សហជីពស្នើរដ្ឋាភិបាលនិងនិយោជក ផ្តល់ប្រាក់ជំនួយសង្គមដល់កម្មករ ក្រោយរោងចក្របណ្តាក់គ្នាបិទទ្វារ
ប្រធានសម្ព័ន្ធសហជីពចលនាកម្មករកម្ពុជា បានស្នើឱ្យរដ្ឋាភិបាលបន្តផ្តល់នូវជំនួយមូលនិធិសង្គម និងជំរុញឱ្យក្រសួងការងារចេញសេចក្តីប្រកាសតម្រូវឱ្យភាគីនិយោជកផ្តល់ប្រាក់ឧបត្ថម្ភដល់កម្មករ-កម្មការនីដែលត្រូវបានព្យូរការងារ រហូតពួកគេអាចចូលបម្រើការងារឡើងវិញ។ ការលើកសំណើររបស់ភាគីសហជីពនាពេលនេះ គឺចំពេលដែលកម្មកររាប់ពាន់នាក់កំពុងរស់នៅក្នុងស្ថានភាពខ្វះខាត បន្ទាប់ពីរោងចក្រកាត់ដេរជាច្រើនកន្លែងបានសម្រេចបិទទ្វារ និងព្យូរកិច្ចសន្យាការងាររបស់ពួកគេ។
ចុះផ្សាយនៅថ្ងៃ៖
ស្តាប់ - ០២:៤៤
ក្រោយជំនួបរវាងតំណាងសហជីព និងរដ្ឋមន្ត្រីក្រសួងការងារកាលពីថ្ងៃទី០៣ ខែមីនា លោក ប៉ាវ ស៊ីណាប្រធានសម្ព័ន្ធសហជីពចលនាកម្មករកម្ពុជា រំពឹងថា សំណើរដែលថ្នាក់ដឹកនាំសហជីពបានដាក់ជូនក្រសួងការងារពិនិត្យនោះ នឹងអាចមានការសម្រេចជាវិជ្ជមានមួយ សម្រាប់ជាផលប្រយោជន៍ដល់នយោជិត(កម្មករ) រាប់ពាន់នាក់ដែលកំពុងព្យូរការងារ និងមិនទទួលបានប្រាក់ឧបត្ថម្ភជំនួយសង្គម ឬការទូទាត់ប្រាក់ព្យូរកិច្ចសន្យាការងារពីថៅកែជាដើម។
ក្នុងនោះ លោក ប៉ាវ ស៊ីណាចង់ឃើញ រដ្ឋាភិបាល និងភាគីនិយោជកផ្តល់ប្រាក់ឧបត្តម្ភជំនួយសង្គម និងប្រាក់ព្យូរការងារដល់កម្មករដូចអ្វីដែលរដ្ឋាភិបាលធ្លាប់បានអនុវត្តកាលពីអំឡុងវិបត្តិជំងឺកូវីដ-១៩ដែរ។ ហើយការផ្តល់ប្រាក់ឧបត្ថម្ភនេះទៀតសោធ គឺត្រូវអនុវត្តដរាបណាកម្មករដែលកំពុងព្យូរការងារទាំងអស់ អាចវិលចូលបម្រើការងារឡើងវិញ។
បើតាមថ្នាក់ដឹកនាំសហជីពរូបនេះ លោកមិនទាមទារឱ្យរដ្ឋាភិបាល ក៏ដូចជាខាងនិយោជក ត្រូវផ្តល់ប្រាក់ឧបត្ថម្ភក្នុងកម្រិតខ្ពស់នោះទេ។ ប៉ុន្តែគួរផ្តល់ក្នុងកម្រិតណាមួយដែលអាចទទួលយកបាន និងអាចជួយដោះស្រាយជីវភាពរបស់កម្មករនិយោជិតដែលពួកគេខ្លះកំពុងជួបប្រទះបញ្ហាខ្វះខាតខ្លាំង។
ទាក់ទិននឹងរឿងនេះ ប្រធានសហព័ន្ធសហជីពសេរីកម្មករ អ្នកស្រី ទូច សើក៏ធ្លាប់លើកឡើងម្តងរួចមកហើយថា ការដែលមិនកំណត់ អំពីការផ្ដល់ប្រាក់ឧបត្ថម្ភថ្លៃព្យួរការងារនេះ និយោជកខ្លះ ចេះតែលើកហេតុផលវិបត្ដិផ្សេងៗ ដែលធ្វើឲ្យការផ្ដល់នូវកញ្ចប់ប្រាក់ឈ្នួលថ្លៃព្យួរការងារនោះ វាមិនអាចឆ្លើយតបទៅនឹងការចំណាយរបស់កម្មករបាន។ មិនអាចឆ្លើយតប ក៏ដោយសារតែ ការចំណាយថ្លៃបន្ទប់ស្នាក់របស់កម្មករខ្លះនៅមិនអាចគ្រប់គ្រាន់ ខណៈកម្មករខ្លះត្រូវសង់បំណុលធនាគារ ឬមានបន្ទុកចំណាយផ្សេងៗទៀត។
តែយ៉ាងណា រដ្ឋមន្ត្រីក្រសួងការងារ លោក អ៊ិត សំហេង បានអះអាងថា ក្រសួងបានចាត់តំណាង និងក្រុមការងារបច្ចេកទេសឱ្យពិនិត្យមើលរបាយការណ៍ផ្សេងៗពីតំណាងភាគីសហជីព និងតំណាងសមាគមកាត់ដេរ ដើម្បីស្នើសុំជាគោលការណ៍ទៅកាន់រដ្ឋាភិបាល ក្នុងការផ្តល់ប្រាក់ឧបត្ថម្ភជំនួយសង្គមដល់កម្មករនិយោជិតដែលកំពុងព្យូរការងារ ខណៈក្រសួងក៏ធ្លាប់ពិចារណាលើការផ្តល់ជំនួយសង្គមនេះដូចគ្នា។ នេះបើតាមការឱ្យដឹងពីតំណាងសហជីព។
ការផ្តល់ប្រាក់ឧបត្ថម្ភដល់កម្មករនិយោជិតក្នុងវិស័យកាត់ដេរនេះ កាលពីឆ្នាំ២០២១កន្លង រដ្ឋាភិបាលបានប្រកាសផ្តល់ប្រាក់ឧបត្ថម្ភជំនួយសង្គមដល់កម្មករក្នុងម្នាក់៤០ដុល្លារក្នុងមួយខែ ខណៈភាគីនិយោជកបានផ្តល់ប្រាក់ព្យូរកិច្ចសន្យាការងារក្នុងម្នាក់៣០ដុល្លារ ក្នុងមួយខែ បន្ទាប់ពីរោងចក្រជាច្រើនបានបិទទ្វារក្នុងអំឡុងវិបត្តិជំងឺកូវីដ១៩។
ដោយឡែក បើតាមរបាយការណ៍ពីសហព័ន្ធសហជីពសេរីកម្មករនៃព្រះរាជាណាចក្រកម្ពុជា គិតមកដើមឆ្នាំ២០២៣នេះ មានរោងចក្រចំនួន១០បានបិទទ្វារ និងរោងចក្រជិត៥០០ បានព្យួរការងារកម្មករ ខណៈរោងចក្រប្រមាណ៦០ផ្សេងទៀតបានកាត់បន្ថយបុគ្គលិក ហើយរោងចក្រប្រមាណ៧០ ទៅ៨០ភាគរយគ្មានវត្ថុធាតុដើមសម្រាប់កាត់ដេរបន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ