លោក ហ៊ុន សែន ទុកឱសានវាទត្រឹមចុងខែនេះឲ្យបុគ្គលិកវីអូឌីដាក់ពាក្យចូលធ្វើការងាររដ្ឋ
ប្រមុខរដ្ឋាភិបាលកម្ពុជា លោក ហ៊ុន សែន ទុកឱសានវាទត្រឹមចុងខែកុម្ភៈនេះដើម្បីឲ្យបុគ្គលិកវីអូឌីដែលប៉ះពាល់ដោយសារតែការបិទអាជ្ញាប័ណ្ណនោះ ដាក់ពាក្យចូលធ្វើការងារក្នុងក្របខណ្ឌរដ្ឋ។ ការគូសបញ្ជាក់យ៉ាងដូច្នេះ ដែលបើតាមលោកនាយករដ្ឋមន្ត្រី គឺមានបុគ្គលិកយ៉ាងតិច៨រូបហើយបានដាក់ពាក្យសុំធ្វើការងាររដ្ឋគិតត្រឹមល្ងាចថ្ងៃទី១៧កុម្ភៈ។
ចុះផ្សាយនៅថ្ងៃ៖
ស្តាប់ - ០១:៥២
នៅខណៈដែលបុគ្គលិកមួយចំនួននៅស្ទាក់ស្ទើរក្នុងការសម្រេចចិត្ត លោកនាយករដ្ឋមន្ត្រី ហ៊ុន សែន បានកំណត់រយៈពេលឈប់ទទួលពាក្យសុំចូលធ្វើការរដ្ឋត្រឹមម៉ោង១៧.០០នាទីថ្ងៃ២៨កុម្ភះ២០២៣ ដើម្បីបញ្ចប់ការងារនេះ។
លោក ហ៊ុន សែន បានរុញទូកបណ្តោយទឹក ខណៈលោកអះអាងថា លោកឃើញមានអ្នកបង្ហោះសារថាបុគ្គលិកមួយចំនួនមិនចូលមកធ្វើការរដ្ឋទេសុខចិត្តទៅធ្វើស្រែនិងឡើងត្នោត។
ដោយគូសបញ្ជាក់ជាថ្មីម្តងទៀតថា វិទ្យុសំឡេងប្រជាធិបតេយ្យ(VOD) មិនអាចរស់ឡើងវិញទេនោះ លោកប្រមុខរដ្ឋាភិបាលកម្ពុជា បញ្ជាក់ថា ការងារក្របខ័ណ្ឌរដ្ឋនៅពេលនេះត្រូវមានការប្រឡងយ៉ាងតឹងតែងទើបអាចចូលបាន។លោកថាប្រសិនបើបុគ្គលិកទាំងនោះមិនទទួលយកដោយមិនបាច់ប្រឡងលោកពិតជាមានការអរគុណ ហើយសូមឲ្យអ្នកទាំងអស់នោះរកការងារបានធ្វើដើម្បីចិញ្ចឹមជីវិត។
គួរឲ្យដឹងថា បុគ្គលិកដែលកំពុងធ្វើការងារនៅមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM) គឺមានសរុបចន្លោះពី៤០ទៅ៦០នាក់។ ពួកគេត្រូវបានបែងចែកជាច្រើនក្រុម។ សម្រាប់ក្រុមព័ត៌មានវីអូឌី ឬជាក្រុមអ្នកធ្វើការងារខាងផ្នែកផ្សព្វផ្សាយគឺមានគ្នាប្រមាណ២០នាក់។ ក្រៅពីនោះពួកគេធ្វើការនៅក្នុងគម្រោងផ្សេងៗរាប់ទាំងគម្រោងបណ្តុះបណ្តាលអ្នកសារព័ត៌មានផងដែរ ដែលពួកគេរំពឹងថា នឹងនៅតែអាចបន្តការងារបានជាធម្មតា។
ការដែលពួកគេរំពឹងយ៉ាងដូច្នេះដោយសារតែមជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ(CCIM)ត្រូវបានចុះបញ្ជីស្របច្បាប់នៅក្រសួងមហាផ្ទៃកាលពីខែមិថុនា២០០៧ ដែលជាអង្គការមិនមែនរដ្ឋាភិបាល។ ចំណែកវីអូឌី គឺជាកម្មវិធីមួយរបស់(CCIM) ដែលធ្វើការងារផ្សព្វផ្សាយព័ត៌មានដែលទទួលបានអាជ្ញាប័ណ្ណតាមរយៈក្រសួងព័ត៌មាន ដែលត្រូវបានលុបចោលវិញនៅថ្ងៃទី១៣កុម្ភៈ២០២៣ ទៅតាមបញ្ជារបស់លោក ហ៊ុន សែន នៅក្រោមហេតុផលផ្សាយព័ត៌មានមិនពិតថា លោក ហ៊ុន ម៉ាណែត ចុះហត្ថលេខាជំនួយឳពុកផ្តល់ជំនួយទៅប្រទេសតួកគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ