ជប៉ុនផ្តល់ជំនួយជាង៣០លានដុល្លារពង្រីងប្រព័ន្ធទឹកស្អាតនៅខេត្តស្វាយរៀង
ប្រទេសជប៉ុនបានសម្រេចផ្តល់ជំនួយឥតសំណងជាទឹកប្រាក់ជាង៣០លានដុល្លារអាមេរិកដល់ប្រទេសកម្ពុជាដើម្បីពង្រីងប្រព័ន្ធផ្គត់ផ្គង់ទឹកស្អាតនៅខេត្តស្វាយរៀង។ នេះបើតាមការគូសបញ្ជាក់របស់ក្រសួងការបរទេសកម្ពុជា នៅក្នុងជំនួបថ្ងៃទី២៤កុម្ភៈ នៅរាជធានីភ្នំពេញ រវាងលោក អ៊ុច បូររិទ្ធ រដ្ឋមន្ត្រីប្រតិភូអមនាយករដ្ឋមន្ត្រីកម្ពុជា និងលោក តាកេ ហ្សីនសឺកិ រដ្ឋលេខាធិការក្រសួងការបរទេសជប៉ុន។
ចុះផ្សាយនៅថ្ងៃ៖
ស្តាប់ - ០១:៤៣
លើសពីការផ្តល់ជំនួយឥតសំណងជាង៣០លានដុល្លារនេះ បើតាមក្រសួងការបរទេសកម្ពុជា ភាគីទាំងពីរបានប្តេជ្ញាចិត្តជាថ្មីក្នុងការធ្វើឲ្យកាន់តែស៊ីជម្រៅ និងពង្រីកបន្ថែមនូវកិច្ចសហប្រតិបត្តិការ និងសំដែងការពេញចិត្តលើចំណត់ត្រានៃទំនាក់ទំនងទ្វេរភាគី រួមទាំង ភាពជាដៃគូយុទ្ធសាស្ត្រគ្រប់ជ្រុងជ្រោយនៅឆ្នាំនេះ។
កម្ពុជា និងជប៉ុន ក៏បានពិភាក្សាផងដែរអំពីមធ្យោបាយនានា ដើម្បីជំរុញបន្ថែមផ្នែកពាណិជ្ជកម្ម និងសេដ្ឋកិច្ច វិស័យការពារជាតិ និងសន្តិសុខ ការផ្លាស់ប្តូរប្រជាជន និងប្រជាជន រួមទាំងការដោះមីននៅកម្ពុជា។
ចំពោះវិស័យពាណិជ្ជកម្ម ភាគីទាំងពីរបានឯកភាពជំរុញឲ្យមានវត្តមានធុរកិច្ចជប៉ុនមកកម្ពុជា តាមរយៈការបើកឲ្យដំណើរការឡើងវិញ ជើងហោះហើរត្រង់រវាងប្រទេសទាំងពីរ។
ដោយឡែកចំពោះវិស័យការពារជាតិ ភាគីទាំងពីរបានកត់សំគាល់ពីការរីកចម្រើននូវកិច្ចសហប្រតិបត្តិការ តួយ៉ាង ការចូលចតវានាជើងទឹកនៅតាមកំពង់ផែន ខណៈវិស័យធនធានមនុស្សជប៉ុនបានបញ្ជាក់ពីការគាំទ្រចំពោះសំណើររបស់កម្ពុជាក្នុងការសុំដំណើរការឡើងវិញកម្មវិធីយល់ដឹងពីដំណើរការប្រជាធិបតេយ្យ ពហុបក្សសម្រាប់អ្នកនយោបាយវ័យក្មេង។
នៅចំពោះមុខសមភាគីជប៉ុនដែលជាតួអង្គសំខាន់មួយបានរួមចំណែកច្រើនដល់ការរៀបចំ ប្រព័ន្ធបោះឆ្នោតកន្លងទៅ លោក អ៊ុច បូររិទ្ធ បានគូសបញ្ជាក់ពីការប្តេជ្ញាចិត្តរបស់កម្ពុជា ក្នុងការរៀបចំការបោះឆ្នោតថ្នាក់ជាតិនៅខែកក្កដា ឲ្យប្រព្រឹត្តិទៅដោយសេរី ត្រឹមត្រូវ និងយុត្តិធម៌ ដោយឆ្លុះបញ្ចាំងពីឆន្ទៈប្រជាពលរដ្ឋ។
ខណៈដែលឆ្នាំនេះកម្ពុជាមានឱកាសធ្វើជាម្ចាស់ផ្ទះរៀបចំព្រឹត្តិការណ៍កីឡាស៊ីហ្គេមលើកទី៣២ ជប៉ុនបានសន្យាបញ្ជួនអាជ្ញាកណ្តាលរបស់ខ្លួនចំនួន៤០រូបមកជួយកម្ពុជា ក្នុងការរៀបចំព្រឹត្តិការណ៍ជាប្រវត្តិសាស្ត្រនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ