លោក ហ៊ុន ម៉ាណែត ថ្លែងថាលោកមិនបានធ្វើខុសច្បាប់នោះទេ
តាមរយៈហ្វេសប៊ុករបស់លោកនៅថ្ងៃចន្ទនេះ លោក ហ៊ុន ម៉ាណែត ដែលជាកូនប្រុសច្បងលោកនាយករដ្ឋមន្ត្រី ហ៊ុន សែន និងជាបេក្ខជននាយករដ្ឋមន្ត្រីអនាគត បានថ្លែងថាលោកមិនបានធ្វើខុសច្បាប់អ្វីទេ។ ការបញ្ជាក់របស់លោក ហ៊ុន ម៉ាណែត ដូច្នេះ គឺធ្វើឡើងបន្ទាប់ពីអ្នកវិភាគនៅក្រៅប្រទេសបានរិះគន់លោកថា គណបក្សកាន់អំណាចប្រកាសពីលោក ហ៊ុន ម៉ាណែត ជាបេក្ខជននាយករដ្ឋមន្ត្រីអនាគត ខណៈពេលដែលលោក ហ៊ុន ម៉ាណែត បច្ចុប្បន្នជាមេបញ្ជាការកងទ័ពជើងគោក។
ចុះផ្សាយនៅថ្ងៃ៖
ស្តាប់ - ០២:២៤
តាមរយៈឃ្លីបវីដេអូជាង ៦នាទី លោក ហ៊ុន ម៉ាណែត ដែលជាមេបញ្ជាការកងទ័ពជើងគោក និងជាបេក្ខជននាយករដ្ឋមន្ត្រីអនាគតបានប្រាប់ទៅអ្នកវិភាគ ដែលបានរិះគន់លោកថា ការវិភាគមិនគ្រប់ជ្រុងជ្រោយទេ ខណៈអ្នកវិភាគបានលើកឡើងនូវមាត្រា ១៥ នៃច្បាប់ស្តីពីគណបក្សនយោបាយ។ លោក ហ៊ុន ម៉ាណែត ទទួលស្គាល់ច្បាប់ស្តីពីគណបក្សនយោបាយ ក៏ប៉ុន្តែលោកស្នើឲ្យមើលគ្រប់ច្បាប់ ដែលក្នុងនោះលោកផ្តោតទៅលើច្បាប់ស្តីពីការបោះឆ្នោតជ្រើសតាំងតំណាងរាស្ត្រ។
មេបញ្ជាការកងទ័ពជើងគោករូបនេះបញ្ជាក់ថាមាត្រា ៨៣នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រ ដែលថា «បន្ទាប់ពីបញ្ចប់ម៉ោងធ្វើការ ឬស្ថិតនៅក្រៅម៉ោងការងារ ឬមិនស្ថិតនៅក្នុងម៉ោងបំពេញការងារ ក្នុងសមត្ថភាពផ្លូវការ មន្ត្រីរាជការស៊ីវិល អាជ្ញាធរដែនដីគ្រប់លំដាប់ថ្នាក់ កងយោធពលខេមរភូមិន្ទ មន្ត្រីនគរបាលជាតិ និងមន្ត្រីតុលាការ អាចចូលរួមក្នុងសកម្មភាពឃោសនាគាំទ្រចំពោះគណបក្សនយោបាយណាមួយ ឬបេក្ខជនណាម្នាក់ ប៉ុន្តែមិនត្រូវស្លៀកពាក់ឯកសណ្ឋានយោធា និងមិនត្រូវមានអាវុធជាប់នឹងខ្លួន និងមិនត្រូវធ្វើអ្វីដែលនាំឱ្យមានការគំរាមកំហែងឡើយ»។
ជាមួយគ្នានេះ លោក ហ៊ុន ម៉ាណែត បានចោទសួរ និងស្នើឲ្យផ្តល់រូបថតឲ្យលោក ជុំវិញថាតើលោកធ្លាប់ពាក់ឯកសណ្ឋានយោធា ហើយឃោសនាគាំទ្រគណបក្សប្រជាជននោះ។
លោក ហ៊ុន ម៉ាណែត បញ្ជាក់ជាថ្មីថា ការគាំទ្រលោក ជាបេក្ខជនបន្តវេន គឺជាការសម្រេចផ្ទៃក្នុងគណបក្ស ហើយមិនមានបក្សណា ហាមបក្សណាមិនឲ្យគិតគូរជាមុនថាអ្នកណាត្រូវបន្តវេននោះទេ។ អនាគតបេក្ខជននាយករដ្ឋមន្ត្រីរូបនេះ ក៏បានលើកយកមាត្រា២៥ នៃច្បាប់ស្តីពីការបោះឆ្នោតជ្រើសតាំងតំណាងរាស្ត្រមកបង្ហាញ និងស្នើឲ្យអ្នកវិភាគបើកមើលច្បាប់ឡើងវិញចៀសវាងធ្វើឲ្យបាត់បង់តម្លៃ និងជំនឿទុកចិត្ត។
សូមបញ្ជាក់ថាប្រទេសកម្ពុជានឹងរៀបចំការបោះឆ្នោតជ្រើសតាំងតំណាងរាស្ត្រនីតិកាលទី៧ នៅខែកក្កដា ឆ្នាំ២០២៣នេះ ក៏ប៉ុន្តែបេក្ខជនដាក់ពាក្យឈរឈ្មោះគឺធ្វើឡើងនៅថ្ងៃទី២៤ ខែមេសា ឆ្នាំ២០២៣។ សូមរំលឹកថា តាមរយៈសេចក្តីសម្រេចនៃមហាសន្និបាតវិសាមញ្ញរបស់គណបក្សប្រជាជនកាលពីថ្ងៃម្សិលមិញ អង្គមិទ្ទិញបានគាំទ្រពេញទំហឹង លោកនាយករដ្ឋមន្ត្រី ហ៊ុន សែន ជាបេក្ខភាពនាយករដ្ឋមន្ត្រីសម្រាប់នីតិកាលទី៧ នៃរដ្ឋសភា និងគាំទ្រលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីសម្រាប់ពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ