បក្សកាន់អំណាចចាប់គិតលើកត្តាជីវភាពនិងការពារផ្លូវច្បាប់លើស្ត្រីបំរើសេវាកម្សាន្តខណៈស្ត្រីធ្វើការក្នុងវិស័យនេះកំពុងរងគ្រោះ
ភ្លាមៗបន្ទាប់ពីមន្ត្រីរដ្ឋាភិបាលបង្ហើបប្រាប់ថា លោកនាយរដ្ឋមន្ត្រី ហ៊ុន សែន ផ្ដួចផ្ដើមគំនិតឲ្យគិតលើកត្តាជីវភាពនិងការពារផ្លូវច្បាប់លើស្ត្រីបំរើសេវាកម្សាន្តនៅទូទាំងប្រទេស មន្ត្រីសង្គមស៊ីវិលមួយចំនួនបានទះដៃសាទរចំពោះដំណឹងនេះ ព្រោះជាអ្វីដែលពួកគេធ្លាប់ទាមទារចង់បានយូរមកហើយ។ ក្រុមមន្ត្រីសង្គមស៊ីវិលដដែលយល់ថា ដ្បិតថា វាយឺតពេលបន្តិច តែជាការចាប់ផ្ដើមមួយដ៏ល្អ ប្រសើរជាងមិនធ្វើអីសោះ។
ចុះផ្សាយនៅថ្ងៃ៖
ស្តាប់ - ០២:៤៩
យ៉ាងហោចណាស់មន្ត្រីរដ្ឋាភិបាលពីររូបនៅថ្ងៃនេះ បានទម្លាយព័ត៌មានចេញពីមហាសន្និបាតវិសាមញ្ញតំណាងទូទាំងប្រទេសរបស់គណបក្សប្រជាជននៅវិមាន៧មករាថា លោកនាយករដ្ឋមន្ត្រី ហ៊ុន សែន ប្រមុខបក្សកាន់អំណាចនឹងផ្តល់មេធាវីដើម្បីជួយការពារស្ត្រីបម្រើសេវាកម្សាន្តនៅទូទាំងប្រទេស ក្នុងករណីមានការរំលោភបំពាន ឬមានអំពើហិង្សាណាមួយកើតឡើង។ ក្រុមមេធាវីទាំងនោះមានប្រភពមកពីក្រសួងកិច្ចការនារី និងក្រុមមេធាវីរបស់លោក ហ៊ុន សែន ផ្ទាល់ដែលដឹកនាំដោយលោកគី តិច ។
មិនត្រឹមតែគិតគូរផ្នែកច្បាប់ដល់ស្ត្រីបំរើក្នុងសេវាកម្សាន្តប៉ុណ្ណោះទេ លោក ហ៊ុន សែន ក៏កំពុងពិចារណាផ្តល់ជូនបណ្ណ ប.ស.ស ដើម្បីជួយសម្រួលដល់ទុកលំបាកដល់ក្រុមស្ត្រីទាំងនេះ ទទួលបានសេវាព្យាបាលជម្ងឺដោយឥតគិតថ្លៃ។ យ៉ាងណាមិញគេមិនទាន់ដឹងថា បេសកម្មនេះចេញដំណើរផ្លូវការនៅពេលណាឡើយ តែមន្ត្រីសង្គមស៊ីវិលធ្វើការលើកកម្ពស់ស្ត្រីសង្ឃឹមថា ការងារនេះនឹងលេចចេញជារូបរាងក្នុងពេលឆាប់។
ថ្លែងមកកាន់វិទ្យុបារាំងអន្តររជាតិតាមខ្សែទូរសព្ទនៅថ្ងៃទី២៩មករានេះ អ្នកស្រី អ៊ូ ទេពផល្លីន ប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជាលើកឡើងថា គំនិតផ្ដួចផ្ដើមរបស់ប្រមុខរដ្ឋាភិបាលនិងប្រមុខបក្សកាន់អំណាចនៅពេលនេះជារឿងមួយដ៏ល្អទោះបីជាយឺតពេលបន្តិចក្ដី។ ប៉ុន្តែអ្នកស្រីចង់ឃើញរដ្ឋាភិបាលផ្ដល់គិតគូរឲ្យស៊ីជម្រៅជាងនេះបន្តិច រាល់ការជួបប្រទះរបស់ស្ត្រីបំរើសេវាកម្សាន្តទាំងការធានាផ្នែកច្បាប់ និងកត្តាជីវភាព។ កន្លងមកស្ត្រីបំរើការងារក្នុងសេវាកម្សាន្តដែលរួមមានៈ ខារ៉ាអូខេ បៀរហ្កាឌិន ឌីស្កូតែក និងអ្នករត់ទុកជាដើម បានរាយការណ៍មកថា រងបំពាបំពាន បង្ខិតបង្ខំ ហិង្សា បៀតបៀន គ្រប់ទម្រង់ពីភ្ញៀវជាពិសេសពីប្រភេទភ្ញៀវមានអំណាច។ ហើយតាមកត់សម្គាល់របស់អ្នកស្រី អ៊ូ ទេពផល្លីន គេកម្រឃើញអ្នកប្រព្រឹត្តទាំងនោះត្រូវបានច្បាប់នាំមកកាត់ទោសណាស់។
ធ្ងន់ធ្ងរជាងនេះទៀ តក្រុមស្ត្រីបំរើសេវាកម្សាន្តត្រូវបានម្ចាស់អាជីវកម្មចំនួនបិទសេរីភាពក្នុងការពពោះ។ បើពពោះត្រូវប្រឈមនឹងការបាត់បង់ការងារ ព្រោះការពពោះរំខានភាពទាក់ទាញដល់អាជីវកម្មរបស់ថៅកែ ហើយជាញឹកញយស្ត្រីត្រូវបានតម្រូវឲ្យធ្វើតេស្តពិនិត្យទឹកនោម។ ស្ត្រីបំរើសេវាកំសាន្តក៏ប្រឈមនឹងលក្ខខណ្ឌការងារមិនអំណោយផល និងគ្មានបៀវត្សកំណត់ត្រឹមត្រូវ។ ការងារកំណត់ម៉ោងចូលតែមិនកំណត់ម៉ោងចេញ ខណៈបៀវត្សប្រចាំថ្ងៃពឹងលើកម្រៃជើងសា។ នេះជាអ្វីដែលស្ត្រីបំរើសេវាកម្សាន្តចែករំលែកមកកាន់ អ្នកស្រី អ៊ូ ទេពផល្លីន ប្រធានសហព័ន្ធសហជីព កម្មករចំណីអាហារ និងសេវាកម្មកម្ពុជា។ សំណុំរឿងទាំងនេះហើយដែលអ្នកស្រី អ៊ូ ទេពផល្លីន ស្នើឲ្យរដ្ឋាភិបាលផ្ដល់ការគិតគូរឲ្យបានស៊ីជម្រៅដើម្បីជួយស្ត្រីកំពុងបំរើការងារក្នុងវិស័យកម្សាន្ត។
បន្ថែមលើនេះអ្នកស្រីក៏ចង់ឲ្យរដ្ឋាភិបាលគិតលើការផ្ដល់ជម្រកសុវត្ថិភាព ព្រោះមានតែជម្រកសុវត្ថិភាពទេដែលការពារស្ត្រីពីការគម្រាមកំហែងណាមួយពីក្រុមអ្នកមានអំណាចមួយចំនួន។ នៅកម្ពុជាស្រ្តីបំរើការងារក្នុងសេវាកម្សាន្តត្រូវបានប៉ាន់ប្រមាណថា ឈរក្នុងរង្វង់៨ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ