អ្នកនយោបាយចូលរូមរំលែកទុក្ខលោក ហ៊ុន សែន ខណៈស្ថានការណ៍នយោបាយឡើងកម្តៅ
អ្នកនយោបាយមួយចំនួននៅក្រៅរដ្ឋាភិបាលដែលជាគូប្រកួតនឹងគណបក្សកាន់អំណាច បានផ្ញើសារចូលរួមរំលែកទុក្ខជាមួយក្រុមលោកនាយករដ្ឋមន្ត្រី ហ៊ុន សែន ក្នុងគ្រាដែលប្អូនថ្លៃស្រីរបស់ប្រមុខរដ្ឋាភិបាលទទួលមរណភាព។ កាយវិកានេះកើតឡើង ខណៈដែលស្ថានការណ៍នយោបាយនៅកម្ពុជាបានឡើងកម្តៅតាមរយៈការព្រមានម្តងហើយម្តងទៀតពីសំណាក់ប្រមុខគណបក្សប្រជាជនកម្ពុជា ចំពោះអ្នកនយោបាយណាដែល រិះគន់ វាយប្រហារមកលើគណបក្សកាន់អំណាច។
ចុះផ្សាយនៅថ្ងៃ៖
ស្តាប់ - ០២:១៧
លើសពីការចេញលិខិតចូលរួមរំលែកទុក្ខ គណបក្សភ្លើងទៀនដែលគូប្រជែងមានសក្តានុពលជាមួយគណបក្សកាន់អំណាចបានចាត់តំណាងគណបក្សរបស់ខ្លួនទៅចូលរួមគោរពវិញ្ញាណក្ខន្ធដោយផ្ទាល់នៅគេហដ្ឋានសពលោកស្រី ប៊ុន សុថា ប្អូនស្រី លោកស្រី ប៊ុន រ៉ានី ហ៊ុន សែន។ លោកប្រមុខរដ្ឋាភិបាល ហ៊ុន សែន បានចេញមកទទួលតំណាងគណបក្សភ្លើងទៀនចំនួន៤រូប គឺមាន លោក ចេប គឺមអ៊ាង លោក ចាន់ ចេន លោកស្រី ឡាយ បូនី និងលោកស្រី ពត ពៅ។
ដោយឡែក សម្រាប់ លោក កឹម សុខា ដែលតែងតែទៅចូលរួមរំលែកទុក្ខគ្រួសារលោក ហ៊ុន សែន ដែលកន្លងមកម្តាយក្មេកគាត់ទទួលមរណភាព និង បងប្រុសបង្កើត លោក ហ៊ុន ណេង ទទួលមរណរភាពនោះ លោកមិនបានទៅចូលរួមរំលែកទុក្ខជាថ្មីទៀតនេះឡើយ។ ប៉ុន្តែលោក កឹម សុខា បានចាត់តាំងលោកស្រី តែ ចន្ទមនោ ជាភរិយាទៅចូលរួមរំលែកទុក្ខ ដល់គេហដ្ឋានសពលោកស្រី ប៊ុន សុថា។
លើសពីការឆ្លើយតបនូវពាក្យអរគុណ លោកស្រី ប៊ុន រ៉ានី បានគូសបញ្ជាក់ថា លោកស្រី តែ ចន្ទមនោ និងប្អូនស្រីគាត់គឺលោកស្រី ប៊ុន សុថា គឺធ្លាប់រួមការងារជាមួយគ្នាក្នុងឆ្នាំ១៩៧៩ និង១៩៨០ ដែលបន្សល់ទុកនូវអនុស្សាវរីយ៍ជាច្រើន។
លោក សេក សុជាតិ ស្ថាបនិក អង្គការអភិវឌ្ឍន៍ផ្នត់គំនិត យល់ថា ការដែលអ្នកនយោបាយមួយចំនួននៅក្រៅរដ្ឋាភិបាល ផ្ញើសារចូលរួមរំលែកទុក្ខជាមួយក្រុមលោកនាយករដ្ឋមន្ត្រី ហ៊ុន សែន គឺជាការផ្សះផ្សារតាមបែបសាសនា។ លោកវិភាគថា កាយវិកានេះ មិនអាចធ្វើឲ្យស្ថានការណ៍នយោបាយថយកម្តៅបានឡើយ ខណៈលោកមើលឃើញថា ការធ្វើនយោបាយរបស់អ្នកនយោបាយមួយចំនួននៅតែគ្មានការយោគយល់ដោយប្រកាន់យកត្រូវវៀងៗខ្លួន និងចាត់ទុកគូប្រជែងជាគូសត្រូវ។
យ៉ាងណាក៏ដោយសម្រាប់លោក សម រង្ស៊ី ដែលនៅក្រៅប្រទេសបានគាស់កកាយពីប្រវត្តិរបស់លោកស្រី ប៊ុន សុថា មកនិយាយឡើងវិញ ដោយភ្ជាប់នឹងករណីដែលអតីតមេអង្គរក្សារបស់លោកឈ្មោះ ស្រ៊ុន វង្សវណ្ណៈ ធ្លាប់ត្រូវបានអាជ្ញាធរកម្ពុជាចាប់កាត់ទោសដោយចោទថា ជាអ្នកសម្លាប់ប្តីដើមរបស់លោកស្រី ប៊ុន សុថា គឺលោក កូវ សាមុត។ តែក្រោយមកត្រូវបានលើកលែងទោសវិញ។
សម្រាប់លោក ហ៊ុន សែន ដែលចូលទៅឆ្លើយតបនឹងរឿងនេះ ចាត់ទុកថានេះជាការប្រមាថ និងបានព្រមានចាត់វិធានលើអ្នករិះគន់ទាំងនេះ ដោយទាមទារឲ្យក្រុមហ៊ុនហ្វេសប៊ុកធ្វើជាសាក្សីផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ