born Free USA យល់ថា នាយកដ្ឋានជលជល និងសត្វព្រៃអាមេរិក មិនគួរមានចំណាត់ការបែបនេះ ហើយទុកឲ្យអង្គការអភិរក្សសត្វព្រៃមួយនេះ ទទួលខុសត្រូវចំពោះសត្វស្វាកន្ទុយវែងទាំងនោះ។
អង្គការ Born Free USA បានអះអាងពីការស្នើនាយកដ្ឋានជលផល និងសត្វព្រៃអាមេរិក ធ្វើយ៉ាងណាកុំបញ្ជូនប្រភេទសត្វដែលជិតផុតពូជមួយនេះត្រលប់ទៅប្រទេសកម្ពុជា ហើយខ្លួននឹងយល់ព្រមទទួលយកស្វាទាំង១០០០ក្បាលនោះ ទៅរក្សាទុកនៅឯជម្រកសត្វព្រៃនៅភាគខាងត្បូងរដ្ឋតិចសាស់។
បន្ថែមពីនេះ លោកស្រី Angela Grimes នាយកប្រតិបត្តិ Born Free USA យល់ថា ប្រតិបត្តិការដើម្បីជួយសង្គ្រោះសត្វស្វាជាច្រើនក្បាលនេះ គឺជាកិច្ចការជាក់ស្តែង និងត្រូវការហិរញ្ញវត្ថុដ៏ធំ។ តែយ៉ាងណា ជាមួយនឹងមូលនិធិដ៏ត្រឹមត្រូវ និងពេលវេលាដើម្បីបង្កើតហេដ្ឋារចនាសម្ព័ន្ធដើម្បីគាំទ្រការថែទាំរ អង្គការ Born Free USA យល់ថាខ្លួនអាចរ៉ាប់រងចំពោះសត្វស្វាកន្ទុយវែងទាំង១០០០ក្បាលនោះបាន។ តាមអង្គការអភិរក្សសត្វព្រៃអន្តរជាតិមួយនេះ នឹងបន្តពិភាក្សាជាមួយនាយកដ្ឋានជលផល និងសត្វព្រៃ ជាបន្ត ដើម្បីធានាថា ការសង្គ្រោះសត្វសា្វទាំងនោះគឺជាជម្រើសមួយ។
សូមជម្រាបថា សត្វស្វាកន្ទុយវែង ឬហៅថា សត្វស្វាក្តាមទាំង១០០០ក្បាល គឺជាសត្វស្វាដែលរត់ពន្ធដោយខុសច្បាប់ចូលទៅកាន់ទឹកដីអាមេរិក។ សត្វកន្ទុយវែង ជាប្រភេទសត្វជិតផុតកម្រ ដែលមានកំណត់ក្នុងអនុសញ្ញាស្តីពីការហាមប្រាមការធ្វើពាណិជ្ជកម្មអន្តរជាតិលើប្រភេទសត្វ និងរុក្ខជាតិព្រៃដែលប្រឈមនឹងការជិតផុតពូជ ហៅកាត់ថា សាយតេស (CITES)។
នៅក្នុងសំណុំរឿងរត់ពន្ធសត្វសា្វដែលជិតផុតពូជនេះ ក្រសួងយុត្តិធម៌អាមេរិក បានចាប់ខ្លួនមន្ត្រីកសិកម្មមួយរូប គឺលោក គ្រី ម៉ះផល ប្រធាននាយកដ្ឋានសត្វព្រៃ និងជីវចម្រុះនៃរដ្ឋបាលព្រៃឈើ កាលពីថ្ងៃទី១៦វិច្ឆិកា ក្នុងបទល្មើសជួញដូរសត្វព្រៃ។ ហើយមកដល់ពេលនេះ សំណុំរឿងរបស់លោក ក៏កំពុងតែបន្តនីតិវិធីតាមផ្លូវតុលាការ ដើម្បីជំនុំជម្រះក្តី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ