អាជ្ញាធរខេត្តពោធិ៍សាត់ឃាត់ដំណើរធម្មយាត្រារបស់ព្រះសង្ឃមួយអង្គដែលមាននិន្នាការទៅបក្សប្រឆាំង
អាជ្ញាធរស្រុកបាកានខេត្តពោធិ៍សាត់ បានឃាត់ដំណើរធម្មយាត្រាថ្មើជើងរបស់ព្រះសង្ឃមួយអង្គ និងសកម្មជនសង្គមមួយចំនួនទៀត ដោយព្រមានឲ្យបញ្ឈប់សកម្មភាពនេះ បើមិនចង់មានបញ្ហា។ នេះបើតាមការអះអាងរបស់ព្រះតេជគុណ សយ សាត។ ព្រះសង្ឃព្រះជន្ម៧២ព្រះវស្សា អង្គនេះត្រូវបានគេមើលឃើញថា មាននិន្នការទៅរកគណបក្សភ្លើងទៀន ហើយបានធ្វើយុទ្ធនាការថ្មើជើងក្រោមហេតុផលលើកកម្ពស់សីលធម៌ និងយុត្តិធម៌សង្គម ប្រហាក់ប្រហែលគ្នានឹងអ្វីដែលសមាគមគ្រូបង្រៀនកម្ពុជាឯករាជ្យកាលពីខែមុន។
ចុះផ្សាយនៅថ្ងៃ៖
ស្តាប់ - ០១:៤៤
គោលដៅធម្មយាត្រាថ្មើជើងរបស់ព្រះតេជគុណ សយ សាត និងសកម្មជនសង្គមមួយចំនួនគឺមានគោលដៅពីភ្នំពេញទៅកាន់ព្រំដែនខ្មែរ-ថៃ ខេត្តបន្ទាយជ័យ។ ប៉ុន្តែពេលទៅដល់ភូមិសាស្ត្រស្រុកបាកានខេត្តពោធិ៍សាត់ ដំណើរថ្មើជើងនេះត្រូវបានអាជ្ញាធរបញ្ឈប់ដោយហៅទៅសួរនាំអស់រយៈពេលប្រហែល៣ម៉ោង។
ព្រះតេជគុណ សយ សាត មានសង្ឃដីកាប្រាប់វិទ្យុអាស៊ីសេរីថា កាលពីថ្ងៃអង្គារអាជ្ញាធរស្រុកបាកានបានព្រមានឲ្យបញ្ឈប់សកម្មភាពនេះ បើមិនចង់មានបញ្ហា។ តែព្រះនៅតែមានជំហរធ្វើធម្មយាត្រាទៅដល់គោលដៅ។
បើតាមព្រះសង្ឃព្រះជន្ម៧២ព្រះវស្សាអង្គនេះ អាជ្ញាធរបានចោទប្រកាន់ដំណើរធម្មយាត្រារបស់ព្រះអង្គថា រួមចំណែកគាំទ្រដល់គណបក្សភ្លើងទៀន ខណៈលោក រ៉ុង ឈុន ដែលពេលនេះជាអនុប្រធានគណបក្សភ្លើងទៀន ធ្លាប់ដឹកនាំយុទ្ធនាការប្រហាក់ប្រហែលគ្នានេះដែរនៅក្រោមរូភាពសមាគមគ្រូបង្រៀនកម្ពុជាឯករាជ្យទៅកាន់ខេត្តបាត់បំបងកាលពីខែមុន។
កាលពីថ្ងៃទី៣មីនា លោក រ៉ុង ឈុន បានបង្ហោះរូបភាពជាច្រើនសន្លឹកថាលោក និងលោក ជា មុនី បានយកចង្ហាន់ទៅប្រគេនព្រះតេជគុណ សយ ហើយរួមដំណើរធម្មយាត្រានៅតាមដងផ្លូវ។
ទោះជាយ៉ាងណា ក្រោយការឃាត់សាកសួរប្រហែល៣ម៉ោង អាជ្ញាធរបានអនុញ្ញាតឲ្យព្រះតេជគុណ សយ សាត និងសកម្មជនសង្គមមួយចំនួនទៀតដែលរួមដំណើរអាចបន្តដំណើរទៅមុខបាន។
គួររំឭកថា កាលពីខែមុន ព្រះសង្ឃអង្គនេះក៏ធ្លាប់រួមដំណើរយុទ្ធនាការជាមួយសមាគមគ្រូបង្រៀនកម្ពុជាឯករាជ្យពីភ្នំពេញទៅកាន់ខេត្តបាត់ដំបងក្នុងគោលបំណងដូចគ្នានេះដែរ។ ប៉ុន្តែប៉ុន្មានថ្ងៃក្រោយមក ព្រះចៅអធិការវត្តមួយនៅខេត្តកំពង់ស្ពឺ បានបណ្តេញព្រះតេជគុណ សយ សាត ចេញពីវត្ត ដោយចោទថា «ធ្វើសកម្មភាពបំផ្លាញសន្តិភាព»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ