វិស័យសំណង់និងអចលនទ្រព្យត្រូវបានព្យាករណ៍ថា នឹងដើរអូសជើងក្នុងឆ្នាំ២០២៣
វិស័យសំណង់និងអចលនទ្រព្យត្រូវបានព្យាករណ៍ថា ងើបឡើងយឺតក្នុងឆ្នាំ២០២៣ ខណៈវិស័យនេះចូលរួមរុញកំណើនសេដ្ឋកិច្ចកម្ពុជា១០ភាគរយក្នុងមួយឆ្នាំ។ ការព្យាករណ៍ត្រូវបានលើកឡើងនៅក្នុង វេទិកាសាធារណៈស្ដីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២៣រៀបចំឡើងដោយ ក្រសួងសេដ្ឋកិច្ចនិងហិរញ្ញវត្ថុ នៅថ្ងៃទី២៥មករានេះ។
ចុះផ្សាយនៅថ្ងៃ៖
ស្តាប់ - ០២:៣៨
ក្នុងឆ្នាំ២០២៣ វិស័យសំណង់នឹងស្ទុះឡើងត្រឹមកម្រិតរង្វង់១,១ ខណៈវិស័យអចលនទ្រព្យនឹងកើនឡើងក្នុងរង្វង់១,២។ សន្ទុះនៃភាពយឺតយ៉ាវរបស់វិស័យទាំងពីរនេះដោយសារតែកម្សោយនៃលំហូរវិនិយោគទុនពីបរទេស។
បើតាមមន្ត្រីជំនាញ ការអូសជើងរបស់វិស័យទាំងពីរមិនបានក្លាយជាក្ដីសង្ឃឹមក្នុងការចូលរួមចំណែកជំរុញកំណើនសេដ្ឋកិច្ចជាតិនៅឆ្នាំ២០២៣ ដែលត្រូវបានរំពឹងថា ឈរក្នុងរង្វង់៥,៦ភាគរយ។ មិនត្រឹមតែប៉ុណ្ណោះវាបានបង្ករផលរំខានដល់ការរុញច្រានកំណើនសេដ្ឋកិច្ចឆ្នាំនេះដែរ។
ជុំវិញបញ្ហានេះ លោក វង្សី វិស្សុត រដ្ឋលេខាធិការប្រចាំការនៃក្រសួងសេដ្ឋកិច្ចដែលដឹកនាំវេទិកាសាធារណៈនៅថ្ងៃទី២៥មករានេះឲ្យដឹងថា រដ្ឋាភិបាលមានគោលនយោយបាយគាំទ្រក្រោមកិច្ចសហការពីធនាគារជាតិកម្ពុជា ក្រសួងសេដ្ឋកិច្ច ពន្ធដា និងភាគីអចលនទ្រព្យដោះស្រាយរួមគ្នា។
ជាមួយគ្នានេះ នៅក្នុងវេទិកាសាធារណៈស្ដីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២៣ ក្រសួងសេដ្ឋកិច្ចបន្តបង្ហាញក្ដីសង្ឃឹមជាថ្មីថា សេដ្ឋកិច្ចកម្ពុជាកើនឡើងក្នុងរង្វង់៥,៦ភាគរយក្នុងឆ្នាំ២០២៣នេះជាមួយនឹងការបង្កើនកញ្ចប់ថវិកាប្រមាណជិត១០ពាន់លានដុល្លារ។
មិនខុសពីរាល់ដងក្ដីសង្ឃឹមដែលថា សេដ្ឋកិច្ចកម្ពុជាកើនឡើងក្នុងរង្វង់៥,៦ភាគរយក្នុងឆ្នាំ២០២៣ គឺផ្អែកទៅលើកំណើននាំចេញនៅតែល្អដោយសារការនាំចេញវិស័យកាត់ដេររក្សាបានកំណើនវិជ្ជមានក្នុងរង្វង់៥,៥ភាគរយ ខណៈវិស័យកម្មន្តសាលមិនមែនកាត់ដេរ(គ្រឿងសង្ហារឹម សូឡា និងគ្រឿងបង្គុំអេឡិចត្រូនិកជាដើម) បន្តរក្សាកំណើនល្អក្នុងរង្វង់១១,៧ភាគរយ។
ក្រៅពីវិស័យពីរនេះគេក៏មិនភ្លេចផ្ដល់ក្ដីសង្ឃឹមលើវិស័យកសិកម្មនិងទេសចរណ៍ដែរ។ វិស័យកសិកម្មត្រូវបានរំពឹងថា កំណើននាំចេញនៅតែល្អក្នុងរង្វង់១,១ភាគរយ។ ចំណែកវិស័យទេសចរណ៍នឹងរួមចំណែករុញសេដ្ឋកិច្ច៣២,៧ភាគរយដោយសារការងើបឡើងនៃលំហូរមនុស្សពីក្រៅ៤,៣លាននាក់និងលំហូរមនុស្សក្នុងស្រុក១៤លាននាក់។
តែយ៉ាងណាមន្ត្រីជាន់ខ្ពស់ក្រសួងសេដ្ឋកិច្ចអះអាងថា ក្ដីសង្ឃឹមនេះស្ថិតនៅក្នុងភាពប្រកដប្រជាប៉ុន្មានទេ ដោយសារវិបត្តិសង្គ្រាមនៅខាងក្រៅនិងស្ថានភាពនៅក្នុងតំបន់កាន់តែមានសភាពយ៉ាប់យ៉ឺនដែលបណ្ដាលមកពីវិបត្តិកូវីដ១៩។ ម្យ៉ាងទៀតភាពរឹងមាំនៃសេដ្ឋកិច្ចកម្ពុជាពឹងពាក់យ៉ាងសំខាន់លើដៃគូរពាណិជ្ជកម្មធំៗចំនួន៤រួមមាន៖ចិន អាមេរិក អឺរ៉ុបនិងដៃគូអាស៊ាន។
សូមជម្រាបជូនថា ក្នុងឆ្នាំ២០២៣រដ្ឋាភិបាលកម្ពុជាចំណាយថវិកាសរុបជិត១០ពាន់លានដុល្លារ។ក្នុងនោះ៧២០០លានដុល្លារជាចំណូលក្នុងស្រុក ៦០០លានដុល្លារជាប្រាក់សន្សំ និង១៨០០លានដុល្លារជាកម្ចីបរទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ