ពលរដ្ឋភូមិព្រលាន២៤៣ក្នុងខេត្តកោះកុង បន្តស្នើឱ្យអាជ្ញាធរដោះស្រាយវិវាទដីធ្លីក្រោយរដ្ឋយកហូតដីឱ្យក្រុមហ៊ុនឯកជន
តំណាងសហគមន៍ភូមិព្រលាន២៤៣គ្រួសារ បានទទូចស្នើឱ្យអាជ្ញាធរខេត្តកោះកុង ជួយអន្តរាគមន៍បញ្ហាវិវាទដីធ្លីជូនពលរដ្ឋទាំងអស់ ក្រោយពួកគេអះអាងថា បានរងគ្រោះពីការដកហូតដីដែលធ្លាប់អាស្រ័យផលចាប់តាំងពីឆ្នាំ១៩៩៥ ទៅឱ្យក្រុមហ៊ុនស្ករអំពៅរបស់អ្នកឱកញ៉ា លី យ៉ុងផាត់កាលពីឆ្នាំ២០០៦។ បើតាម តំណាងសហគមន៍២៤៣គ្រួសារ ពលរដ្ឋបានបន្តដាក់ញាតិជាហូរហែរទៅកាន់រដ្ឋបាលខេត្ត និងស្វែងរកកិច្ចអន្តរាគមន៍ពីស្ថាប័នពាក់ព័ន្ធ ប៉ុន្តែនៅតែគ្មានដំណោះស្រាយជិត១៧មកឆ្នាំមកនេះ។
ចុះផ្សាយនៅថ្ងៃ៖
ស្តាប់ - ០២:៤៥
អ្នកស្រី ភាព តេង តំណាងពលរដ្ឋ២៤៣គ្រួសារ រស់នៅក្នុងសហគមន៍ព្រលាន ក្នុងឃុំកណ្តោល ស្រុកបុទុមសាគរ ខេត្តកោះកុងបានឱ្យដឹងថា ជិត១៧ឆ្នាំមកហើយ ដែលពលរដ្ឋចំនួន២៤៣គ្រួសាររស់នៅសហគមន៍ព្រលាន បន្តរងភាពអយុត្តិធម៌ពីការដកហូតដីធ្លាប់អាស្រ័យផលទៅឱ្យក្រុមហ៊ុនផលិតស្ករអំពៅ« កោះកុងស៊ូហ្គើ» និង«កោះកុងផ្លេនថេសិន» របស់ឱកញ៉ា លី យ៉ុងផាត់។
អ្នកស្រីថា ពលរដ្ឋទាំងអស់បានដើរដាក់ញាតិទៅកាន់រដ្ឋបាលខេត្ត និងទៅកាន់ក្រសួងដែនដីម្តងជាពីរដងហើយ។ ប៉ុន្តែក្រោយមក ក្រសួងដែនដី និងអាជ្ញាធរបានបដិសេធមិនដោះស្រាយវិវាទដីធ្លីនេះជូនពលរដ្ឋឡើយ ដោយបញ្ជាក់មកវិញថា ដីដែលពលរដ្ឋធ្លាប់អាស្រ័យផលនាពេលកន្លងមកនោះ គឺជាដីរបស់រដ្ឋ ហើយក្រសួងក៏ដោះស្រាយបញ្ចប់បញ្ហានេះតាំងពីឆ្នាំ២០១៨រួចរាល់អស់ហើយ ដូច្នេះក្រសួងមិនអាចដោះស្រាយម្តងទៀតបានឡើយ។
បើតាមតំណាងពលរដ្ឋរូបនេះ រដ្ឋបានដកហូតដីដែលពលរដ្ឋធ្លាប់អាស្រ័យផលទាំងអស់ប្រមាណ៩៤០០ហិកតាទៅធ្វើជាសម្បត្តិឯកជនរបស់រដ្ឋវិញ។ ខណៈរដ្ឋក៏បានប្តឹងពលរដ្ឋចំនួន៥នាក់ទៅតុលាការ បន្ទាប់ពីពួកគេបានទៅរស់នៅលើដីដែលរដ្ឋបានដកហូតរួចហើយ។ ពាក្យបណ្តឹងដែលរដ្ឋប្តឹងនោះគឺ ក្រោមបទចោទ«បង្កចលាចល និងធ្វើឱ្យខូចសណ្ដាប់ធ្នាប់សាធារណៈ អំពើញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងអំពើប៉ះពាល់កម្មសិទ្ធិនៃទ្រព្យសម្បត្តិឯកជនរបស់រដ្ឋ»។
ក្នុងនោះ អ្នកស្រី ភាព តេង បញ្ជាក់ថា អ្នកស្រីក៏ជាប់ពាក់ព័ន្ធបណ្តឹងនៅតុលាការដូចគ្នា ហើយតុលាការបានកោះហៅពលរដ្ឋទាំង៥នាក់នោះ ឱ្យចូលសវនការចំនួន២លើកហើយ ប៉ុន្តែលើកទី១ មិនមានលទ្ធផលណាមួយសម្រេចទេ ហើយកោះហៅលើកទី២ តុលាការបានលើកពេលទៅថ្ងៃទី០១ ខែមីនា ឆ្នាំ២០២៣វិញ មូលហេតុគឺចៅក្រមឈឺ។
ចំណែក កាលពីថ្ងៃទី១៦ ខែកុម្ភៈកន្លងទៅ ពលរដ្ឋសហគមន៍ភូមិព្រលានបានដាក់ញាតិទៅកាន់រដ្ឋបាលខេត្តកោះកុង ដើម្បីសុំកិច្ចអន្តរាគមន៍ដោះស្រាយបញ្ហាវិវាទដីធ្លីនេះ ក៏ដូចជាស្នើសុំជួួបជាមួយអភិបាលខេត្តកោះកុង លោកស្រី មិថុនា ភូថង។
ក្រោយមកនៅថ្ងៃដដែល លោកស្រី មិថុនា ភូថង បានស្នើឱ្យពលរដ្ឋដាក់ពាក្យស្នើសុំដីសម្បទានសង្គមកិច្ចពីរដ្ឋ ប្រសិនបើពលរដ្ឋនោះពិតជាគ្មានដីប្រាកដមែន។ ប៉ុន្តែ បើលើសពីនេះ អភិបាលខេត្តរូបនេះថា ខេត្តមិនមានយន្តការណាដោះស្រាយជូនបន្តទៀតទេ។
ចំណែក អ្នកស្រី ឃុន ង៉ាវ ពលរដ្ឋភូមិព្រលានដែរនោះ បានបដិសេធមិនស្នើសុំដីសម្បទានសង្គមកិច្ចឡើយ ពីព្រោះអ្នកស្រីថា ពលរដ្ឋបានបាត់បង់ដី ដោយសាររដ្ឋដកហូតទៅឱ្យក្រុមហ៊ុនឯកជន។ ម្ល៉ោះហើយ រដ្ឋត្រូវទទួលខុសត្រូវលើរឿងនេះ ហើយត្រូវដោះស្រាយតាមទំហំជាក់ស្តែងដែលក្រុមហ៊ុនបានរំលោភយក៕
សូមជម្រាបថា បញ្ហាវិវាទដីធ្លីជាមួយក្រុមហ៊ុនរបស់លោកឱកញ៉ា លី យ៉ុង ផាត់ ពលរដ្ឋជិត២០នាក់ត្រូវរងពាក្យបន្តឹងនៅតុលាការ ក្រោមបទចោទដូចគ្នា គឺ«បង្កចលាចល និងធ្វើឱ្យខូចសណ្ដាប់ធ្នាប់សាធារណៈ អំពើញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងអំពើប៉ះពាល់កម្មសិទ្ធិនៃទ្រព្យសម្បត្តិឯកជនរបស់រដ្ឋ»។ ពលរដ្ឋជិត២០នាក់នោះ គឺជាពលរដ្ឋរស់នៅភូមិព្រលាន ២៤៣គ្រសួង, ពលរដ្ឋ៨៤៣គ្រួសារ នៅសហគមន៍៨៤៣ និងពលរដ្ឋ ១២៩គ្រួសារ នៅសហគមន៍១២៩ និងសហគមន៍ផ្សេងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ