លោក កឹម សុខា មិនអាចជួបមេធាវី ខណៈមានការតម្រូវឲ្យលោកដាក់សំណើទៅព្រះរាជអាជ្ញាជាមុនសិន
លោក កឹម សុខា ត្រូវដាក់ពាក្យស្នើសុំទៅព្រះរាជអាជ្ញាអមសាលាដំបូងរាជធានីភ្នំពេញ ដើម្បីសុំជួបពឹងពាក់មេធាវី និងពិគ្រោះយោបល់ពីនីតិវិធីបន្តក្នុងសំណុំរឿងរបស់ខ្លួន។ នេះជាការបញ្ជាក់របស់គណៈមេធាវីកម្ពុជាកាលពីថ្ងៃទី១៧ ខែមីនា បន្ទាប់ពីមានការហាមឃាត់មិនឲ្យសហមេធាវីការពារក្តីចូលជួបលោក កឹម សុខា ក្នុងផ្ទះដែលលោកកំពុងជាប់ឃុំ។ សហមេធាវីម្នាក់ បានចោទសួរវិញថា តើឲ្យលោក កឹម សុខា ដាក់ពាក្យស្នើសុំទៅព្រះរាជអាជ្ញាយ៉ាងដូចម្តេច បើគាត់មិនត្រូវបានអនុញ្ញាតឲ្យចេញក្រៅ និងមិនបានជួបពិគ្រោះជាមួយសហមេធាវីផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៣
គណៈមេធាវីកម្ពុជា កាលពីថ្ងៃទី១៧ ខែមីនា បានចេញសេចក្តីប្រកាសព័ត៌មានមួយ ដោយបញ្ជាក់ថា ក្នុងករណីលោក កឹម សុខា ត្រូវការពឹងពាក់មេធាវី គឺត្រូវអនុវត្តតាមខ្លឹមសារនៃសាលក្រមព្រហ្មទណ្ឌលេខ ១៨២“ម” ចុះថ្ងៃទី០៣ ខែមីនា ឆ្នាំ២០២៣ របស់សាលាដំបូងរាជធានីភ្នំពេញ ដោយលោក កឹម សុខា ត្រូវដាក់ពាក្យស្នើសុំទៅព្រះរាជអាជ្ញាអមសាលាដំបូង ដើម្បីសុំជួបពឹងពាក់មេធាវី និងពិគ្រោះយោបល់អំពីនីតិវិធីបន្ត ដែលត្រូវធ្វើក្នុងសំណុំរឿងរបស់ខ្លួន។
ការបញ្ជាក់របស់គណៈមេធាវីកម្ពុជា ធ្វើឡើងក្រោយពីសហមេធាវីការពារក្តីលោក កឹម សុខា កាលពីថ្ងៃទី១៤ ខែមីនា ត្រូវកងកម្លាំង ដែលយាមនៅមុខផ្ទះលោក កឹម សុខា រារាំង និងណែនាំឲ្យសហមេធាវីត្រូវសុំការអនុញ្ញាតពីព្រះរាជអាជ្ញាជាមុនសិន។ តាមរយៈសេចក្តីថ្លែងការណ៍មួយក្នុងថ្ងៃដដែលនោះ សហមេធាវីការពារក្តីលោក កឹម សុខា បានអះអាងថា មិនអាចអនុវត្តតាមការណែនាំខាងលើ ដែលផ្ទុយនឹងច្បាប់ ក្រម និងវិធានជាធរមានដែលគ្រប់គ្រងវិជ្ជាជីវៈមេធាវី។
លោក អាង ឧត្តម សហមេធាវីការពារលោក កឹម សុខា បានថ្លែងប្រាប់វិទ្យុបារាំងអន្តរជាតិ នៅថ្ងៃទី១៨ ខែមីនានេះថា លោកនៅតែជាមេធាវីការពារក្តី នៅក្នុងសំណុំរឿងរបស់លោក កឹម សុខា ដដែល ខណៈមានការបកស្រាយថា លោកអស់សិទ្ធិជាមេធាវីតាមសាលក្រម កាលពីថ្ងៃទី០៣ ខែមីនា។ លោកបន្តថា អំណាចសាលក្រម ដែលមិនទាន់ចូលជាស្ថាពរតើអនុវត្តម្តេចកើត។
លោក អាង ឧត្តម បញ្ជាក់ថា បញ្ហាទាំងនេះអាចនឹងប៉ះពាល់ដល់នីតិវីធីប្តឹងឧទ្ធរណ៍ប្រឆាំងនឹងសាលក្រមសាលាដំបូង។ លោកលើកឡើងឧទារណ៍ថា បើមានការតម្រូវឲ្យលោក កឹម សុខា ត្រូវដាក់ពាក្យស្នើសុំទៅព្រះរាជអាជ្ញា ដើម្បីសុំជួបពឹងពាក់មេធាវី តើអ្នកណាធ្វើពាក្យនោះ ហើយយកទៅដាក់ដូចម្តេច បើលោក កឹម សុខា មិនអាចចេញក្រៅផ្ទះបាន ខណៈដែលគ្មានមេធាវីជួយធ្វើការងារ។ សហមេធាវីរូបនេះ បានចោទសួរថាតើឲ្យមេធាវីសុំការអនុញ្ញាតពីព្រះរាជអាជ្ញាជាមុនដូចម្តេច បើមេធាវីនៅមានសុពលភាពក្នុងសំណុំរឿងដដែលនេះ។
សូមជម្រាបជូនថា សាលាដំបូងរាជធានីភ្នំពេញបានចេញសាលក្រម ចុះថ្ងៃទី០៣ ខែមីនា ឆ្នាំ២០២៣ សម្រេចផ្តន្ទាទោស លោក កឹម សុខា មេដឹកនាំអតីតគណបក្សសង្រ្គោះជាតិ ដាក់ពន្ធនាគាររយៈពេល២៧ឆ្នាំ ពីបទសន្ទិដ្ឋិភាពជាមួយបរទេស។ សិទ្ធបោះឆ្នោត សិទ្ធឈរឈ្មោះបោះឆ្នោត និងសិទ្ធិធ្វើសកម្មភាពនយោបាយ ត្រូវដកជាស្ថាពរ។ សាលាក្រមដដែលនេះ បានតម្រូវឲ្យ លោក កឹម សុខា នៅតែក្នុងបរិវេណផ្ទះរបស់លោក មិនត្រូវជួបបុគ្គលណាម្នាក់ ដោយផ្ទាល់ ឬប្រយោល ក្រៅពីសមាជិកគ្រួសារ លើកលែងតែមានការអនុញ្ញាតដោយព្រះរាជអាជ្ញា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ