អ្នកស្រាវជ្រាវបង្ហាញការសោកស្ដាយដែលកម្ពុជាទទួលយកលទ្ធផលព្រំដែនរួម៨៦ភាគរយជាមួយឡាវ
កម្ពុជាទទួលយកលទ្ធផលនៃការត្រួតពិនិត្យខ្សែព្រំដែនរួម៨៦ភាគរយជាមួយឡាវ។ សេចក្ដីសម្រេចនេះធ្វើឡើងក្នុងកិច្ចប្រជុំគណៈរដ្ឋមន្ត្រី នៅថ្ងៃសុក្រទី១៧មីនា ដែលបានពិនិត្យនិងពិភាក្សាលើសេចក្ដីព្រាងស្ដីពីការអនុម័តយល់ព្រមលើសន្ធិសញ្ញាកំណត់ព្រំដែនរវាកម្ពុជា-ឡាវ។ តែសម្រាប់អ្នកស្រាវជ្រាវមានយោបល់ថា វារឿងគួរឲ្យស្ដាយដែលការទទួលយកលទ្ធផលនេះ ធ្វើឡើងក្នុងបរិបទអ្នកនយោបាយខ្មែរមិនចុះសម្រុងនឹងគ្នា។
ចុះផ្សាយនៅថ្ងៃ៖
ស្តាប់ - ០២:២២
សេចក្ដីព្រាងច្បាប់ស្ដីពីការអនុម័តយល់ព្រមលើសន្ធិសញ្ញាកំណត់ព្រំដែនរវាងកម្ពុជា-ឡាវ មាន៣មាត្រា ខ្លឹមសារភ្ជាប់ជាមួយមាន៦ប្រការនិងឧបសម្ព័ន្ធចំនួន៤។ សន្ធិសញ្ញានេះគឺជាកំណត់ត្រាទទួលយកលទ្ធផលនៃការត្រួតពិនិត្យខ្សែព្រំដែនរួម៨៦ភាគរយដែលប្រទេសទាំងពីរ សម្រេចបានលើការងារព្រំដែននិងត្រូវបានប្រមុខរដ្ឋាភិបាលប្រទេសទាំង២ ចុះហត្ថលេខាកាលពីថ្ងៃទី១៣កុម្ភៈឆ្នាំ២០២៣នៅវៀងចន្ទ។
រីឯបំណែកព្រំដែន១៤ភាគរយទៀតត្រូវបានអះអាងថា ស្ថិតក្នុងយន្តការបន្តរកដំណោះស្រាយ។ ទម្រាំឈានចូលដល់ការសន្ធិសញ្ញាកំណត់ព្រំដែនរវាកម្ពុជា-ឡាវ ភាគីទាំងពីរបានជួបចរចាចំនួន១៨៨លើកពីឆ្នាំ១៩៩៥-២០០៩ សម្រេចបាន៨៦ភាគរយស្មើនឹង៤៦៥គីឡូម៉ែត្រនៃខ្សែព្រំដែនរួមប្រវែងប្រមាណ៥៤០គីឡូម៉ែត្រ និងបានបោះបង្គោលលើដីជាក់ស្ដែងចំនួន១២១បង្គោល។ បន្ទាប់ពីសន្និសញ្ញានេះចូលជាធរមានភាគីទាំងពីរនឹងផលិតផែនទីខ្នាត១លើ២ ៥០០០ ដែលកម្ពុជានិងឡាវព្រមព្រៀងចេញថ្លៃចំណាយពាក់កណ្ដាលម្នាក់។
លោក មាស នី ជាអ្នកតាមដានសង្គមនិងអ្នកស្រាវជ្រាវឲ្យដឹងថា កិច្ចការងារព្រំដែនជាតួនាទីរបស់រដ្ឋាភិបាលពង្រឹងសមត្ថភាពក្នុងការពារព្រំដែននៅគ្រាប្រទេសមានសុខសន្តិភាព ហើយការបោះបង្គោលលើដីជាស្ដែងគឺជាកាតព្វមួយដ៏សំខាន់ទៀតរបស់រដ្ឋាភិបាល។ ប៉ុន្តែជារឿងគួរឲ្យសោកស្ដាយ ដែលកិច្ចការងារព្រំដែននិងជាពិសេសការទទួលយកយកលទ្ធផលនៃការត្រួតពិនិត្យខ្សែព្រំដែនរួម៨៦ភាគរយ ដែលប្រទេសទាំងពីរធ្វើឡើងក្នុងរូបភាពមិនចុះសម្រុងគ្នារវាងខ្មែរនិងខ្មែរ។ បើខ្មែរនិងខ្មែរមានភាពមិនចុះសម្រុងគ្នាលើកិច្ចការងារព្រំដែនវាអាចនាំឲ្យមានការតវ៉ាឬសើរើឡើងវិញ ក្នុងករណីព្រំដែនដែលបានកំណត់នោះមានការលើសសល់ ឬខ្វះខាតដោយកន្លែងណាមួយ។
កាលពីឆ្នាំ២០១៩ នាយករដ្ឋមន្ត្រីកម្ពុជា-ឡាវ បានសរសេរលិខិតរួមគ្នាមួយទៅកាន់ប្រធានាធិបតីបារាំង ដោយមានគោលដៅពីរសំខាន់គឺទី១ ស្នើសុំបារាំងបញ្ចូនអ្នកជំនាញខាងគូសចម្លងផែនទីមកជួយគូសចម្លងផែនទី នៅតំបន់ដែលនៅសេសស់មិនទាន់ត្រូវគ្នាចំនួន១៤%។ និងចំណុចទី២ ភាគីទាំងពីរស្នើសុំផែនទីពីបារាំង។ សំណើរនេះត្រូវបានរដ្ឋាភិបាលបារាំងយល់ព្រមក៏ប៉ុន្តែភាគីកម្ពុជា-ឡាវ ត្រូវសម្របសម្រួលរកចំណុចរួមមួយសិនថាតើចង់ឲ្យបារាំងជួយយ៉ាងដូចម្តេច លើចំណុចអ្វីច្បាស់លាស់។
សូមបញ្ជាក់ដែរថា កម្ពុជាបានឯកភាពលើការកំណត់ខ្សែព្រំដែនជាមួយឡាវបាន៨៦% ក្នុងប្រវែងព្រំដែនសរុប៥៤០គីឡូម៉ែត្រ និង៨៤%។ ជាមួយប្រទេសវៀតណាមដែលសម្រេចបានជាផ្លែផ្កាកើនដល់៩០ភាគរយហើយ ដោយនៅសល់១០ភាគរយទៀត ភាគីទាំងពីរកំពុងចរចាគ្នាដើម្បីធ្វើការងារនេះបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ