ទស្សនកិច្ចនៅបារាំង៖ គ.ជ.ប នឹងបញ្ចុះបញ្ចូលអឺរ៉ុបឲ្យងាកមកគាំទ្រដំណើរការបោះឆ្នោតនៅកម្ពុជា
ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) លោក ប្រាជ្ញ ចន្ទ នឹងលើកឡើងប្រាប់ភាគីអឺរ៉ុបតាមរយៈបារាំងអំពីការត្រៀមខ្លួនរបស់កម្ពុជាក្នុងការរៀបចំដំណើរការបោះឆ្នោតក្នុងខែកក្កដា។ ការលើកឡើងបែបនេះ គឺធ្វើឡើងនៅក្នុងអំឡុងពេលលោកទៅទស្សនកិច្ចផ្លូវការសង្កេតមើលប្រព័ន្ធបោះឆ្នោតបារាំង ចាប់ពីថ្ងៃទី១៣ដល់ថ្ងៃទី១៩ ខែមីនា។
ចុះផ្សាយនៅថ្ងៃ៖
ស្តាប់ - ០១:៥៨
នៅក្នុងសន្និសិទសារព៏ត៌មានកាលពីថ្ងៃទី១៣ខែមីនា មុនដឹកនាំគណៈប្រតិភូកម្ពុជា ទៅទស្សនកិច្ចសង្កេតមើលប្រព័ន្ធបោះឆ្នោតនៅបារាំង លោក ប្រាជ្ញ ចន្ទ បានបញ្ជាក់ថា គ.ជ.ប នឹងបង្ហាញអំពីការត្រៀមរៀបចំការបោះឆ្នោតនៅកម្ពុជា ទាំងពេលមុន និងនៅពេលខាងមុខ ដើម្បីឲ្យបារាំង ក៏ដូចជាសហភាពអឺរ៉ុបបានយល់ និងបន្តគាំទ្រការបោះឆ្នោតនៅកម្ពុជាតទៅទៀត។ ការលើកឡើងយ៉ាងដូច្នេះ គឺតបនឹងសំណួររបស់អ្នកសារព័ត៌មាន ដែលបានចោទសួរអំពីតម្រូវការរបស់អឺរ៉ុបចង់បានលំហសេរីភាព ប្រជាធិបតេយ្យសេរីពហុបក្ស ក្នុងពេលបោះឆ្នោតនៅកម្ពុជា។
ប្រធាន គ.ជ.ប រូបនេះ បានអះអាងថា ការរៀបចំការបោះឆ្នោតនៅកម្ពុជា ទាំងសកល និងអសកល ពីមុនមកទល់បច្ចុប្បន្ននេះ គឺដំណើរការប្រព្រឹត្តទៅដោយ សេរី ត្រឹមត្រូវ និងយុត្តិធម៌ ស្របតាមគោលការណ៍ប្រជាធិបតេយ្យសេរីពហុបក្ស ដែលចែងក្នុងរដ្ឋធម្មនុញ្ញ។ ដូច្នេះហើយទើបលោក ប្រាជ្ញ ចន្ទ សង្ឃឹមថា សហភាពអឺរ៉ុប ក៏ដូចភាគីបារាំង នឹងបន្តគាំទ្រដំណើរការរៀបចំការបោះឆ្នោតនៅកម្ពុជា ពិសេសគាំទ្រការរៀបចំការបោះឆ្នោតជ្រើសតាំងតំណាងរាស្រ្ត នីតិកាលទី៧ ដែលនឹងប្រព្រឹត្តធ្វើនៅខែកក្កដាខាងមុននេះ។
ការលើកឡើងរបស់លោក ប្រាជ្ញ ចន្ទនេះ ត្រូវបានគេកត់សម្គាល់ឃើញផងដែរថា ដំណើរការរៀបចំការបោះឆ្នោតនៅកម្ពុជា ត្រូវបានសហគមន៍អន្តរជាតិ ដូចជាសហរដ្ឋអាមរិក សហភាពអឺរ៉ុបជាដើម បានរិះគន់ថា មិនបានឆ្លុះបញ្ចាំងពីសេរី ត្រឹមត្រូវ និងយុត្តិធម៌ឡើយ បន្ទាប់ពីមានការរំលាយអតីតគណបក្សសង្រ្គោះជាតិ។ ចាប់ពីពេលលនោះមក សហភាពអឺរ៉ុបឈប់គាំទ្រដំណើរការរៀបចំការបោះឆ្នោតនៅកម្ពុជា។
សូមបញ្ជាក់ថា លោក ប្រាជ្ញា ចន្ទ ប្រធានគណៈកម្មាធិការជាតិរៀបចំការបោះឆ្នោត បានដឹកនាំប្រតិភូកម្ពុជា ទៅទស្សនកិច្ចផ្លូវការសង្កេតមើលប្រព័ន្ធបោះឆ្នោតបារាំង ចាប់ពីថ្ងៃទី១៣ដល់ថ្ងៃទី១៩ ខែមីនា។ ការទៅទស្សនកិច្ចផ្លូវការសង្កេតមើលប្រព័ន្ធបោះឆ្នោតបារាំងរបស់ គ.ជ.ប គឺដើម្បីផ្លាស់ប្ដូរបទពិសោធន៍ការងារ និងនាំធាតុចូលជាវិជ្ជមាន មកបំពេញនូវទម្រង់ខ្វះខាតនៃការបោះឆ្នោតនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ