លោក ហ៊ុន សែន៖ កំហុសផ្នែកនយោបាយនៃការធ្វើរដ្ឋប្រហារទើបធ្វើឲ្យប្រទេសកម្ពុជាក្រ
លោកនាយករដ្ឋមន្រ្តី ហ៊ុន សែន បានបញ្ជាក់ថា ប្រទេសកម្ពុជាមានសម្បត្តិធនធានធម្មជាតិច្រើន ប៉ុន្តែប្រទេសកម្ពុជានៅតែក្រ។ លោកបានលើកមូលហេតុដែលនាំឲ្យប្រទេសកម្ពុជាក្រ គឺកើតឡើងដោយសារកំហុសផ្នែកនយោបាយ និងសង្រ្គាម ទើបធ្វើឲ្យប្រទេសកម្ពុជាធ្លាក់ទៅជាប្រទេសក្រីក្រ ជាពិសេសក្រោយធ្វើរដ្ឋប្រហារទម្លាក់សម្ដេចព្រះនរោត្តមសីហនុ នៅថ្ងៃ១៨មីនា ១៩៧០ បានបំផ្លាញកម្ពុជាទាំងស្រុង។ ការលើកឡើងបែបនេះនៅក្នុងពិធីចែកសញ្ញាបត្រជូនសិស្សនិស្សិតនៃសាកលវិទ្យាល័យវេស្ទើន នៅថ្ងៃទី២៦ ខែមករានេះ។
ចុះផ្សាយនៅថ្ងៃ៖
ស្តាប់ - ០២:០៤
លោក ហ៊ុន សែន បានលើកឡើងថា ប្រទេសដែលមានសម្បត្តិធនធានធម្មជាតិសំបូរបែបមិនប្រាកដថាជាប្រទេសក្លាយទៅជាអ្នកមានទាំងអស់នោះទេ រីឯប្រទេសដែលមិនមានសម្បត្តិធនធានធម្មជាតិ ក៏មិនប្រាកដថានឹងមិនក្លាយទៅជាអ្នកមានបានដែរ។ សម្រាប់ប្រទេសកម្ពុជា លោក ហ៊ុន សែន បានអះអាងថា មានសម្បត្តិធនធានធម្មជាតិច្រើនសំបូរបែប ដូចជា មាស ត្បូង ធ្យូងថ្ម រ៉ែដែក និងផ្សេងៗទៀត ដែលខ្លះបានដាក់ឲ្យវិនិយោគ និងធ្វើអាជីវកម្ម ប៉ុន្តែប្រទេសកម្ពុជានៅតែក្រ។
មិនតែប៉ុណ្ណោះ ប្រមុខដឹកនាំរដ្ឋាភិបាលរូបនេះ បានអះអាងទៀតថា ប្រទេសកម្ពុជាជាប្រទេសដែលមានអាកាសធាតុអំណោយផល មិនក្ដៅពេក ហើយក៏មិនត្រជាក់ពេក និងពុំមានខ្យល់ព្យុះធំៗ ដូចប្រទេសដទៃនោះទេ គ្រាន់តែមានទឹកជំនន់កើតឡើងម្ដងម្កាលប៉ុណ្ណោះ ប៉ុន្តែហេតុអ្វីកម្ពុជានៅតែក្រ។ បើតាមលោក ហ៊ុន សែន បញ្ហានេះផ្ដើមចេញពីកំហុសនយោបាយ ដោយបានទម្លាក់កំហុសទៅលើការធ្វើរដ្ឋប្រហារទម្លាក់សម្ដេចព្រះនរោត្តមសីហនុនៅឆ្នាំ១៩៧០ ទើបធ្វើឲ្យប្រទេសកម្ពុជាធ្លាក់ជាប្រទេសក្រីក្រ។
ករណីនេះ លោកបណ្ឌិត មាស នី អ្នកឃ្លាំមើលការអភិវឌ្ឍសង្គម ទទួលស្គាល់ផងដែរ ប៉ុន្តែលោកថាបើប្រៀបធៀបពីសង្រ្គាមមកដល់ឥលូវវាមានរយះពេលជាង៣០ឆ្នាំហើយ ដូច្នេះការបន្តបន្ទោសអតីតកាលតែមួយមុខ វាមិនគ្រប់គ្រាន់នោះទេ។ ត្រង់បញ្ហានេះ លោកបណ្ឌិត មាស នី ថា រដ្ឋាភិបាលហាក់នៅមិនទាន់ទទួលជោគជ័យក្នុងការការពារធនធានធម្មជាតិទេ ជាពិសេសការផ្ដល់ការវិនិយោគធនធានធម្មជាតិ ទៅឲ្យក្រុមហ៊ុន មិនមានការត្រួតពិនិត្យឲ្យបានត្រឹមត្រូវ ព្រោះក្រុមហ៊ុនខ្លះ លោកកត់សម្គាល់ឃើញថា មានហំព័ទ្ធរបងជិត មិនអាចធ្វើឲ្យអាជ្ញាធរមូលដ្ឋានងាយស្រួលក្នុងការចុះត្រួតពិនិត្យឡើយ។
សូមបញ្ជាក់ថា ក្រោយមានរដ្ឋប្រហារនៅឆ្នាំ១៩៧០ ប្រទេសកម្ពុជាបានធ្លាក់ក្នុងសង្រ្គាម រហូតធ្លាក់ទៅក្នុងរបបប្រល័យពូជសាសន៍ ប៉ុល ពត ដោយសម្លាប់ប្រជាពលរដ្ឋជិត ៣លាននាក់ និងបំផ្លិចបំផ្លាញធនធានមនុស្ស និងហេដ្ឋារចនាសម្ព័ន្ធនានា ដែលជាផ្នែកមួយធ្វើឲ្យប្រទេសកម្ពុជាធ្លាក់ក្នុងប្រទេសក្រីក្រ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ