ខួប១ឆ្នាំសង្គ្រាមឈ្លានពានរុស្ស៊ីលើអ៊ុយក្រែន៖ កម្ពុជាប្រឆាំងរុស្ស៊ី៣ដង និងអនុបវាទ១ដង
នៅថ្ងៃទី២៤ ខែកុម្ភៈ ឆ្នាំ២០២៣នេះ គឺជាខួប១ឆ្នាំ នៃការឈ្លានពានរបស់រុស្ស៊ីទៅលើអ៊ុយក្រែន។ រយៈពេល១ឆ្នាំកន្លងទៅនេះ ប្រទេសកម្ពុជាបានបោះឆ្នោតប្រឆាំងនឹងការឈា្លនពានរបស់រុស្ស៊ីទៅលើអ៊ុយក្រែនចំនួន ៣ដង និងបោះឆ្នោតអនុបវាទចំនួន១ដង ក្នុងចំណោមការបោះឆ្នោតសំខាន់ៗចំនួន៤ដង នៅក្នុងក្របខណ្ឌអង្គការសហប្រជាជាតិ។
ចុះផ្សាយនៅថ្ងៃ៖
ស្តាប់ - ០២:១០
ប្រទេសកម្ពុជាបានបោះឆ្នោតចុងក្រោយកាលពីថ្ងៃទី២៣ ខែកុម្ភៈ ម្សិលមិញគាំទ្រអង្គការសហប្រជាជាតិ រួមជាមួយប្រទេសចំនួន ១៤០ផ្សេងទៀត ដែលបានទាមទារឲ្យរុស្ស៊ីដកកងទ័ពចេញពីអ៊ុយក្រែន និងបញ្ឈប់សង្គ្រាម។ គឺជាការបោះឆ្នោតប្រឆាំងរុស្ស៊ីលើកចុងក្រោយរបស់កម្ពុជា ខណៈដែលរដ្ឋចំនួន៦ បានបោះឆ្នោតគាំទ្ររុស្ស៊ី និង៣១ផ្សេងទៀតអនុបវាទ ក្នុងនោះមានចិនផងដែរ។
កាលពីការបោះឆ្នោត៣លើកកន្លងទៅ ពោលគឺនៅថ្ងៃទី២ ខែមីនា ឆ្នាំ២០២២ កម្ពុជាចូលរួមជាប្រទេស co-sponsors បានបោះឆ្នោតថ្កោលទោសរុស្ស៊ី ដែលបានបើកការឈ្លានពានអ៊ុយក្រែន ដែលសេចក្តីសម្រេចរបស់មហាសន្និបាតអង្គការសហប្រជាជាតិពេលនោះមានប្រទេសចំនួន១៤១គាំទ្រ។
ជាបន្ទាប់មកទៀត ប្រទេសកម្ពុជាបានប្រកាន់ជំហរអព្យាក្រឹត ដោយសម្លេងអនុបវាទ នៅក្នុងការបោះឆ្នោតព្យួរសមាជិកភាពរបស់រុស្ស៊ីពីក្រុមប្រឹក្សាសិទ្ធិមនុស្សអង្គការសហប្រជាជាតិកាលពីថ្ងៃទី៧ ខែមេសា ឆ្នាំ២០២២ផងដែរ។ មហាសន្និបាតអង្គការសហប្រជាជាតិ បានសម្រេចព្យួររុស្ស៊ីពីក្រុមប្រឹក្សាសិទ្ធិមនុស្សអង្គការសហប្រជាជាតិ តាមរយៈសម្លេងគាំទ្រ ៩៣សម្លេង ប្រឆាំង ២៤សម្លេង និងអនុបវាទ ៥៨សម្លេង ក្នុងចំណោមប្រទេសសមាជិកសរុប១៧៥ ខណៈដែលកម្ពុជារួមនឹងប្រទេសអាស៊ានស្ទើរតែទាំងអស់បានបោះឆ្នោតអនុបវាទ និងប្រឆាំង។
លើសពីនេះ មហាសន្និបាតអង្គការសហប្រជាជាតិកាលពីថ្ងៃទី១២ ខែតុលា ឆ្នាំ២០២២ដែរ កម្ពុជាក៏បានថ្កោលទោសរុស្ស៊ី ទាក់ទងនឹងការប៉ុនប៉ងរបស់រស្ស៊ីក្នុងការកាត់យកតំបន់ចំនួន៤ គឺ Luhansk Kherson Donetsk និងតំបន់ Zaporizhzhia នៃប្រទេសអ៊ុយក្រែនទៅគ្រប់គ្រង។
កម្ពុជា ក៏ដូចជាជំហររួមរបស់អាស៊ាន ខណៈដែលកម្ពុជាធ្វើជាប្រធានអាស៊ានឆ្នាំ២០២២ តែងសម្តែងនូវការព្រួយបារម្ភជាខ្លាំង ចំពោះស្ថានភាពដ៏តានតឹងនៅអ៊ុយក្រែន។ កម្ពុជា និងអាស៊ានក៏បានអំពាវនាវឲ្យបញ្ឈប់ការបាញ់ប្រហារជាបន្ទាន់ ហើយបង្កើតបរិយាកាសល្អសម្រាប់ការចរចា ដោយគោរពទៅលើច្បាប់អន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ